কাৰ্বি আংলং জিলাৰ শেহতীয়া পৰিস্থিতিক লৈ গভীৰ উদ্বেগ প্ৰকাশ কৰি আজি এক সংবাদমেল সম্বোধন কৰে ভূমি অধিকাৰ যৌথ সংগ্ৰাম সমিতিয়ে। সংবাদমেলত সমিতিৰ সদস্যসকলে চৰকাৰৰ বিৰুদ্ধে গুৰুতৰ অভিযোগ উত্থাপন কৰি কয় যে মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বাধীন চৰকাৰখনে ষষ্ঠ অনুসূচী অঞ্চলৰ স্বকীয়তা ধবংস কৰিব বিচাৰিছে।
অধিবক্তা শান্তনু বৰঠাকুৰ, আহ্বায়ক সুব্ৰত তালুকদাৰ, কৃষ্ণ গগৈ, প্ৰণৱ দলে আৰু জয়ন্ত গগৈয়ে এই সংবাদমেলত অংশগ্ৰহণ কৰি কাৰ্বি পাহাৰৰ বৰ্তমানৰ অৱস্থাৰ বাবে চৰকাৰৰ পৃষ্ঠপোষকতাত চলি থকা কৰ্প’ৰেট-হিন্দুত্ববাদৰ নেক্সাছক জগৰীয়া কৰে।
সংবাদমেলত অভিযোগ কৰা হয় যে সংবিধানৰ ষষ্ঠ অনুসূচীৰ মূল লক্ষ্য আছিল জনজাতীয় লোকৰ ভূমি, সংস্কৃতি আৰু ৰাজনৈতিক অধিকাৰ সুৰক্ষিত কৰা, য’ত ভূমি কিনা-বেচাৰ ক্ষেত্ৰত কঠোৰ বাধা আৰোপ কৰা হৈছে। কিন্তু বৰ্তমান সময়ত সামাজিক আৰু অৰ্থনৈতিকভাৱে আগবঢ়া একাংশ লোকৰ প্ৰব্ৰজনে কাৰ্বি তথা খিলঞ্জীয়া ৰাইজৰ অধিকাৰৰ প্ৰতি ভাবুকি কঢ়িয়াই আনিছে।
সমিতিয়ে অভিযোগ কৰে যে বিজেপি চৰকাৰে এনে প্ৰব্ৰজনৰ বিৰুদ্ধে ব্যৱস্থা লোৱাৰ পৰিৱৰ্তে ভোটৰ স্বাৰ্থত তেওঁলোকক সুৰক্ষাহে দিছে। মুখ্যমন্ত্ৰীয়ে গোটেই বিষয়টো আদালতৰ ওপৰত জাপি দি মিথ্যাৰ আশ্ৰয় লোৱা বুলিও তেওঁলোকে দাবী কৰে।
সমিতিয়ে উল্লেখ কৰে যে আদালতত চলি থকা গোচৰসমূহৰ নথিপত্ৰ নিৰীক্ষণ কৰিলে স্পষ্ট হয় যে চৰকাৰ বা কাৰ্বি স্বায়ত্তশাসিত পৰিষদে আদালতৰ স্থগিতাদেশ সংশোধনৰ বাবে কোনো পদক্ষেপ লোৱা নাই। পমুৱা মুছলমান এলেকাত আদালতৰ ৰায় উলংঘা কৰি উচ্ছেদ চলোৱা চৰকাৰখনে কাৰ্বি পাহাৰত গেৰুৱা পতাকা লোৱা লোকসকলৰ ক্ষেত্ৰত আদালতৰ দোহাই দি নৰম স্থিতি গ্ৰহণ কৰা বুলি সংবাদমেলত অভিযোগ কৰা হয়। ইয়াৰ উপৰি আদানী-আম্বানিৰ দৰে গোষ্ঠীক হাজাৰ বিঘা ভূমি গতাই দিব খোজা কাৰ্যক চৰকাৰৰ খিলঞ্জীয়া বিৰোধী চৰিত্ৰৰ বহিঃপ্ৰকাশ বুলি অভিহিত কৰে সমিতিয়ে।
কেৱল চৰকাৰেই নহয়, কাৰ্বি স্বায়ত্তশাসিত পৰিষদৰ মুখ্য সদস্য তুলিৰাম ৰংহাঙৰ বিৰুদ্ধেও দুৰ্নীতিৰ গুৰুতৰ অভিযোগ উত্থাপন কৰিছে ভূমি অধিকাৰ যৌথ সংগ্ৰাম সমিতিয়ে।
ৰাইজৰ উন্নয়নৰ ধনেৰে নেতাৰ পৰিয়ালে বিলাসিতা কৰা বুলি উল্লেখ কৰি সমিতিয়ে জানিবলৈ দিয়ে যে তেওঁলোক যিকোনো ধৰণৰ অমানৱীয় উচ্ছেদৰ বিৰোধী। ইয়াৰ পৰিৱৰ্তে, অবৈধভাৱে থকা লোকসকলক তেওঁলোকৰ নিজ নিজ ৰাজ্যত সন্মানসহকাৰে পুনসংস্থাপন কৰিবলৈ তেওঁলোকে কেন্দ্ৰীয় আৰু ৰাজ্য চৰকাৰক আহ্বান জনায়।
