অসম পৰ্যটনৰ এম্বেছাদৰ বলীউদৰ জনপ্ৰিয় নায়িকা প্ৰিয়ংকা চোপ্ৰা আৰু আমেৰিকান অভিনেতা-কণ্ঠশিল্পী নিক জোনাছৰ প্ৰথম মিলিত হোৱাৰ দেওবাৰে এবছৰ পূৰ্ণ হয়। এই সন্দৰ্ভত নিকে লিখিছে যে এয়া তেওঁৰ পত্নীৰ বাবে বিশেষ দিন আছিল বুলি তেওঁ নিশ্চিত।
ইনষ্টাগ্ৰামত প্ৰয়ংকাৰ বাবে লিখা এক আৱেগিক প’ষ্ট লিখিছে নিকে। যোৱা ডিচেম্বৰত প্ৰিয়ংকাৰ সৈতে নিকৰ বিবাহ সম্পন্ন হৈছিল।
‘’এবছৰ পূৰ্বে আজিৰ দিনটোতে, মই এদল বন্ধুৰ সৈতে হলীউদৰ আকৰ্ষণীয় ‘বিউটি এণ্ড বিষ্ট’ চাবলৈ গৈছিলো। সেই বন্ধুসকলৰ এগৰাকী আছিল মহিলা যি মোৰ বেষ্ট ফ্ৰেণ্ড, মোৰ ঘনিষ্ঠ, মোৰ সপোন কুঁৱৰী, মোৰ সুন্দৰী পত্নী হৈ পৰিল।‘’
নিকে লগতে লিখিছে,‘’ প্ৰতিদিনে তুমি মোৰ মুখত হাঁহি বিৰিঙাইছা আৰু মোক শ্ৰেষ্ঠ পুৰুষজন হ’বলৈ অনুপ্ৰাণিত কৰিছা। মই তোমাৰ স্বামী হ’বলৈ পাই গৌৰৱান্বিত। মই তোমাক ভাল পাওঁ।‘’
নিকে লগতে প্ৰিয়ংকাৰ এগৰাকী প্ৰিয় বিখ্যাত কণ্ঠশিল্পী মেৰিয়াহ ক্যাৰেৰ সৈতে এটা সাক্ষাতৰ আয়োজন কৰি বিশেষ দিনটোত পত্নীক আচৰিত কৰি তোলে।
প্ৰিয়ংকায়ো স্বামী নিকক ‘’এগৰাকী শ্ৰেষ্ঠ স্বামী’’ বুলি অভিহিত কৰিছে। প্ৰিয়ংকাই লিখিছে, ‘’ এটা মনত পুহি ৰখা সপোন পূৰণ হ’ল… আনকি তেওঁ ব্যস্ত হৈ থকাৰ মাজতে তথা আমি আঁতৰি থকা সত্ত্বেও তেওঁ মোৰ প্ৰিয় মাৰিয়াহ ক্যাৰেৰ সৈতে আমাৰ এবছৰীয়া সম্পৰ্কৰ উদযাপন নিশ্চিত কৰিছিল… এবছৰীয়া প্ৰেমৰ শুভেচ্ছা থাকিল!’’
আবেগ বিধূৰ হৈ পৰা প্ৰিয়ংকাই ক্যাৰেৰ সৈতে এখন ফটোও শ্বেয়াৰ কৰিছে। প্ৰিয়ংকাই লিখিছে, ‘’আপোনাৰ সৈতে সাক্ষাৎ অত্যন্ত মধুৰ আৰু আপোনাৰ প্ৰদৰ্শনৰ বাবে ধন্যবাদ।‘’
উল্লেখযোগ্য নিক আৰু প্ৰিয়ংকাই দুমাহ প্ৰেমৰ অন্তত ২০১৮ চনৰ জুলাই মাহত বিবাহৰ বাবে সিদ্ধান্ত লৈছিল। তেওঁলোকে যোৱা ডিচেম্বৰত ভাৰতত তিনিদিনীয়া এক বিবাহ উৎসৱত যুগ্ম জীৱনৰ পাতনি মেলে।
