নিজৰ জীৱনজোৰা কষ্টৰ বিনিময়ত আৰ্জিত বৃহৎ অংকৰ ধন জাতীয় স্বাৰ্থৰ হকে হেলাৰঙে খৰচ কৰি জাতীয় দলিলস্বৰূপ এন আৰ চিৰ বাট মোকলোৱা প্ৰদীপ ভূঞা আৰু বন্তি ভূঞালৈ ২০১৮ বৰ্ষৰ ‘লাচিত বঁটা’ আগ বঢ়োৱা হৈছে। এই কথা তাই আহোম যুৱ পৰিষদৰ এখন বিজ্ঞপ্তিত প্ৰকাশ।
উল্লেখযোগ্য যে ২০১২ চনৰ পৰাই তাই আহোম যুৱ পৰিষদে বীৰ লাচিত বঁটা প্ৰদান কৰি আহিছে। প্ৰথমবছৰ এই বঁটা দিয়া হৈছিল অসমৰ প্ৰাক্তন ৰাজ্যপাল এছ কে সিনহাক। তাৰ পিছত ২০১৩ চনত মৰণোত্তৰভাৱে কাৰ্গিলৰ চহিদ জিন্তু গগৈক, ২০১৫ চনত অৰ্জুন ভোগেশ্বৰ বৰুৱা, ২০১৬ চনত পণ্ডিত হীৰেন গোহাঁই আৰু ২০১৭ চনত প্ৰতিদিন গোষ্ঠীৰ স্বত্বাধিকাৰী জয়ন্ত বৰুৱাক এই বঁটা দিয়া হৈছিল।
ভূঞা দম্পতীক অহা ২৪ নৱেম্বৰত লাচিত দিৱসৰ কাৰ্য্যসূচীত বঁটা প্ৰদান কৰিব সংগঠনটোৱে।
উল্লেখযোগ্য যে ভূঞা দম্পত্তীয়ে তেওঁলোকৰ কষ্টোপাৰ্জিত প্ৰায় ৭০ লাখ টকা এন আৰ চি উন্নীতকৰণৰ সপক্ষে উচ্চতম ন্যায়ালয়ত চলি থকা গোচৰ চলোৱাৰ খৰচ হিচাপে দান দিছিল অসম পাব্লিক ৱৰ্কছ নামৰ সংগঠনটোক।
তাই আহোম যুৱ পৰিষদৰ বিজ্ঞপ্তিটোত এই কামক জাতিৰ প্ৰতি ত্যাগ হিচাপে অভিহিত কৰা হৈছে।
ভূঞা দম্পত্তী গুৱাহাটী ফেকাল্টী স্কুলৰ প্ৰতিষ্ঠাপক।