‘যদি একেৰাহে ১৩ দিন সুৰাৰ দোকান বন্ধ হৈ থাকে তেন্তে অভ্যাসগত মদ্যপানকাৰীসকল অসুস্থ হৈ চিকিৎসালয়ত ভৰ্তি হ’ব লাগিব।’ পুনে জিলাৰ একাংশ থানা এলেকাত গণেশ চতুৰ্থীৰ সময়ত সুৰাৰ দোকান একেৰাহে বন্ধ ৰখাৰ নিৰ্দেশ সন্দৰ্ভত এই মন্তব্য কৰে বোম্বে উচ্চ ন্যায়ালয়ৰ মুখ্য ন্যায়াধীশ মহেশ চন্দ্ৰ ত্ৰিপাঠীয়ে।
১৪ ছেপ্টেম্বৰৰ পৰা আৰম্ভ হ’বলগীয়া গণেশ চতুৰ্থী উৎসৱ ২৬ ছেপ্টেম্বৰত শেষ হ’ব।পুনে জিলা দণ্ডাধীশে ৩ ছেপ্টেম্বৰত এটা নিৰ্দেশ জাৰি কৰিছে। ইয়াত কোৱা হৈছে যে আইন-শৃংখলাৰ বাবে ১৪ ছেপ্টেম্বৰৰ পৰা ২৬ ছেপ্টেম্বৰলৈ খাৰাক, বিশ্ৰামবগ আৰু ফৰাচখানা আৰক্ষী থানা এলেকাত সুৰাৰ দোকান বন্ধ থাকিব।
জিলা দণ্ডাধীশৰ নিৰ্দেশক প্ৰত্যাহ্বান জনাই সেই থানাসমূহৰ এলেকাৰ ৫৮ গৰাকী সুৰা ব্যৱসায়ীয়ে ৬ ছেপ্টেম্বৰত বোম্বাই উচ্চ ন্যায়ালয়ত গোচৰ ৰুজু কৰে।এই গোচৰত তেওঁলোকে কয় যে প্ৰতি বছৰে গণেশ চতুৰ্থী উৎসৱৰ শেষ দিনটোত সুৰাৰ দোকান বন্ধ হৈ থাকে। কিন্তু এইবাৰ একেৰাহে ১৩ দিন বন্ধ থাকিব। ইমান দিন দোকান বন্ধ থাকিলে তেওঁলোকৰ ব্যৱসায়ৰ ক্ষতি হ’ব। বহুত টকা লোকচান হ’ব।
শুকুৰবাৰে (১১ ছেপ্টেম্বৰ) সেই গোচৰৰ শুনানি হৈছিল। জিলা দণ্ডাধীশৰ হৈ আদালতত যুক্তি দিছিল অধিবক্তা কেদাৰ দিঘে। কোনো ধৰণৰ অপ্ৰীতিকৰ ঘটনাৰ পৰা হাত সাৰিবলৈ এই নিৰ্দেশ দিয়া হৈছে বুলি তেওঁ কয়। ইয়াৰ বাহিৰেও যাতে আইন-শৃংখলাৰ অৱনতি নঘটে সেইটো চোৱা জিলা দণ্ডাধীশৰ দায়িত্ব। সেয়ে যথাযথ বিবেচনাৰে ১৩ দিন সুৰাৰ দোকান বন্ধ ৰখাৰ নিৰ্দেশ জাৰি কৰা হৈছে।
মুখ্য ন্যায়াধীশ মহেশ চন্দ্ৰ ত্ৰিপাঠী আৰু ন্যায়াধীশ এডভেট ছেথনাৰ খণ্ড বিচাৰপীঠে প্ৰশ্ন কৰে, ‘কেৱল পুনে জিলাৰ ক্ষেত্ৰতহে এনে আদেশ কিয়? ৰাজ্যৰ আন কোনো জিলাত আইন-শৃংখলাৰ অৱনতি নহ’বনে?’
