লোকসভাৰ হাউছিং সমিতিয়ে ৰাহুল গান্ধীক দিল্লীত তেওঁৰ চৰকাৰী বাংলো খালী কৰিবলৈ নিৰ্দেশ দিছে। ৰাহুলক সংসদৰ সদস্য হিচাপে আৱণ্টন কৰা বাংলোটো খালী কৰিবলৈ কোৱা হৈছে। কংগ্ৰেছৰ প্ৰাক্তন সভাপতিগৰাকীক সাংসদ হিচাপে বৰ্খাস্ত কৰাৰ পিছত এইদৰে তেওঁৰ চৰকাৰী বাংলো খালী কৰিবলৈ কোৱা হৈছে। ইয়াৰ বাবে লোকসভা সমিতিয়েও এক ‘ডেডলাইন’ বা সময়সীমাও বান্ধি দিছে। ৰাহুলে বাংলোটো খালী কৰিবলৈ এমাহ সময় পাব।
২০০৫ চনৰ পৰা ৰাহুলে লুটিয়েনৰ দিল্লীৰ ১২ টোঘলক লেনৰ এটা চৰকাৰী বাংলোত বাস কৰি আছে। ৰাহুলক তেওঁৰ নামত ১৮ বছৰৰ বাবে আৱণ্টিত চৰকাৰী বাংলোটো এৰি দিবলৈ এমাহৰ সময় দিয়া হৈছে। কংগ্ৰেছৰ প্ৰাক্তন সভাপতিগৰাকীয়ে বাংলোৰ পৰা তেওঁৰ কাৰ্যালয়ো চলাইছিল।
লগতে পঢ়ক: সন্ধান নাই বিকাশ আৰু জিণ্টুৰ : আলফালৈ যোৱাৰ সন্দেহ প্ৰকাশ পৰিয়ালৰ
যোৱা সপ্তাহৰ শুকুৰবাৰে ৰাহুল গান্ধীৰ সাংসদ পদ খাৰিজ কৰা হৈছিল। গুজৰাটৰ চুৰাটৰ এখন আদালতে ৰাহুল গান্ধীক সকলো ‘মোডী’ উপাধিৰ লোক ‘চোৰ’ মন্তব্যৰ বাবে অপৰাধমূলক মানহানিৰ গোচৰত দোষী সাব্যস্ত কৰিছিল। ইয়াৰ ঠিক পিছতে লোকসভা সচিবালয়ৰ পৰা কংগ্ৰেছৰ প্ৰাক্তন সভাপতি ৰাহুল গান্ধীৰ সাংসদ পদ খাৰিজ কৰি এক জাননী জাৰি কৰা হয়। যদি সিদ্ধান্তটো বাহাৰ থাকে, তেন্তে ৰাহুলে পৰৱৰ্তী ছয় বছৰৰ বাবে কোনো নিৰ্বাচনত প্ৰতিদ্বন্দিতা কৰিব নোৱাৰিব।
১৯৫১ চনৰ জনপ্ৰতিনিধিত্ব আইন অনুসৰি যদি এজন নিৰ্বাচিত প্ৰতিনিধিক দুবছৰ বা অধিক সময়ৰ বাবে অপৰাধৰ বাবে শাস্তি দিয়া হয়, তেন্তে তেওঁক বৰ্খাস্ত কৰা হয়। ২০১৩ চনত উচ্চতম ন্যায়ালয়ে লিলি থমাছ গোচৰত আইনৰ অধীনত বৰ্খাস্তৰ বাবে প্ৰদান কৰা তিনি মাহৰ ‘সুৰক্ষা কবচ’ খাৰিজ কৰিছিল।
লগতে পঢ়ক: পলাল! প্ৰতিবাদী জনতাৰ ৰুদ্ৰমুৰ্ত্তি দেখি পলাবলৈ বাধ্য হ’ল প্ৰধানমন্ত্ৰী
যিহেতু ৰাহুলক এটা ফৌজদাৰী গোচৰত দোষী সাব্যস্ত কৰা হৈছে, সেয়ে তেওঁ নিজে পোনপটীয়াকৈ উচ্চ ন্যায়ালয় বা উচ্চতম ন্যায়ালয়ৰ দ্বাৰস্থ হ’ব নোৱাৰে। অৱশ্যে, কোনো ব্যক্তিয়ে চুৰাট আদালতৰ ৰায়ে বৃহত্তৰ জনস্বাৰ্থক আঘাত কৰিছে বুলি যুক্তি দাঙি ধৰি উচ্চ ন্যায়ালয়ৰ হস্তক্ষেপ বিচাৰিব পাৰে ।
