লাইকা-দধিয়া বনাঞ্চল গাঁওৰ ১৪৮০টা পৰিয়ালৰ পুনৰ্সংস্থাপনৰ দাবীত চলি থকা প্ৰতিবাদত অংশ লোৱা কুষ্মিতা মৰাং (২৪) নামৰ মহিলাগৰাকীৰ শুকুৰবাৰে অসম চিকিৎসা মহাবিদ্যালয় হাস্পাতলত মৃত্যু ঘটিছে।
কুষ্মিতা গৰ্ভৱতী আছিল আৰু তিনিচুকীয়া উপায়ুক্তৰ কাৰ্যালয়ৰ ওচৰত তিনিচুকীয়াৰ অস্থায়ী শিৱিৰত হঠাতে স্বাস্থ্যৰ অৱনতি ঘটাৰ পাছত এক সংকটজনক অৱস্থাত তিনিদিন পূৰ্বে তেওঁক এএমচিএইচলৈ লৈ যোৱা হৈছিল।
কুষ্মিতা মৰাং দধিয়া কুলিগাওঁৰ বিষ্ণু মৰাঙৰ পত্নী আছিল।
প্ৰতিবাদকাৰীসকলে তেওঁলোকৰ দাবীসমূহ পূৰণ কৰাৰ বাবে জিলা প্ৰশাসনক হেচা দিয়াৰ উদ্দেশ্যে তিনিচুকীয়া উপায়ুক্তৰ কাৰ্যালয়ৰ ওচৰৰ লেজাইহোলা বৰগুৰিত সাহায্য শিৱিৰ স্থাপন কৰিছে।
ৰাধিকা চুংৰাং নামৰ এগৰাকী মহিলা প্ৰতিবাদকাৰীয়ে কয়,’’কুষ্মিতা যোৱা কেইবাদিনো ধৰি আমাৰ সৈতে শিৱিৰত আছিল। তেওঁ গৰ্ভৱতী আছিল আৰু হঠাতে শিৱিৰতে তেওঁৰ স্বাস্থ্যৰ অৱনতি ঘটে আৰু তেওঁক তিনিচুকীয়া অসমাৰিক হাস্পাতললৈ লৈ যোৱা হয় যদিও চিকিৎসকে তেওঁক ডিব্ৰুগড়ৰ এএমচিএইচলৈ প্ৰেৰণ কৰে। এমচিএইচত ভৰ্তি কৰাৰ সময়ত তেওঁৰ নাকেৰে তেজ ওলাই আহিছিল।‘’
তেওঁ লগতে কয়,’’আমাৰ দাবীসমূহ পূৰণ নোহোৱালৈকে আমাৰ প্ৰতিবাদ অব্যাহত থাকিব। অহা ৩১জানুৱাৰিৰ ভিতৰত চৰকাৰে যদি আমাক পুনৰ্সংস্থাপন দিব নোৱাৰে, তেতিয়াহ’লে আমি আগন্তুক বিধানসভা নিৰ্বাচন বৰ্জন কৰাৰ সিদ্ধান্ত লৈছো।‘’
ইয়াৰ পূৰ্বে ঘৰলৈ উভতি অহাৰ পাছত আন এগৰাকী প্ৰতিবাদকাৰী মহিলা ৰেৱতী পাও(৫৫)ৰ মৃত্যু হৈছিল।
১৯৫০ চনৰ ভয়ংকৰ ভূমিকম্পৰ পাছত ডিব্ৰু-ছৈখোৱা ৰাষ্ট্ৰীয় উদ্যানৰ ভিতৰত অৱস্থিত গাঁও দুখনত এই পৰিয়ালসমূহে বাস কৰি আহিছে।
খিলঞ্জীয়া মিচিং জনগোষ্ঠীৰ গাওঁবাসীৰ বেছিভাগ লোকেই ধেমাজি আৰু ডিব্ৰুগড় জিলাৰ পৰা অহা আৰু তেওঁলোকে গাওঁ দুখনত বিগত ৭০বছৰ ধৰি বসবাস কৰি আহিছে।
আনহাতে, ভাৰতৰ বন্যপ্ৰাণী সুৰক্ষা আইন,১৯৭২ৰ মতে ৰাষ্ট্ৰীয় উদ্যানৰ ভিতৰত কোনো মানুহৰ বসতি নিষিদ্ধ আৰু গাওঁ দুখনত কোনো উন্নয়নৰ কাম কৰা হোৱা নাই।
অলপতে, যোৱা ৩০ ডিচেম্বৰত মুখ্যমন্ত্ৰী সৰ্বানন্দ সোণোৱালে লাইকা-দধিয়াবাসীৰ এটা সন্তোষজনক তথা স্থায়ী সমাধান বিচাৰি উলিওৱাৰ বাবে এখন সমিতি গঠন কৰিছে। মুখ্যমন্ত্ৰীয়ে পৰিৱেশ আৰু বন তথা ৰাজহ বিভাগক এই পৰিয়ালসমূহক অহা ৩১জানুৱাৰিৰ ভিতৰত স্থায়ী সংস্থাপনৰ ব্যৱস্থা কৰিবলৈ নিৰ্দেশ দিছে।