অধিবক্তা দিঘেই উত্তৰ দিয়াৰ আগতেই বিভাগীয় বিচাৰপীঠৰ পৰৱৰ্তী প্ৰশ্ন আছিল, ‘মদ খোৱা সকলোৱে মদ্যপান কৰি মাতলামি কৰিব বা আইন-শৃংখলাৰ অৱনতি ঘটাব বুলি আশংকাৰ কাৰণ কি? আইন-শৃংখলাৰ দোহাই দি কিহৰ ভিত্তিত পুনেক বাছনি কৰা হৈছিল?’
অধিবক্তা দিঘেই মুখ্য ন্যায়াধীশ ত্ৰিপাঠী আৰু ন্যায়াধীশ ছেথ্নাক পতিয়ন নিয়াবলৈ চেষ্টা কৰিছিল যে গণেশ চতুৰ্থী উৎসৱৰ সময়ত বিশেষকৈ বিসৰ্জনৰ সময়ত পুৰুষৰ লগতে ৰাজপথত মহিলাও উপস্থিত থাকে। কোনোবাই যদি মদ খায় তেন্তে মহিলাসকলৰ অসুবিধা হ’ব পাৰে।
অধিবক্তাৰ এই যুক্তি শুনি খণ্ড বিচাৰপীঠে কয়, ‘উৎসৱৰ সময়ত যদি কিছুমান মানুহে সুৰা খাই সুখী হয়, তেন্তে ৰাজপথত এনেকুৱা কাম কৰিব বুলি ক’ব নোৱাৰি, যাৰ ফলত আইন-শৃংখলা বজাই ৰখাত অসুবিধা হ’ব। ইয়াৰ উপৰিও ইমান দিনে সুৰাৰ বিপণী বন্ধ থাকিলে ৰাজ্য চৰকাৰে ৰাজহো হেৰুৱাব।’
খণ্ড বিচাৰপীঠে পৰ্যবেক্ষণ কৰে, ‘আমি এনে সিদ্ধান্ত মানি ল’ব নোৱাৰো। ইয়াৰ দ্বাৰা পুনেৰ বাসিন্দাসকলক কলংকিত কৰা হ’ব। কেৱল পুনেৰ মানুহেহে মদ খোৱাৰ পিছত মাতলামি কৰে বা অশালীন আচৰণ কৰে বুলি আপোনালোকৰ এই ধাৰণাটো কিয়? মহাৰাষ্ট্ৰৰ ইমানবোৰ জিলা, আপুনি কেৱল পুনেকহে বাছি লৈছে?’
ইয়াৰ পিছত মুখ্য ন্যায়াধীশ ত্ৰিপাঠীয়ে এটা লঘু ধেমালি কৰি মন্তব্য কৰে, ‘একেৰাহে ১৩ দিন সুৰাৰ দোকান বন্ধ হৈ থাকিলে অভ্যাসগতভাৱে মদ্যপান কৰা লোকসকল অসুস্থ হৈ চিকিৎসালয়ত ভৰ্তি হ’ব লাগিব।’
শুনানি চলি থকাৰ মাজতে অধিবক্তাগৰাকীয়ে আদালতত উপস্থিত থকা জিলা প্ৰশাসনৰ এজন বিষয়াৰ পৰা পৰামৰ্শ লয়। অধিবক্তাগৰাকীয়ে আদালতত জনোৱা মতে, জিলা দণ্ডাধীশে জনাইছে যে ১৪ ছেপ্টেম্বৰৰ বিয়লি ৪ বজালৈকে আৰু ২৫ ছেপ্টেম্বৰৰ পুৱা (বিসৰ্জনৰ দিন)ৰ পৰা ২৬ ছেপ্টেম্বৰৰ পুৱালৈকে সুৰাৰ দোকান বন্ধ থাকিলে ভাল হয়।
সেয়া শুনাৰ পিছত খণ্ড বিচাৰপীঠে নিৰ্দেশ দিয়ে যে জিলা দণ্ডাধীশে তেওঁৰ নতুন সিদ্ধান্ত পুনৰ জাননী জাৰি কৰি জনাই দিব লাগিব। তাৰ লগে লগে খণ্ড বিচাৰপীঠে গোচৰটোৰ নিষ্পত্তি কৰি দিয়ে।
