একেলগে মহেন্দ্ৰ সিং ধোনী আৰু বিৰাট কোহলিৰ অনন্য অভিলেখ ভংগ কৰিলে ভাৰতৰ তৰুণ ক্ৰিকেটাৰ পৃথ্বী শ্ব’ই।
বিজয় হাজাৰে ট্ৰফীৰ কোৱাৰ্টাৰ ফাইনেলত সৌৰাষ্ট্ৰৰ বিৰুদ্ধে ১২৩ টা বলত অপৰাজিত ১৮৫ৰাণৰ ইনিংছ খেলি মুম্বাইৰ তৰুণ অ’পেনাৰ গৰাকীয়ে এইদৰে অভিলেখ গঢ়ে।
ৰাণ অনুসৰণ কৰি খেলপথাৰত নামি ভাৰতীয় বেটছমেনসকলৰ মাজত আটাইতকৈ অধিক ৰাণৰ ইনিংছ খেলাৰ অভিলেখ গঢ়ে শ্ব’ই। এইক্ষেত্ৰত দুগৰাকী ভাৰতীয় অধিনায়কৰ অভিলেখ ভংগ কৰিছে পৃথ্বীয়ে।
২০০৫চনত জয়পুৰত শ্ৰীলংকাৰ বিৰুদ্ধে ৰাণ অনুসৰণ কৰি খেলিবলৈ নামি ধোনায়ে অপৰাজিত ১৮৩ৰাণৰ ইনিংছ খেলিছিল।
সেইদৰে ২০১২চনত ঢাকাত এছিয়া কাপৰ খেলত পাকিস্তানৰ বিৰুদ্ধে দ্বিতীয় ইনিংছত ১৮৩ৰাণ কৰি কোহলিয়ে ভাৰতক জয়ী কৰিছিল।
এই সূত্ৰে ৰাণ অনুসৰণ কৰি ভাৰতীয় ক্ৰিকেটাৰসকলৰ ভিতৰত অধিক ৰাণ কৰাৰ অভিলেখৰ ক্ষেত্ৰত ধোনী আৰু কোহলিক অতিক্ৰম কৰিলে পৃথ্বী শ্ব’ই।
পালামত অনুষ্ঠিত কোৱাৰ্টাৰ ফাইনেল খেলখনত মুম্বাইৰ বিৰুদ্ধে প্ৰথম বেট ধৰি সৌৰাষ্ট্ৰই ৫০ অভাৰত ৫টা উইকেট হেৰুৱাই ২৮৪ৰাণ কৰে।
প্ৰত্যুত্তৰত মুম্বাইয়ে ৪১.৫অভাৰত এটা উইকেট হেৰুৱাই ২৮৫ৰাণ কৰি খেলখনত বিজয় সাৱ্যস্ত কৰে।
পৃথ্বী শ্ব’ৰ ১২৩ টা বলত কৰা অপৰাজিত ১৮৫ৰাণৰ ইনিংছটোত আছিল ২১টা চাৰি আৰু ৭টা ছয়। পৃথ্বীয়ে ২৯ বলতে অৰ্দ্ধশতক সম্পূৰ্ণ কৰে। তাৰপাছত ৬৭টা বলত শতৰাণৰ সীমা অতিক্ৰম কৰে।
মুম্বাইৰ অধিনায়কগৰাকীয়ে ১৫০ৰাণ সম্পূৰ্ণ কৰাৰ বাবে খেলে মাত্ৰ ১০০টা বল।