নৰেন্দ্ৰ মোদীক তেওঁৰ নিজৰ ক্ষেত্ৰত পৰাস্ত কৰি ক্ষমতাৰ পৰা উৎখাতৰ পৰিকল্পনাৰে কংগ্ৰেছে গুজৰাটত গুৰুত্বপূৰ্ণ পদক্ষেপ লৈছে। মঙলবাৰৰ পৰা সাবৰমতী নদীৰ পাৰত ‘ন্যায়ৰ পথ: দৃঢ়তা, আত্মসমৰ্পণ, সংগ্ৰাম’ শীৰ্ষক বিষয় অগত লৈ আৰম্ভ হ’ব কংগ্ৰেছৰ ৰাষ্ট্ৰীয় অধিৱেশন। ৰাহুল গান্ধীয়ে মোদীক হৰুৱাবলৈ তেওঁৰেই ৰণনীতি গ্ৰহণৰ ওপৰত জোৰ দিছে।
এই অধিৱেশনত এটা ডাঙৰ প্ৰশ্ন—ৱায়ানাদৰ সাংসদ প্ৰিয়ংকা গান্ধী ভাদ্ৰাক নিৰ্বাচন পৰিচালনা বিভাগৰ দায়িত্ব দিয়া হ’ব নে? তিনি বছৰ আগতে উদয়পুৰত এই বিভাগৰ সিদ্ধান্ত লোৱা হৈছিল, কিন্তু এতিয়ালৈকে কাৰ্যকৰী হোৱা নাই। প্ৰিয়ংকাৰ নেতৃত্বত ই আৰম্ভ হ’বনে, সেয়া কংগ্ৰেছ নেতাসকলৰ কৌতূহলৰ বিষয়।
ৰাহুল গান্ধীৰ মতে, ২০২৯ৰ লোকসভা নিৰ্বাচনত বিজেপিক পৰাস্ত কৰিবলৈ ২০২৭ৰ গুজৰাট বিধানসভা নিৰ্বাচনত জয়ী হোৱাটো জৰুৰী। তাৰ বাবে মোদী-শ্বাহৰ দৰে বুথ পৰ্যায়ৰ পৰা সংগঠন শক্তিশালী কৰাৰ পৰিকল্পনা কৰিছে। ভোটাৰ তালিকাক যুঁজৰ আহিলা হিচাপে ব্যৱহাৰ কৰি, বিজেপিৰ ‘পন্ন প্ৰমুখ’ আৰ্হিৰ দৰে প্ৰতিটো পৃষ্ঠাৰ দায়িত্ব এজন নেতাক দিয়া হ’ব। ৬৪ বছৰৰ পিছত গুজৰাটত হ’বলগীয়া এই অধিৱেশনত ৰাজনৈতিক ‘দবা খেল’ৰ ৰণনীতি স্থিৰ হ’ব। উল্লেখ্য যে গুজৰাটত ১৯৬১ত গান্ধী আৰু পেটেলৰ অধীনত শেষ অধিৱেশন হৈছিল।
যোৱা লোকসভাত কিছু সফলতা পোৱাৰ পিছতো মহাৰাষ্ট্ৰ আৰু হাৰিয়ানাৰ পৰাজয়ত কংগ্ৰেছৰ সংকট বাঢ়িছে। মিত্ৰজোঁটৰ চৰকাৰ গঠনৰ বাবে ১৫০-২০০ আসন জয়ৰ লক্ষ্যত ঔপনিত হ’বলৈ জিলা পৰ্যায়ত সংগঠন শক্তিশালী কৰাটো জৰুৰী। ৰাহুলে সোঁতৰ বিপৰীতে খোজ কাঢ়ি, জিলা সভাপতিসকলক ক্ষমতা দি বিকেন্দ্ৰীকৰণৰ পথ মুকলি কৰিব বিচাৰিছে। ৮৬২ জন জিলা সভাপতিৰ সৈতে বৈঠকৰ পিছত মোদীৰ ‘PM to DM’ৰ দৰে জিলা নেতৃত্বৰ মতামতক গুৰুত্ব দিয়া হ’ব।
মঙলবাৰে ১৬৯ সদস্যৰ বৈঠক আৰু বুধবাৰে ২,০০০ নেতাৰ অংশগ্ৰহণত অধিৱেশন চলিব। ৰনদীপ সুৰজেৱালাৰ নেতৃত্বত প্ৰস্তাৱ চূড়ান্ত হৈছে। গুজৰাটক লৈ বিশেষ প্ৰস্তাৱৰ সম্ভাৱনা আছে। কংগ্ৰেছ দলৰ এই নিৰ্বাচনী ৰণকৌশল কিমান দূৰ সফল হ’ব সেয়া লক্ষণীয় হ’ব।
