এখন সংবাদমেলত কংগ্ৰেছ নেত্ৰী প্ৰিয়ংকা গান্ধীয়ে দাবী কৰিলে যে মহিলা সংৰক্ষণ বিধেয়কৰ আঁৰত লোকসভাত আসন বৃদ্ধিৰ বাবে কেন্দ্ৰই ‘ষড়যন্ত্ৰ’ কৰিছিল, যিটো প্ৰতিৰোধ কৰিব পৰা গ’ল। তেওঁ লগতে এন ডি এ চৰকাৰে প্ৰথমবাৰৰ বাবে বিপৰ্যয়ৰ সন্মুখীন হোৱা বুলিও কয়। সেইবাবেই তেওঁলোকে এই দিনটোক ‘ক’লা দিন’ বুলি অভিহিত কৰিছে।
শনিবাৰে প্ৰিয়ংকাই চৰকাৰক প্ৰত্যাহ্বান জনাই কয়, “২০২৩ চনত সৰ্বসন্মতিক্ৰমে গৃহীত হোৱা মহিলা সংৰক্ষণ সম্পৰ্কীয় বিধেয়কখন সোমবাৰে তৎক্ষণাত কাৰ্যকৰী হ’ব লাগে। আমি সকলোৱে ইয়াক সমৰ্থন কৰিম।”
সংবিধান সংশোধন কৰা মহিলা সংৰক্ষণ সংশোধনী বিধেয়কখন সংসদলৈ আনি ভোটদানত সন্মিলিত বিৰোধী মিত্ৰজোঁটৰ হাতত পৰাস্ত হৈছে নৰেন্দ্ৰ মোডী চৰকাৰ। ১২ বছৰৰ পাছত প্ৰথমবাৰৰ বাবে এন ডি এ মিত্ৰজোঁটে এই বিপৰ্যয়ৰ সন্মুখীন হৈছে। বিৰোধী ইণ্ডিয়া শিবিৰে ইয়াক বৃহৎ জয় হিচাপে প্ৰচাৰ আৰম্ভ কৰিছে।
শনিবাৰে তেওঁলোকে এখন বৈঠকত বহি পৰৱৰ্তী কৌশলৰ বিষয়ে আলোচনা কৰে। বৈঠকৰ অন্তত প্ৰিয়ংকা গান্ধীয়ে কয়, “কালিৰ ঘটনাটো গণতন্ত্ৰৰ বাবে এক ডাঙৰ জয়। চৰকাৰে গণতন্ত্ৰক দুৰ্বল কৰাৰ ষড়যন্ত্ৰ কৰিছিল। ইয়াক ৰুদ্ধ কৰি দিয়া হ’ল। বিৰোধীৰ ঐক্যই জয়লাভ কৰিছে। ক্ষমতাত থাকিবলৈ ষড়যন্ত্ৰ কৰিছে। মহিলাসকলক ব্যৱহাৰ কৰিছে। কিন্তু মহিলাৰসকলৰ ‘মচীহা’ হোৱাটো ইমান সহজ নহয়। সমগ্ৰ দেশে দেখিছে বিৰোধীসকল একত্ৰিত হ’লে বিজেপি শাসিত এন ডি এক পৰাজিত কৰিব পাৰি।”
প্ৰিয়ংকাই দাবী কৰে যে বিৰোধী মিত্ৰজোঁটে বিজেপিৰ এই ষড়যন্ত্ৰৰ বিষয়ে আগতীয়াকৈ জানিছিল। বিজেপি মিত্ৰজোঁটে বিধেয়কখন গৃহীত হ’লে ভাল হ’ব বুলি আৰু গৃহীত নহ’লে বিৰোধীক মহিলা বিৰোধী বুলি অভিহিত কৰিব পৰা যাব বুলি ভাবিছিল। কিন্তু তেওঁ দাবী কৰে যে মহিলাসকল এতিয়া ইমান মূৰ্খ নহয়। ভুলকৈ উপস্থাপন কৰি কোনো লাভ নহ’ব।
বিৰোধীয়ে দাবী কৰিছে যে ২০২৩ চনত লোকসভা আৰু ৰাজ্যসভাত ‘নাৰি শক্তি বন্দন অধিনিয়ম’ বিধেয়কখন গৃহীত হৈছিল। এই বিধেয়কখনত লোকপিয়লৰ পিছত আসন পুনৰ নিৰ্দ্ধাৰণ কৰা হ’ব বুলি উল্লেখ কৰা হৈছিল। তেতিয়া সেই আসনৰ এক তৃতীয়াংশ মহিলাৰ বাবে সংৰক্ষিত হ’ব। কিন্তু লোকপিয়লৰ বাবে অপেক্ষা নকৰাকৈয়ে লোকসভাৰ আসন বৃদ্ধিৰ সৈতে মহিলাৰ সংৰক্ষণক লগ লগাই দিয়া হৈছে।
প্ৰিয়ংকাই দাবী কৰে যে বিজেপিয়ে ভাবিছিল যে এতিয়া সমষ্টিৰ পুনৰ নিৰ্ধাৰণ নকৰিলে ২০২৯ চনৰ আগতে আৰু সেয়া নহ’ব।বিজেপি চৰকাৰে ক্ষমতাত থাকিবলৈ এই ষড়যন্ত্ৰ কৰিছে।
