৮ নং মঙলদৈ লোকসভা সমষ্টিৰ দায়িত্বত থকা সাধাৰণ নিৰ্বাচন নিৰীক্ষকসকলে বিগত দিনত দৰং জিলাৰ বিভিন্ন দুৰ্গম অঞ্চলত থকা ভোটগ্ৰহণ কেন্দ্ৰ সমূহ পৰিদৰ্শন অব্যাহত ৰাখিছে। বিশেষকৈ চৰ অঞ্চলৰ ভোটাৰ ৰাইজ আৰু মঙলদৈ সমষ্টিৰ নিৰ্বাচনী বিষয়াসকলক আচৰিত কৰি সাধাৰণ নিৰ্বাচন নিৰীক্ষণ সমতিৰ অধিনায়ক জে এম পাথানিয়াই ক্ৰমাগত ভাবে দুৰ্গম অঞ্চলসমূহত থকা ভোটগ্ৰহণ কেন্দ্ৰসমূহৰ অৱস্থাৰ বুজ লৈছে।
হিমাচল প্ৰদেশ পৰিবহন নিগমৰ সঞ্চালক পাথানিয়াই বিগত বহু বছৰ ধৰি জেষ্ঠ চৰকাৰী বিষয়া গৈ নোপোৱা অঞ্চল সমূহ পৰিদৰ্শন কৰে। পৰিদৰ্শনৰ সময়ত হোৱা দিনজোৰা অভিজ্ঞতাত পাথানিয়াই সেই অঞ্চল সমূহলৈ যাবৰ বাবে প্ৰথমে মটৰ চাইকেল পৰৱৰ্তী সময়ত ম’হ গাড়ী আৰু ভূটভূটিত যাত্ৰা কৰিবলগীয়া হৈছে বুলি উল্লেখ কৰে।
মঙলবাৰে নিৰীক্ষকগৰাকীয়ে ৬৭ নং মঙলদৈ বিধানসভা সমষ্টিৰ গছবাৰী প্ৰাথমিক বিদ্যালয়ত থকা ২৮০, ২৮১ আৰু ২৮২ নং ভোটগ্ৰহণ কেন্দ্ৰসমূহ পৰিদৰ্শন কৰে। সেই স্থানত উপস্থিত হ’বৰ বাবে বিষয়াগৰাকীয়ে প্ৰথমে মায়ঙলৈ নিজৰ ইনোভা গাড়ীৰে আহি তাত গাড়ীখন থৈ ভূটভূটিৰে ব্ৰহ্মপুত্ৰৰ মাজেৰে যাত্ৰা কৰে।
গছবাৰী প্ৰাথমিক বিদ্যালয়ত থকা ভোটগ্ৰহণ কেন্দ্ৰটো পৰিদৰ্শন কৰি পাথানিয়াই অঞ্চলটোৰ সাধাৰণ ভোটাৰ সকলৰ লগত মত বিনিময় কৰাৰ লগতে ভোটগ্ৰহণ কেন্দ্ৰটোৰ বয়োজেষ্ঠ আৰু দিবাংগসকলৰ বাবে থাকিবলগীয়া সুকীয়া ব্যৱস্থাৰো বুজ লয়।
উল্লেখযোগ্য যে, সোমবাৰেও পাথানিয়াই চাউলখোৱা, কিৰাকাতা আৰু ধলপুৰত থকা ১৪ টা বিভিন্ন ভোটগ্ৰহণ কেন্দ্ৰ মটৰ চাইকেলত উঠি পৰিদৰ্শন কৰে।
