বগীবিল দলং উদ্বোধনলৈ মাজত মাত্ৰ দুদিনমান বাকী থকা সময়তে উত্তৰপাৰৰ কাৰেংচাপৰি ৰে’ল বিভাগৰ কাৰ্যালয়ত ক্ষতিপূৰণৰ দাবীত ভুক্তভোগীয়ে চলাইছে উত্তাল প্ৰতিবাদ। বগীবিল দলঙৰ উত্তৰপাৰে ডাম্বোকত ২০০৭ চনতে ৰে’ল বিভাগে অধিগ্ৰহণ কৰা ১৪০ বিঘা ভূমিৰ ক্ষতিপূৰণ আদায়ৰ নামত চৰম গাফিলতি কৰাৰ বিৰুদ্ধে ক্ষতিগ্ৰস্ত ৰাইজে প্ৰতিবাদ অব্যাহত ৰাখিছে।
আনহাতে, বৃহস্পতিবাৰে দুপৰীয়া ৰে’ল বিভাগৰ বিষয়া-কৰ্মচাৰীক প্ৰৱেশদ্বাৰতেই বাধা প্ৰদান কৰে ক্ষতিগ্ৰস্ত প্ৰতিবাদী ৰাইজে। দুই শতাধিক লোকে বেনাৰ-ফেষ্টুন লৈ ‘টি এম পি কে জিন্দাবাদ, ভূমি ক্ষতিগ্ৰস্তক ভূমিৰ ক্ষতিপূৰণ আদায় দিয়ক, ক্ষতিপূৰণৰ নামত অন্যায় বন্ধ কৰক, ৰে’ল বিভাগ মুৰ্দাবাদ, অসম চৰকাৰ হুঁচিয়াৰ, জিলা প্ৰশাসন মুৰ্দাবাদ, আদি শ্ল’গান দি পৰিৱেশ উত্তাল কৰি তোলে।
ইপিনে, সময়তে চিচিবৰগাঁও ৰাজহ চক্ৰৰ চক্ৰ বিষয়া অৰুন্ধতী মিপুন আৰু বগীবিল দলং প্ৰকল্পৰ নিৰ্মাণ শাখাৰ উপ-মুখ্য অভিযন্তা ধৰ্মানন্দ দাস উপস্থিত হৈ প্ৰতিবাদী ৰাইজক বুজনি দিয়ে যদিও প্ৰতিবাদকাৰীসকলে ক্ষতিপূৰণ আদায় নিদিয়ালৈকে আন্দোলন অব্যাহত ৰখাৰ কথা স্পষ্ট কৰি দিয়ে।
তদুপৰি, বিষয়টো সন্দৰ্ভত আলোচনাৰ বাবে উপস্থিত হোৱা ৰে’ল বিভাগৰ বিষয়াই প্ৰতিবাদকাৰী ৰাইজৰ নেতৃত্ব বহন কৰাসকলৰ সৈতে ৰে’লৰ শীৰ্ষ বিষয়াৰ টেলিফোনিক বাৰ্তালাপ কৰায় যদিও কোনো সমাধান সূত্ৰ নোলাল। প্ৰতিবাদকাৰীসকলে ক্ষতিপূৰণ আদায়ৰ লিখিত প্ৰতিশ্ৰুতি অবিহনে আন্দোলন বন্ধ নকৰে বুলি জনাই দিয়ে।
আনহাতে, বিগত এঘাৰটা বছৰে ক্ষতিপূৰণৰ নামত ফুটাকড়ি এটাও লাভ নকৰা ক্ষতিগ্ৰস্তই অহা ২৫ ডিচেম্বৰৰ প্ৰধানমন্ত্ৰীয়ে উদ্বোধন কৰিবলগীয়া বগীবিল দলং উদ্বোধনী অনুষ্ঠানৰ সময়তো প্ৰতিবাদী কাৰ্যসূচী ৰূপায়ণৰ হুংকাৰ দিছে। পৰিতাপৰ বিষয় যে দলঙৰ নামত নিজৰ পৈতৃক সম্পত্তি মাটি দান কৰা এই নি:স্ব গাওঁবাসীৰ প্ৰতি চৰকাৰ কেতিয়া সদয় হ’ব?