পঞ্জাবৰ পাটিয়ালাৰ এখন দোকানৰ পৰা ক্ৰয় কৰা ম্যাদ উকলি যোৱা চকলেট সেৱন কৰাৰ পাছতে এগৰাকী ডেৰ বছৰীয়া কিশোৰীয়ে তেজ বমি কৰে৷ ঘটনাৰ পাছতে ততাতৈয়াকৈ কিশোৰীগৰাকীক চিকিৎসালয়ত ভৰ্তি কৰোৱা হৈছে। আৰক্ষী আৰু স্বাস্থ্য বিভাগৰ তদন্তত চকলেটৰ ম্যাদ উকলি যোৱা বুলি জানিব পৰা গৈছে।
লুধিয়ানাৰ বাসিন্দা ছোৱালীজনীয়ে পিতৃ-মাতৃৰ সৈতে পটিয়ালাৰ আত্মীয়ৰ ঘৰলৈ গৈছিল। আত্মীয় বিকি গেহলটে স্থানীয় গেলামালৰ দোকানৰ পৰা ছোৱালীজনীৰ বাবে চকলেটৰ বাকচ এটা ক্ৰয় কৰিছিল।
ঘৰলৈ উভতি অহাৰ পাছত ছোৱালীজনীয়ে চকলেট সেৱন কৰাৰ পাছতে মুখৰ পৰা তেজ ওলাবলৈ ধৰে। তাৰ পাছত তেওঁৰ অৱস্থাৰ অৱনতি ঘটাত খ্ৰীষ্টান মেডিকেল কলেজত ভৰ্তি কৰা হয়। ছোৱালীজনীৰ চিকিৎসা পৰীক্ষাত বিষাক্ত পদাৰ্থ খাই অসুস্থ হোৱা বুলি নিশ্চিত হয়।
ইয়াৰ পাছতে কিশোৰীগৰাকীৰ পৰিয়ালে আৰক্ষীৰ ওচৰত এজাহাৰ দাখিল কৰে।অভিযোগকাৰীৰ সৈতে স্বাস্থ্য বিষয়াৰ এটা দলে গেলামালৰ দোকানলৈ গৈ নমুনা সংগ্ৰহ কৰে। স্বাস্থ্য বিভাগে নিশ্চিত কৰিছে যে দোকানখনত ম্যাদ উকলি যোৱা খাদ্য সামগ্ৰী বিক্ৰী কৰা হৈছিল। দোকানখনৰ পৰা আন আন ম্যাদ উকলি যোৱা জলপানো জব্দ কৰা হৈছে।
যোৱা মাহতো পঞ্জাবৰ পাটিয়ালাৰ এগৰাকী ১০ বছৰীয়া কিশোৰ জন্মদিনত কেক খাই ফুড পইজনিঙৰ সন্দেহত মৃত্যু হৈছিল। তেওঁৰ পৰিয়ালৰ আন সদস্যসকলো অসুস্থ হৈ পৰিছিল যদিও চিকিৎসাৰ পাছত বাচি গৈছিল।ৰাজ্যৰ স্বাস্থ্য বিভাগৰ পৰা বিহিত ব্যৱস্থা বিচাৰিছিল পৰিয়ালটোৱে। শেহতীয়াকৈ পোহৰলৈ আহিছে যে কেক অৰ্ডাৰ দিয়া বেকাৰীখন পঞ্জীয়ন নথকা আৰু ভুৱা নামেৰে চলাই থকা হৈছিল।