এক ৰহস্যজনক দুৰ্ঘটনাত নিহত হোৱা তিনিচুকীয়া জিলাৰ কাকপথাৰৰ সাংবাদিক পৰাগ ভূঞালৈ শ্ৰদ্ধাঞ্জলি জ্ঞাপন কৰিলে নগাঁও জিলাৰ পুৰণিগুদাম আৰু চামগুৰিৰ সংবাদসেৱী তথা স্থানীয় গণ্যমান্য ব্যক্তি সকলে।
পুৰণিগুদামস্থিত বাপুজী ভৱন পুথিভঁৰালৰ প্ৰেক্ষাগৃহত পুৰণিগুদাম প্ৰেছ ক্লাৱৰ উদ্যোগত অনুষ্ঠিত শ্ৰদ্ধাজ্ঞলী অনুষ্ঠানটিত বৃহত্তৰ অঞ্চলটোৰ বহু কেইজন গণ্যমান্য ব্যক্তিৰ উপৰিও সমূহ দল-সংগঠনৰ বিষয়ববীয়া উপস্থিত থাকে{
প্ৰথমতে এক মিনিট সময় মৌন প্ৰাৰ্থনা কৰাৰ লগতে ১০১ গছি বন্তি প্ৰজ্বলন কৰি আটায়ে মৃতকৰ আত্মাই চিৰশান্তি লাভৰ কামনা কৰা দেখা যায়।
পুৰণিগুদাম অঞ্চলৰ জ্যেষ্ঠ সমাজকৰ্মী কৃষ্ণ গোস্বামীয়ে শুভাৰম্ভ কৰা বন্তি প্ৰজ্বলন কাৰ্যসূচীৰ পিছত সদ্যপ্ৰয়াত পৰাগ ভূঞাৰ প্ৰতিচ্ছবিত পুষ্পাঞ্জলী অৰ্পণ কৰি মৃতকলৈ শেষ শ্ৰদ্ধা নিবেদিলে উপস্থিত সকলোৱে।
অতিশয় লক্ষণীয়ভাবে এই সময় খিনিতে পুৰণিগুদামৰ ভাস্কর্য্যশিল্পী প্ৰাৰ্থপ্ৰতিম বৰুৱাই কেঁচা মাটিৰে স্বৰ্গীয় পৰাগ ভূঞাৰ স্মৃতিত এটি মুখাৱয়ব নিৰ্মাণ কৰি মৃতকৰ পৰিয়াললৈ সমবেদনা জ্ঞাপন কৰা দেখা যায়।
অনুষ্ঠানটোতে কাকপথাৰত সংঘটিত ৰহস্যজনক দুৰ্ঘটনাটোৰ সন্দৰ্ভত নিৰপেক্ষ তদন্ত আৰু সাংবাদিক পৰাগ ভূঞাৰ মৃত্যুৰ ন্যায় বিচাৰি চৰকাৰৰ ওচৰত সজোৰে দাবী উত্থাপন কৰি আগন্তুক সাত দিনলৈ নগাঁও জিলাৰ প্ৰতিগৰাকী সংবাদসেবীকে একোটাকৈ ক’লা বেজ পৰিধান কৰি থাকিবলৈ আহ্বান জনায় পুৰণিগুদাম প্ৰেছ ক্লাৱে।
লগতে জ্যেষ্ঠ সাংবাদিক গৰাকীৰ ৰহস্যজনক মৃত্যুৰ সন্দৰ্ভত উচিত তদন্ত আৰু ন্যায় বিচাৰি পুৰণিগুদাম আৰু চামগুৰিৰ সংবাদসেবী সকল একত্ৰিত হৈ চামগুৰি ৰাজহ চক্ৰ বিষয়াৰ জৰিয়তে আহা দেওবাৰে মুখ্যমন্ত্ৰী সৰ্ৱানন্দ সোনোৱাললৈ এখন স্মাৰকপত্ৰ প্ৰদান কৰা হ’ব বুলি জানিবলৈ দিয়ে শ্ৰদ্ধাজ্ঞলী অনুষ্ঠানটোৰ উদ্যোক্তা সকলে।
ইফালে পুৰণিগুদামৰ শ্ৰদ্ধাঞ্জলী অনুষ্ঠানটোত মাত্ৰ এঘণ্টাৰ ভিতৰত ভাস্কৰ্য্যশিল্পী প্ৰাৰ্থপ্ৰতিম বৰুৱাই নিৰ্মাণ কৰা পৰাগ ভূঞাৰ মুখাৱয়বটিও কাকপথাৰস্থিত প্ৰয়াত ভূঞাৰ পৰিয়ালৰ হাতত অৰ্পণৰ দিহা কৰা হ’ব বুলি জানিবলৈ দিয়ে পুৰণিগুদাম প্ৰেছ ক্লাৱৰ বিষয়ববীয়া সকলে।
