শুনিবলৈ আচৰিত যেন লাগিলেও এয়াই সত্য। এখন অবৈধ কুকুৰা যুঁজ বন্ধ কৰিবলৈ যোৱা এগৰাকী আৰক্ষী বিষয়াক এটা যুঁজাৰু কুকুৰাই হত্যা কৰিছে।
এই দুৰ্ভাগ্যজনক তথা দুখজনক ঘটনাটো ঘটিছে ফিলিপাইনত।
আন্তঃৰাষ্ট্ৰী সংবাদ সংস্থা বিবিচি-এ ফিলিপাইনৰ সংবাদ এজেঞ্চি দ্য ফিলিপাইন নিউজ(AFP)ৰ উদ্ধৃতিৰে পৰিৱেশন কৰা বাতৰিৰ মতে দেশখনৰ নৰ্ডান প্ৰদেশত অবৈধ কুকুৰা যুঁজ বন্ধ কৰিবলৈ যাওঁতে এই দুৰ্ভাগ্যজনক ঘটনাটো সংঘটিত হয়।
উল্লেখ্য যে, ফিলিপাইনত কুকুৰা যুঁজৰ প্ৰচলন থাকিলেও কোভিড সংক্ৰমণৰ পিছৰে পৰা দেওবাৰ আৰু চৰকাৰী বন্ধত সৰ্বাধিক তিনি দিনহে কুকুৰা যুঁজ অনুষ্ঠিত কৰাৰ অনুজ্ঞাপত্ৰ প্ৰদান কৰা হৈছে।
চৰকাৰী নিয়ম তথা কোভিড প্ৰটক’ল ভংগ কৰি অনুষ্ঠিত কৰা এখন অবৈধ কুকুৰা যুঁজ বন্ধ কৰিবলৈ অভিযান চলাওঁতে ভৰিত চুৰী বন্ধা এটা যুঁজাৰু কুকুৰাই আহি হঠাতে আৰক্ষী বিষয়া ক্ৰিটিন ব’ল’কৰ উৰুৰ বাওঁফালে আঘাত কৰে।
যঁজাৰু কুকুৰাটোৱে আৰক্ষী বিষয়াজনৰ উৰুত আঘাত কৰাৰ পিছতে ৰক্তক্ষৰণ হ’বলৈ ধৰে আৰু তেওঁক চিকিৎসালয়লৈ লৈ যোৱা হয়।
চিকিৎসালয় পোৱাৰ পূৰ্বে আৰক্ষী বিষয়া ক্ৰিটিনৰ মৃত্যু হোৱা বুলি চিকিৎসকে ঘোষণা কৰে।
প্ৰভিনশ্যনেল মুখ্য আৰক্ষী বিষয়া কৰ্ণেল আৰ্ণেল এপুডে AFP নিউজ এজেঞ্চিক কয়, “অতি দুৰ্ভাগ্যজনক ঘটনা, মই এই বিষয়ে বৰ্ণনা কৰিব নোৱাৰিম।”
“যেতিয়া মোক প্ৰথমে খবৰটো দিয়া হৈছিল, মই বিশ্বাসেই কৰিব পৰা নাছিলো। মোৰ ২৫ বছৰীয়া আৰক্ষীৰ জীৱনত এনে ঘটনা প্ৰথম ঘটিছে। এটা যুঁজাৰু কুকুৰাৰ বাবে মই এজন সহযোদ্ধাক হেৰুৱালো।” কৰ্ণেল গৰাকীয়ে লগতে কয়।
মুখ্য আৰক্ষী বিষয়াজনে মৃত আৰক্ষী বিষয়া গৰাকীক গভাৰ শ্ৰদ্ধাঞ্জলি জ্ঞাপন কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে।
AFP নিউজ এজেঞ্চিৰ মতে ঘটনাৰ সন্দৰ্ভত ইতিমধ্যে ফিলিপাইন আৰক্ষীয়ে তিনিজনক লোক আৰু সাতটা যুঁজাৰু কুকুৰাক গ্ৰেপ্তাৰ কৰাৰ লগতে দুটা চুৰীৰ ছেট আৰু ৫৫০ পিলিপাইন পেচু(৮১৩ টকা) জব্দ কৰিছে।
