বিগত ১০ বছৰত চৰকাৰী বেংকে পুঁজিপতিক ৰেহাই দিলে ১২ লাখ কোটি টকাৰ ঋণ! সংসদত কেন্দ্ৰই প্ৰকাশ কৰিলে তথ্য
বিগত ১০ বছৰত ১২ লাখ কোটি টকাৰো অধিক ঋণ ৰেহাই কৰিছে চৰকাৰী বেংকে সামূহে। কেন্দ্ৰীয় বিত্ত মন্ত্ৰালয়ে সংসদত প্ৰকাশ কৰি কৰিছে এই তথ্য। তৃণমূল কংগ্ৰেছৰ ৰাজ্যসভা সাংসদ ৰীতব্ৰত বেনাৰ্জীৰ লিখিত প্ৰশ্নৰ উত্তৰত এই তথ্য উল্লেখ কৰিছে।
সাংসদগৰাকীয়ে প্ৰশ্নত জানিব খুজিছিল চৰকাৰী বেংকে যোৱা এটা দশকত কিমান ঋণ বাতিল কৰিছে আৰু কিয়? উত্তৰত বিত্ত মন্ত্ৰালয়ে উল্লেখ কৰে যে ২০১৫-১৬ বৰ্ষৰ পৰা ২০২৪-২৫ বিত্তীয় বৰ্ষৰ ভিতৰত চৰকাৰী বেংকসমূহে মুঠ ১২ লাখ ৮ হাজাৰ ৮২৮ কোটি টকাৰ ঋণ ৰেহাই কৰিছে। লগতে, ৰিজাৰ্ভ বেংকৰ তথ্য অনুসৰি বিগত ৫ বছৰত মুঠ ২.৯ লাখ কোটি টকাৰ ঋণ অনাদায় হৈ আাছে।
চৰকাৰী বেংকসমূহৰ ভিতৰত ভাৰতীয় ষ্টেট বেংকে (SBI) সৰ্বাধিক ঋণ ৰেহাই কৰিছে। কেৱল বিগত পাঁচ বছৰতহে SBI-এ ১.১৪ লাখ কোটি টকাৰো অধিক ঋণ ৰেহাই দিছে। তাৰ ভিতৰত কেৱল ২০২৪-২৫ বিত্তীয় বৰ্ষতহে (অস্থায়ী তথ্য) ২০,৩০৯ কোটি টকা ৰেহাই দিয়া হৈছে।
অন্যান্য উল্লেখযোগ্য বেংকসমূহ ক্ৰমে পঞ্জাব নেশ্যনেল বেংক-৮১,২৪৩ কোটি টকা, ইউনিয়ন বেংক অৱ ইণ্ডিয়া- ৮৫,৫৪০ কোটি টকা, বেংক অৱ বৰোদা-৭০,০৬১ কোটি টকা, কেনাড়া বেংকৰ এই হাৰ ২০২২-২৩ৰ ৮,৪২২ কোটি টকাৰ পৰা ২০২৪-২৫ত ১৪,৩৫০ কোটি টকালৈ বৃদ্ধি পাইছে।
এই ঋণ ৰেহাইৰ তথ্য পোহৰলৈ অহাৰ লগে লগে বিৰোধীয়ে পুনৰ মোদী চৰকাৰক তীব্ৰ সমালোচনা কৰি কয় যে সাধাৰণ মানুহৰ আৰু ৰাজ্যসমূহৰ অৰ্থনৈতিক প্ৰয়োজন উপেক্ষা কৰি পুঁজিপতি বন্ধুবৰ্গৰ ঋণ মাফ কৰিছে। বিশেষকৈ পশ্চিমবঙ্গৰ দৰে ৰাজ্যৰ বাবদ ১০০ দিনৰ কাম, গৃহ নিৰ্মাণ আঁচনি আদিৰ ধন কেন্দ্ৰই ৰখাই থোৱাৰ অভিযোগ উঠিছে। কেন্দ্ৰ-ৰাজ্য মাজৰ এই বিতণ্ডা এতিয়াও অব্যাহত আছে।
কিন্তু কেন্দ্ৰই দিয়া পৰিসংখ্যা আৰু ব্যাখ্যা অনুসৰি ঋণ ৰেহাই মানে দায়মুক্তি নহয়। বেংকৰ খতিয়ানত ব্যৱহাৰিকভাৱে বন্ধ বুলি চিহ্নিত হলেও, ঋণ আদায়ৰ প্ৰচেষ্টা চলি থাকে বুলি উল্লেখ কৰিছে।