আজি ২৮ ডিচেম্বৰ শুকুৰবাৰে নেপালৰ ভোজপুৰ আৰক্ষীয়ে ৬জন বিহাৰী লোকক গ্ৰেপ্তাৰ কৰিছে। অভিযুক্ত লোক কেইজনে চুবুৰীয়া ৰাষ্ট্ৰখনৰ ভোজপুৰ জিলাৰ পাউৱাদুংমা ৰুৰেল মিউনিচিপালিটীৰ (Pauwadumgma Rural Municipality ) সহজ সৰল বাসিন্দাসকলৰ পৰা বহু দিনৰ পৰা কৌশলেৰে সোণৰ গহনা সৰকাই আহিছিল।
এই আটাই কেইজন লোকই বিহাৰৰ বাসিন্দা। এই লোক কেইজনে স্থানীয় নেপালী লোকসকলৰ গহনা ছাফা কৰাৰ অজুহাত দেখুৱাই তেওঁলোকৰ পৰা সোণৰ গহনা অপহৰণ কৰিছিল। অভিযুক্ত বিহাৰী লোক কেইজনৰ পৰা একুৱা ৰেজিনা নামৰ হাইড্ৰক্লৰিক এচিড আৰু নাইট্ৰিক এচিডৰ সংমিশ্ৰিত দ্ৰব্যবিধ জব্দ কৰিছে। এই অসাধু লোককেইজনে ভুক্তভোগী লোকসকলৰ সোণৰ অলংকাৰ এই দ্ৰৱত গলাই অপহৰণ কৰিছিল।
ধৃত লোক কেইজনক লবকুশ ছাহ (৩১), জিতেন্দ্ৰ ছাহ (২২), শ্ৰাৱন কুমাৰ ছাহ (১৯), ৰবীন্দ্ৰ ছাহ (২২), ৰমেশ কুমাৰ (১৮) আৰু ৰাকেশ কুমাৰ (৩৬) বুলি চিনাক্ত কৰা হৈছে। উক্ত অভিযুক্ত আটাইকেইজনেই বিহাৰৰ মোতিহাৰীৰ বাসিন্দা।
হিমালয়ান টাইমছে প্ৰকাশ কৰা এটা প্ৰতিৱেদনত কোৱা হৈছে যে উক্ত লোক কেইজনে বহু দিন ধৰি ভুক্তভোগী সকলক আচল সোণ সলনি কৰি নকল সোণ দি ঠগাই আহিছিল।
