নগাঁও জিলাৰ পুৰণিগুদাম আৰক্ষী চকীত কিছু দিন পূৰ্বলৈ কৰ্মৰত আৰক্ষী বিভাগৰ সহকাৰী উপ পৰিদৰ্শক বাবুল বৰা (৫০)ৰ বৃহস্পতিবাৰে দেহাৱসান ঘটে।
দীৰ্ঘ দিন ধৰি শাৰীৰিক অসুস্থতাত ভূগি থকা নগাঁও জিলাৰ কৰৈয়নীৰ হেঙুলীচুকৰ নিবাসী আৰক্ষী বিষয়া বাবুল বৰা হঠাৎ গুৰুতৰভাবে অসুস্থ হৈ পৰাত তেখেতক গুৱাহাটীৰ এখন ব্যক্তিগত চিকিৎসালয়ত ভৰ্তি কৰোৱা হৈছিল যদিও বৃহস্পতিবাৰে নিশা চিকিৎসাধীন অৱস্থাতে তেখেতৰ মৃত্যু হয়।
২০১৫ চনৰ অক্টোবৰ মাহৰ পৰা পুৰণিগুদাম আৰক্ষী চকীত সহকাৰী উপ-পৰিদৰ্শক হিচাপে সততা আৰু নিষ্ঠাৰে সেৱা আগবঢ়াই অহা সহজ-সৰল আৰক্ষী বিষয়া হিচাপে পৰিচিত বাবুল বৰাক শেহতীয়াকৈ শিলঘাট আৰক্ষী চকীলৈ বদলি কৰিছিল যদিও শিলঘাট আৰক্ষী চকীত যোগদান কৰাৰ পূৰ্বেই তেখেতে শেষ নিশ্বাস ত্যাগ কৰ।
ঐতিহ্যমণ্ডিত পুৰণিগুদাম অঞ্চলত এগৰাকী আৰক্ষী বিষয়া হিচাপে বাবুল বৰাই বহু প্ৰত্যাহবানৰ সন্মুখীন হৈও বিগত দিন সমূহত সুচাৰুৰূপে দায়িত্ব পালন কৰিবলৈ সক্ষম হৈছিল।
এগৰাকী আৰক্ষী বিষয়া হিচাপে পুৰণিগুদামবাসী ৰাইজৰ মাজত অতি সমাদৰ লাভ কৰিবলৈ সক্ষম হোৱা বাবুল বৰাৰ মৃত্যুৰ খবৰ বিয়পি পৰাৰ লগে লগে সমগ্ৰ পুৰণিগুদাম অঞ্চলত শোকৰ ছাঁ পৰে।
আৰক্ষী বিষয়া বৰাৰ মৃত্যুত পুৰণিগুদাম বাপুজী ভৱন আৰু পুথিভঁৰাল, পুৰণিগুদাম আঞ্জুমান-ই-ইছলামীয়া, পুৰণিগুদাম আঞ্চলিক ছাত্ৰ সন্থা, পুৰণিগুদাম প্ৰেছ ক্লাব, চামগুৰি ইলেকট্ৰনিক মেডিয়া এছ’চিয়েচন(চেমা), অখিল ভাৰতীয় বিদ্যাৰ্থী পৰিষদৰ পুৰণিগুদাম শাখা, অসম জাতীয়তাবাদী যুৱ ছাত্ৰ পৰিষদৰ পুৰণিগুদাম আঞ্চলিক, নগাঁও জিলা আৰক্ষী-প্ৰশাসন, কলিয়াবৰ মহকুমা আৰক্ষী বিষয়া মৃন্ময় দাস, চামগুৰি আৰক্ষী থানাৰ ভাৰপ্ৰাপ্ত বিষয়া কৃষ্ণকান্ত দলে, পুৰণিগুদাম আৰক্ষীৰ পহৰা চকীৰ ভাৰপ্ৰাপ্ত আৰক্ষী বিষয়া বিৰদাও গয়াৰীৰ লগতে সমূহ আৰক্ষী, আৰক্ষী পৰিদৰ্শক সোমেশ্বৰ কোঁৱৰ, বৰ্তমানে শিলচৰত কৰ্মৰত আৰক্ষী উপ পৰিদৰ্শক ৰাজীৱ বৰ্মণ, নলবাৰীত কৰ্মৰত বংশীধৰ কুমাৰ, আমচৈত কৰ্মৰত অনিল দাস, অংগাভিনয় অসম, জুৱাৰ কলিয়াবৰ জিলা সমিতি, সংযুক্ত সাংবাদিক সংস্থা চামগুৰি, দৃষ্টি ফাউণ্ডেশ্যন, পুৰণিগুদামৰ ক্ষুদ্ৰ ব্যৱসায়ী সকল, চামগুৰি আঞ্চলিক ছাত্ৰ সন্থা, যুৱ ছাত্ৰ পৰিষদৰ চলচলী শাখাকে আদি কৰি বিভিন্ন অনুষ্ঠান-প্ৰতিষ্ঠানে গভীৰ শোক প্ৰকাশ কৰি বিদেহী আত্মাৰ সদগতি কামনা কৰাৰ লগতে শোকসন্তপ্ত পৰিয়ালবৰ্গলৈ সমবেদনা জ্ঞাপন কৰে।
উল্লেখযোগ্য যে, মৃত্যুৰ সময়ত আৰক্ষী বিষয়া বাবুল বৰাই মাতৃ, পত্নী, দুগৰাকী জীয়াৰী সহ বহু আত্মীয়-স্বজনক ইহ সংসাৰত এৰি থৈ যায়।
