কাইলৈ অৰ্থ্যাৎ ৪ ফেব্ৰুৱাৰিৰ পৰা ৰাজ্যৰ সমূহ প্ৰাথমিক বিদ্যালয় অচল হৈ পৰিব। কিয়নো কাইলৈ ৰাজ্যৰ ৩৯ হাজাৰ প্ৰাথমিক বিদ্যালয়ত তলা ওলমাই অচল কৰি তুলিব প্ৰাথমিক শিক্ষক সন্মিলনীয়ে। এই কথা নৰ্থ ইষ্ট নাওৰ সৈতে হোৱা বাৰ্তালাপত জানিবলৈ দিয়ে সন্মিলনীৰ ৰাজ্যিক সাধাৰণ সম্পাদক ৰাতুল চন্দ্ৰ গোস্বামীয়ে।
উল্লেখ্য যে, যোৱা ১১ জানুৱাৰিৰ দিনা প্ৰাথমিক বিদ্যালয়ৰ শিক্ষকসকলৰ দাবীসমূহ পূৰণ কৰাৰ দাবীৰে মহানগৰীৰ লখৰাত সমবেত হৈছিল হাজাৰ হাজাৰ প্ৰাথমিক বিদ্যালয়ৰ শিক্ষক। উক্ত সমাবেশতে ৪,৫ আৰু ৬ ফেব্ৰুৱাৰিত অসহযোগ কাৰ্য্যসূচী ৰূপায়ণ কৰা হ’ব বুলি চৰকাৰক সকীয়াই দিছিল সাধাৰণ সম্পাদকজনে।
দাবী পূৰণ কৰিবৰ বাবে চৰকাৰক দিয়া সকিয়নীৰ পাছতো কোনোধৰণৰ আলোচনাৰ বাবে সংশ্লিষ্ট কৰ্তৃপক্ষই আগ্ৰহ প্ৰকাশ নকৰাত তিনিদিনীয়া অসহযোগ কাৰ্য্যসূচীৰ বাবে ইতিমধ্যে সাজু হৈ উঠিছে বুলি সাধাৰণ সম্পাদক ৰাতুল গোস্বামীয়ে জানিব দিয়ে।
সন্মিলনীয়ে প্ৰাথমিক বিদ্যালয়ত প্ৰধান শিক্ষকৰ পদ সৃষ্টি কৰি সপ্তম দৰমহা আয়োগে নিৰ্ধাৰণ কৰা গ্ৰেড পে’ আদায় দিয়া, প্ৰাথমিক বিদ্যালয়ত কৰ্মৰত সকলো প্ৰশিক্ষণপ্ৰাপ্ত স্নাতক শিক্ষকৰ পদ হ্ৰাস কৰি কাঢ়ি নিয়া, ৮৭০০ টকাৰ গ্ৰেড পে’ ঘূৰাই দিয়া, সাময়িক পদোন্নতিৰ মান্যতা বাহাল ৰখা, অপ্ৰাদেশীকৃত প্ৰাথমিক বিদ্যালয়সমূহ প্ৰাদেশিকীকৰণ কৰা, ঠিকাভিত্তিক শিক্ষকৰ চাকৰি নিয়মীয়াকৰণ কৰা আদি দাবীসমূহ পুনৰ উত্থাপন কৰিছে।
তদুপৰি, কৰ্মৰত সকলো ঠিকাভিত্তিক শিক্ষকক নিয়মীয়া কৰা, চাকৰিৰ নিৰাপত্তা সুনিশ্চিত কৰা, পাবলৈ বাকী থকা বকেয়া ধন আদায় দিয়া, নতুন পেঞ্চন নীতি বাতিল কৰি পুৰণি পেঞ্চন নীতি বাহাল ৰখা, অপ্ৰাদেশীকৃত বিদ্যালয়সমূহ শীঘ্ৰে প্ৰাদেশিকীকৰণ কৰা আদিকে ধৰি মুঠ ১২ দফীয়া দাবীৰে সন্মিলনীয়ে এই অসহযোগ কাৰ্য্যসূচী ৰূপায়ণ কৰিব।
অৱশ্যে, চলি থকা বিধানসভাৰ বাজেট অধিবেশনত তেওঁলোকৰ দাবীসমূহ পূৰণ কৰাৰ ক্ষেত্ৰত চৰকাৰখনে এক ইতিবাচক ভূমিকা ল’ব বুলি আশা প্ৰকাশ কৰে সন্মিলনীৰ সাধাৰণ সম্পাদক গোস্বামীয়ে।
