নাগৰিকত্ব (সংশোধন) আইনৰ বিৰুদ্ধে ৰাজ্যত আন্দোলন অব্যাহত আছে। পহিলা মাঘৰ দিনাখনে শিৱসাগৰৰ ডিমৌমুখত দুই সহস্ৰাধিক জনতাৰ উপস্থিতিত ‘জাতি গৰ্জন’ শীৰ্ষক প্ৰতিবাদী কাৰ্য্যসূচী অনুষ্ঠিত কৰা হয়।
প্ৰতিবাদী কাৰ্য্যসূচীত অংশগ্ৰহণ কৰি দুই সহস্ৰাধিক লোকে সমস্বৰে ‘কা’ আমি নামানো বুলি চৰকাৰলৈ স্পষ্ট বাৰ্তা প্ৰেৰণ কৰে।
আজি সদৌ মৰিয়া ছাত্ৰ সন্থাৰ কেন্দ্ৰীয় সমিতিৰ আহ্বানত অনুষ্ঠিত হোৱা ‘জাতি গৰ্জন’ শীৰ্ষক প্ৰতিবাদী কাৰ্যসূচীত অংশ গ্ৰহণ কৰি বিশিষ্ট নিৱন্ধকাৰ চামচুল বাৰিকে কয়, ‘‘কেন্দ্ৰীয় চৰকাৰ আৰু ৰাজ্য চৰকাৰ খনে বৰ্তমান দেশ আৰু ৰাজ্যত আধুনিক হিটলাৰী শাসন চলাইছে। উচ্চতম ন্যায়ালয়ত C(A)A সন্দৰ্ভত আবেদনৰ শুনানি হৈ থকাৰ সময়তে কেন্দ্ৰীয় চৰকাৰে আইনখন ৰাজপত্ৰিত অধিসূচনা জাৰি কৰি ততাতয়াকৈ বলবৎ কৰাটোৱে চৰকাৰৰ ফেচিবাদী স্বৰূপ উদঙাই দিছে।’’
আনহাতে, জনপ্ৰিয় কণ্ঠশিল্পী মহেন্দ্ৰ হাজৰিকাই প্ৰতিবাদী কাৰ্যসূচীত উপস্থিত থাকি সৰ্বানন্দ সোণোৱাল নেতৃত্বাধীন ৰাজ্য চৰকাৰক তীব্ৰ সমালোচনা কৰে।
হাজৰিকাই ঐতিহাসিক অসম আন্দোলনৰ কথা সোঁৱৰণ কৰি ৮৫৫ জন চহিদৰ চৰম ত্যাগক ভেঙুচালি কৰি সৰ্বানন্দ সোণোৱালে বিদেশীক স্বদেশী কৰিব বিচৰাটো দূৰ্ভাগ্যজনক আখ্যা দিয়ে।
প্ৰতিবাদী কাৰ্যসূচীত মহেন্দ্ৰ হাজৰিকাই ‘‘শাসন কৰাৰ চলেৰে শোষণ কৰিছ কিয় তহঁতে’’ শীৰ্ষক গীতটোকে ধৰি কেইবাটাও সংগ্ৰামী গীত পৰিৱেশন কৰে।
অসমৰ অন্য এগৰাকী জনপ্ৰিয় কণ্ঠশিল্পী দেৱজিৎ বৰাইও ‘জাতি গৰ্জন’ কাৰ্যসূচীত অংশ লৈ চৰকাৰৰ সিদ্ধান্তই অসমৰ ভাষা, সংস্কৃতি আৰু সভ্যতাৰ ওপৰত বিৰূপ প্ৰভাৱ পেলাৱ বুলি কয়।
আনহাতে, শিৱসাগৰ জিলা ছাত্ৰ সন্থাৰ সাধাৰণ সম্পাদক সমীৰণ ফুকনে ঐতিহাসিক অসম চুক্তিক নস্যাৎ কৰি বিজেপি চৰকাৰে অসমত ধৰ্মৰ নামত হিন্দু, খ্ৰীষ্টান, বৌদ্ধ, জৈন, শিখ ধৰ্মালম্বী এই পাঁচটা ধৰ্মৰ লোকক সংস্থাপিত কৰিব বিচৰা কাৰ্যক আছুৱে কোনো পধ্যেই মানি নলয় বুলি কয়।
বিদেশী চিনাক্তকৰণ আৰু বিতাৰণ প্ৰক্ৰিয়া অসম চুক্তিৰ মৰ্মেই হ’ব লাগিব বুলি আছু নেতা গৰাকীয়ে দাবী কৰি ‘কা’ বিৰোধী আন্দোলনত অংশ লোৱা কেইবাজনো সংগ্ৰামীক চৰকাৰে জঘন্য আইন প্ৰয়োগ কৰি গ্ৰেপ্তাৰ কৰা কাৰ্যক ধিক্কাৰ দিয়ে।
প্ৰতিবাদত অংশ লৈ বীৰ লাচিত সেনাৰ নেতা চিতু বৰুৱাই ‘কা’ বিৰোধী আন্দোলনক দমন কৰিবলৈ চৰকাৰে যিমানেই নিৰ্যাতন চলাবলৈ চেষ্টা নকৰক কিয় অসমৰ ৰাইজে আন্দোলন বন্ধ নকৰে বুলি উল্লেখ কৰে।
‘‘অসমীয়া জাতিয়ে ১৭ বাৰ আক্ৰমণৰ সন্মুখীন হৈয়ো মোগলৰ ওচৰত বশ্যতা স্বীকাৰ নকৰিলে এতিয়া জাতি ৰক্ষাৰ বাবে আমি বিদেশীৰ লগত যুঁজিবলৈ প্ৰস্তুত,’’ চিতু বৰুৱাৰ মন্তব্য।
আজিৰ এই প্ৰতিবাদী কাৰ্যসূচীত অৱসৰপ্ৰাপ্ত অধ্যাপক সুৰেশ চেতিয়া, অসম আন্দোলনৰ নেতা ৰূপম কাকতি, প্ৰাক্তন বিজেপি নেতা জয়ন্ত ৰাজকোঁৱৰ, সাংবাদিক অনন্ত স্মিথ, ফিৰোজ খান, বামপন্থী নেতা কনক গগৈ, সংগ্ৰামী যুৱ ছাত্ৰ পৰিষদৰ দেৱজিত দত্ত, ঐক্য সেনাৰ ফৰিদ ইছলাম হাজৰিকা, জিন্তু মেছ, অনুসুচিত জাতি ছাত্ৰ সন্থাৰ পৰশ জ্যোতি দাসে আদিকে ধরি বহু কেইটা দল-সংগঠনৰ নেতৃবৰ্গ উপস্থিত থাকি ব্যক্তব্য দাঙি ধৰে।
ইয়াৰ পূৰ্বে ‘কা’ বিৰোধী সংগ্ৰামত চহিদ হোৱা পাঁচগৰাকী চহিদৰ প্ৰতিচ্ছৱিত শ্ৰদ্ধাঞ্জলি জ্ঞাপন কৰা হয়।
