বিজেপি মিত্ৰজোঁট চৰকাৰৰ ৰাজধানী দিছপুৰৰ বাহিৰত দ্বিতীয়খন কেবিনেট বৈঠক নামনি অসমৰ অন্যতম ব্যস্ততাপূৰ্ণ চহৰ বঙাইগাঁৱত অনুষ্ঠিত হয়৷ এই উপলক্ষে কেবিনেট বৈঠকৰ লগতে কেবাটাও কাৰ্যসূচী লৈ অসমৰ মুখ্যমন্ত্ৰী ড°হিমন্ত বিশ্ব শৰ্মাই কালি পুৱাৰ ভাগতে বঙাইগাঁৱত উপস্থিত হৈছিল৷
বঙাইগাঁও জিলা উপায়ুক্তৰ সভাকক্ষত কেবিনেট বৈঠকত মন্ত্ৰী চন্দ্ৰমোহন পাটোৱাৰী,বিমল বড়া, কেশৱ মহন্ত, অতুল বৰা, ৰণোজ পেগু,পৰিমল শুক্লবৈদ্য, অজন্তা নেওগ,যোগেন মহন, সঞ্জয় কিষাণ , উৰ্খাও গোৰা ব্ৰহ্ম, পীযুষ হাজৰিকাকে ধৰি অশোক সিংঘলক বাদ দি সকলো মন্ত্ৰী উপস্থিত থাকে।
মুখ্যমন্ত্ৰীগৰাকীয়ে বঙাইগাঁও চহৰৰ মাজমজিয়াত বৰবজাৰৰ ওচৰত ছয়মহলীয়া চিলাৰায় মাৰ্কেটৰ আধাৰশিলা স্থাপন কৰে। উক্ত অনুষ্ঠানত জলসম্পদ,তথ্য আৰু জনসংযোগ তথা সংসদীয় পৰিক্ৰমা বিভাগৰ মন্ত্ৰী পিযুষ হাজৰিকাও উপস্থিত থাকে।বঙাইগাঁও পৌৰসভাৰ দ্বাৰা নগৰ আন্তঃগাঁথনি উন্নয়ন পুঁজিৰ অধীনত ১৬.৬৭ কোটি টকা ব্যয় সাপেক্ষে এই চিলাৰায় মাৰ্কেট কমপ্লেক্স নিৰ্মাণ কৰা হ’ব।
ইয়াৰ পিছতে মুখ্যমন্ত্ৰী ড: হিমন্ত বিশ্ব শৰ্মাই বীৰঝৰা ছোৱালী উচ্চতৰ মাধ্যমিক বিদ্যালয় আৰু বীৰঝৰা ছোৱালী উচ্চতৰ মাধ্যমিক বিদ্যালয় পৰিদৰ্শন কৰে।দেউৰীপাৰাত প্ৰধানমন্ত্ৰী মৎস সম্পদা যোজনাৰ অধীনত কম খৰচতে মীন পালন কৰি জীৱিকা নিৰ্বাহ কৰাৰ সহায়ক হোৱাকৈ ৫টা আত্ম-সহায়ক গোটক মাছ কঢ়িওৱা ৫খন বৰফ বাকচযুক্ত ভেনগাড়ী প্ৰদান কৰা হয় আৰু লগতে ৰাধা-কৃষ্ণ আত্ম-সহায়ক গোটক আবন্টন দিয়া চাৰিটা মাছ পালনৰ টেংক উদ্বোধন কৰে।
বিয়লিৰ ভাগত মুখ্যমন্ত্ৰীগৰাকীয়ে চিলাৰায় উৰণীয়াসেঁতুৰ মূৰতে পঞ্চদশ বিত্তীয় আয়োগৰ অধীনত নিৰ্মাণ কৰা ৩৯লাখ টকা ব্যয় সাপেক্ষ ক্লক টাৱাৰ উদ্বোধন কৰে। ভাৰত চৰকাৰৰ এচ চি এচ পি আঁচনিৰ অধীনত বঙাইগাঁও পৰিৱেশ উদ্যানত সমৃদ্ধি প্ৰকল্পৰ অধীনত গুৱাহাটী বিশ্ববিদ্যালয়ৰ প্ৰাণী বিজ্ঞান বিভাগৰ একুৱাকালচাৰ আৰু জৈৱ বৈচিত্ৰ কেন্দ্ৰ,আই চি এ আৰ-এন বি এফ জি আৰ আৰু বঙাইগাঁও জিলা প্ৰশাসনে যুটীয়াভাৱে ৰূপায়ণ কৰা পাব্লিক একুৱাৰিয়ামো উদ্বোধন কৰে মুখ্যমন্ত্ৰী ড:হিমন্ত বিশ্ব শৰ্মাই।
ইয়াত আলংকাৰিক মাছ উৎপাদন আৰু পালন কৰাৰ ব্যৱস্থা আছে।প্ৰায় ৪৩লাখ টকা ব্যয় হৈছে এই পাব্লিক একুৱাৰিয়াম নিৰ্মাণ কৰোতে।
৬২টা ডাঙৰ একুৱাৰিয়াম আছে এই পাব্লিক একুৱাৰিয়াম চৌহদত আৰু ইয়াত থলুৱা প্ৰজাতিৰ আলংকাৰিক মাছৰ লগতে বাহিৰৰ পৰা আমদানিকৃত আলংকাৰিক মাছো ৰখা হৈছে।
এই পাব্লিক একুৱাৰিয়াম চাবলৈ টিকট দিয়াৰ ব্যৱস্থা আছে যাতে ইয়াৰ লগত জড়িত নিৰ্বাচিত হিতাধিকাৰীসকলে জীৱিকা অৰ্জন কৰিব পাৰে।বাহিৰৰ পৰা আমদানিকৃত আলংকাৰিক মাছসমূহৰ উৎপাদন আৰু ব্যৱসায়ৰ জৰিয়তেও হিতাধিকাৰীসকলে উপাৰ্জন কৰিব পাৰিব।
ইতিমধ্যে ২০গৰাকী মহিলা হিতাধিকাৰীক পাব্লিক একুৱাৰিয়ামত আলংকাৰিক মাছ পালন আৰু উৎপাদনৰ বাবে বাচনি কৰা হৈছে আৰু প্ৰকল্পটি তেওঁলোকক চমজাই দিয়া হ’ব।
পাব্লিক একুৱাৰিয়ামৰ কাৰিকৰী দিশটো চাবলৈ এজন প্ৰশিক্ষণপ্ৰাপ্ত লোক নিয়োগ কৰা হৈছে আৰু তেওঁ হিতাধিকাৰীসকলক প্ৰশিক্ষণ দিব। উক্ত অনুষ্ঠানত মীন বিভাগৰ মন্ত্ৰী পৰিমল শুক্লবৈদ্যও উপস্থিত থাকে ৷