ক’ৰ’ণাতংকৰ বাবে মাত্ৰ ১০ দিনৰ বাবে অনুষ্ঠিত হোৱা সংসদৰ বৰ্ষাকালীন অধিৱেশনৰ সময়তে ২৫ খনকৈ বিধেয়ক গৃহীত কৰা হয়।
বিৰোধীৰ প্ৰৱল প্ৰতিবাদৰ মাজতো চৰকাৰে ৰাজ্যসভাত তিনিখনকৈ কৃষক সম্পৰ্কীয় বিধেয়ক গৃহীত কৰে।
এই তিনি খন কৃষি বিধেয়কৰ বিৰুদ্ধে সমগ্ৰ দেশৰ কৃষক সমাজ এতিয়া জাঙুৰ খাই উঠিছে।
ইয়াৰ পৰিপ্ৰেক্ষিততে দেশত এক মহা কৃষক বিপ্লৱ সংঘটিত হোৱাৰ উকমুকনিয়ে দেখা দিছে।
কৃষকৰ মুখৰ ভাত কাঢ়ি নিবলৈ ওলোৱা তিনিও খন কৃষি বিধেয়ক বাতিল কৰাৰ দাবীত আজিৰে পৰা তিনিদিনীয়াকৈ পঞ্জাৱৰ কৃষকসকলে আৰম্ভ কৰিছে ‘ৰে’ল ৰুকো’ আন্দোলন।
এই কাৰ্যসূচীৰ প্ৰতি সমৰ্থন দিছে কেইবাটাও দল সংগঠনে। উল্লেখ্য বিৰোধী দল সমূহৰ প্ৰতিবাদ নেওঁচি চৰকাৰে ৰাজ্যসভাত গৃহীত কৰিছে কৃষক বিষয়ক তিনিখন বিধেয়ক ক্ৰমে The Farmers (Empowerment and Protection) Agreement on Price Assurance and Farm Services Bill, 2020 and The Farming Produce Trade and Commerce (Promotion and Facilitation) Bill, 2020।
এই বিধেয়কৰ বিৰুদ্ধেই পঞ্জাৱত আজিৰে পৰা কিষাণ মজদুৰ সংঘৰ্ষ সমিতিয়ে ৰে’ল অৱৰোধৰ কাৰ্যসূচী হাতত লৈছে।
কিষাণ মজদুৰ সংঘৰ্ষ সমিতিৰ সাধাৰণ সম্পাদক স্বৰ্ণ সিঙে কয় যে যেতিয়ালৈকে চৰকাৰে হঠকাৰী বিধেয়ক কেইখন বাতিল নকৰে তেতিয়ালৈকে দেশৰ কৃষকসকল ক্ষান্ত নহ’য়।