হাথৰছৰ সৎসংগত পদপিষ্ট হৈ ১২১ জন লোকৰ মৃত্যুৰ পিছত ইটোৰ পিছত সিটোকৈ নাৰায়ণ সৰকাৰ হৰিৰ নামত চাঞ্চল্যকৰ তথ্য পোহৰলৈ আহিছে। হাথৰছৰ এই স্বঘোষিত গডমেন জন ভোলে বাবা নামেৰেই জনপ্ৰিয়। এইবাৰ তেওঁৰ বিশাল সম্পত্তিৰ সন্ধান পোৱা গৈছে। এই ভোলে বাবা কিমান টকাৰ মালিক?
নাৰায়ণ সৰকাৰ হৰি ওৰফে ভোলে বাবাৰ বিৰুদ্ধে যৌন নিৰ্যাতনৰ অভিযোগ আছে। তেওঁ ২৩ বছৰ পূৰ্বে এগৰাকী মৃত নাবালকক পুনৰ জীৱিত কৰাৰ দাবী কৰি গ্ৰেপ্তাৰ হৈছিল। এইবাৰ তেওঁৰ বাসগৃহৰ পৰা উদ্ধাৰ হৈছে কেইবাখনো নথি।
আৰক্ষী সূত্ৰৰ পৰা জানিব পৰা মতে, বুধবাৰে জব্দ কৰা নথি-পত্ৰৰ পৰা ভোলে বাবাৰ বিপুল সম্পত্তি থকাৰ প্ৰমাণ পোৱা গৈছে। উত্তৰ প্ৰদেশৰ মইনপুৰীত তেওঁৰ ১৩ একৰ মাটিত পাঁচ তাৰকাযুক্ত আশ্ৰম আছে। ইয়াৰ বজাৰ মূল্য ৪ কোটি টকা।
লগতে পঢ়কঃমোডী চৰকাৰে গঠন কৰিলে আঠখন কেবিনেট কমিটী; গুৰুত্ব বাঢ়িছে মিত্ৰ দলৰ, বিকল্প নাই!
মইনপুৰীৰ এই বিলাসী আশ্ৰমখন ২১ বিঘা মাটিত নিৰ্মাণ কৰা হৈছে। আশ্ৰমৰ কোঠাবোৰত পাঁচ তাৰকাযুক্ত হোটেলৰ সুবিধা আছে। ভোলে বাবাৰ বাবে আছে ছটা কোঠা। আন ছটা কোঠাত সমিতিৰ সদস্য আৰু স্বেচ্ছাসেৱকসকল থাকে। তেওঁলোকেই বাবাৰ সৎসংগৰ আয়োজন কৰে।
ইয়াতেই শেষ নহয়। ব্যক্তিগত কোঠাৰ উপৰিও আশ্ৰমত আছে এটা বিশাল কেফেটেৰিয়া। নাৰায়ণ সৰকাৰ হৰিৰ দাবী, তিনি-চাৰি বছৰ আগতে এই আশ্ৰমৰ মাটি উপহাৰ হিচাপে পাইছিল। নথি অনুসৰি সুৰয পল ওৰফে নাৰায়ণ সৰকাৰ হৰি বা ভোলে বাবাৰ আন একাধিক ভূমি সম্পত্তি আছে। বিদেশতো তেওঁৰ নামত আশ্ৰম আছে।
লগতে পঢ়কঃ বড়োলেণ্ড বিশ্ববিদ্যালয়ে নিৰক্ষৰ কৃষকৰ বাবে প্ৰথমবাৰ প্ৰৱৰ্তন কৰিছে এক অনন্য পাঠ্যক্ৰম
হাথৰছৰ ফুলাৰী গাঁৱৰ সৎসংগত সংঘটিত হোৱা ভয়ানক দুৰ্ঘটনাৰ বিষয়ে মুকলিকৈ কৈছে নাৰায়ণ সৰকাৰ হৰিয়ে। ভোলে বাবাই মৃতকৰ শোক প্ৰকাশ কৰি কয়, ‘মই দুৰ্ঘটনাৰ পূৰ্বেই সেই স্থান এৰি থৈ আহিছিলোঁ।’ তেওঁ দাবী কৰে যে এই দুৰ্ঘটনাৰ বাবে সমাজবিৰোধীসকলে দায়ী। ১২১ জন লোকৰ প্ৰাণ হেৰুৱা ঘটনাৰ আইনী ব্যৱস্থা গ্ৰহণ কৰিবলৈ তেওঁ উচ্চতম ন্যায়ালয়ৰ জ্যেষ্ঠ অধিবক্তা এ পি সিঙক নিযুক্ত কৰিছে।
