ৰাজ্যত আজি অনুষ্ঠিত তৃতীয় পৰ্য্যায়ৰ ভোটগ্ৰহণত গুৱাহাটী লোকসভা সমষ্টিত আনৰ লগতে ভোটাধিকাৰ সাব্যস্ত কৰিলে অসমৰ দুই জনপ্ৰিয় কন্ঠশিল্পী জুবিন গাৰ্গ আৰু অংগৰাগ পাপন মহন্তই।
বিয়লি প্ৰায় ৪ বজাত গুৱাহাটীৰ কাহিলীপাৰাস্থিত কাহিলীপাৰা দক্ষিণ গাঁও মধ্য ইংৰাজী বিদ্যালয়ৰ ভোটকেন্দ্ৰত জুবিনে তেওঁৰ পত্নী গৰিমা শইকীয়া গাৰ্গৰ সৈতে আহি ভোটদান কৰে।
জনপ্ৰিয় শিল্পীগৰাকীয়ে ভোট দিবলৈ ৰৈ থকা ভোটাৰৰ দীঘল শাৰীত থিয় নোহোৱাকৈ পোনে পোনে ভোটগ্ৰহণ কেন্দ্ৰত সোমাই ভোটাধিকাৰ সাব্যস্ত কৰি ওলাই আহে। অৱশ্যে তেওঁৰ পত্নীয়ে ভোটাৰৰ শাৰীত থিয় হৈয়ে ভোটাধিকাৰ সাব্যস্ত কৰে।
ভোটদান কৰি আহি সংবাদ মাধ্যমৰ আগত জুবিনে কয়, ‘নিৰ্বাচনৰ সময়ত কেতিয়াও অসমত থাকি নাপালো। সদায় বাহিৰত থাকো, প্ৰগেম কৰি থাকো, এইবাৰ ভোট দিবলৈ পালো, যথেষ্ট ভাল লাগিছে। সকলোৱে যাক ভাল পায় তেওঁকেই ভোট দিয়ক সেইটোৱেই বিচাৰো।‘
আনহাতে, পাপনে মহানগৰীৰ ৰাধা-গোবিন্দ বৰুৱা পথৰ এ আই ডি চিৰ কাৰ্য্যালত দিনৰ ১ মান বজাত সাধাৰণ ৰাইজৰ সৈতে শাৰীপাতি ভোটাধিকাৰ সাব্যস্ত কৰে।
নিজৰ ভোটাধিকাৰ সাব্যস্ত কৰি উৎফুল্লিত পাপনে সংবাদ মাধ্যমৰ আগত কয়, ‘ভাল লাগিল ভোটদান কৰি। আগতকৈ ভোটৰ সংখ্যা বাঢ়িছে, গতিকে এইটো ভাল গণতান্ত্ৰিক ৰাষ্ট্ৰৰ লক্ষণ হয়। মই এইটোৱেই ভাবো আমি যাক নিৰ্বাচিত কৰি পঠিয়াও তেওঁলোকে যাতে আমাক ভালদৰে প্ৰতিনিধিত্ব কৰিব পাৰে।‘
তেওঁৰ সৈতে মাতৃ অৰ্চনা মহন্ত, পত্নী স্ৱেতা মিশ্ৰ মহন্ত আৰু ভগ্নী কিংকিনী মহন্তইয়ো ভাটাধিকাৰ সাব্যস্ত কৰে।
