ঘোচ লৈ ধৰা পৰা আতশী দত্ত তৰফদাৰৰ ঘৰত দুৰ্নীতি নিবাৰক তথা তদাৰকী শাখাৰ তালাচী

উপঢৌকন লওঁতেই হাতে-লোটে ধৰা পৰা কাছাৰ জিলা নিৰ্বাচন বিভাগৰ কাৰ্যালয়ৰ মুখ্য সহায়ক আতশী দত্ত তৰফদাৰৰ ঘৰত আজি অসম আৰক্ষীৰ দুৰ্নীতি নিবাৰক তথা তদাৰকী শাখাই তালাচী চলায়।

বৰ্তমান আৰক্ষীৰ জিম্মাত থকা ৰাজ্য চৰকাৰৰ কৰ্মচাৰীগৰাকীৰ নতুনপট্টীত থকা শান্তি আৱাসন নামৰ এপাৰ্টমেণ্টটোৰ ফ্লেটত পুৱা ৬ বজাতে দুৰ্নীতি নিবাৰক তথা তদাৰকী শাখাৰ কেইবাজনো বিষয়া উপস্থিত হৈ ৪ ঘণ্টা ধৰি তালাচী চলায়। এই প্ৰকাশ পাইছে বাতৰি বৰাক বুলেটিনত।

বৰাক বুলেটিনৰ বাতৰিটোত প্ৰকাশ পোৱা মতে, তালাচী অভিযানৰ সময়ত তৰফদাৰৰ ঘৰৰ পৰা বহুতো নথি-পত্ৰ জব্দ কৰা হৈছে।

“আমি কিছুমান নথি-পত্ৰ জব্দ কৰিছো আৰু এইবোৰ পৰীক্ষা কৰা হ’ব”, বৰাক বুলেটিনত ডি এছ পি মৌচুমী বৰাৰ ভাষ্যৰ উদ্ধৃতি। টকা-পইচা জব্দ কৰা হৈছে নেকি বুলি সংবাদ প্ৰতিষ্ঠানটোৰ সাংবাদিকৰ প্ৰশ্নত আৰক্ষী বিষয়াজনে কিবা-কিবি জব্দ কৰা বুলি জনায়। তালাচী অভিযানটো ইমান গোপনে চলোৱা হৈছিল যে এপাৰ্টমেণ্টটোৰ আন কোনো লোকে আৰক্ষী প্ৰৱেশ কৰাৰ আগ মুহূৰ্তলৈকে গম পোৱা নাছিল।

লগতে পঢ়ক  উপঢৌকন লোৱাৰ বাবে গ্ৰেপ্তাৰ নিৰ্বাচন বিভাগৰ কাৰ্যালয়ৰ মহিলা কৰ্মচাৰী

আতশী দত্ত তৰফদাৰক ২৯ মাৰ্চত ছপাশালৰ স্বত্বাধিকাৰী এজনৰ প্ৰাপ্য বিল মোকলাই দিয়াৰ চৰ্তত ঘোচ লওঁতেই অসম আৰক্ষীৰ দুৰ্নীতি নিবাৰক তথা তদাৰকী শাখাই গ্ৰেপ্তাৰ কৰিছিল।

কৰ্মচাৰীগৰাকীৰ বিৰুদ্ধে দুৰ্নীতি প্ৰতিৰোধ আইন, ১৯৮৮ৰ ধাৰা ৭(এ)ৰ অধীনত ৪/২০১৯ নম্বৰৰ এটা গোচৰ ৰুজু কৰা হৈছে।

তেওঁক অধিক জেৰাৰ বাবে আজি গুৱাহাটীলৈ অনা হৈছে বুলি এটা সূত্ৰই জানিবলৈ দিছে।