বিনায়ক দামোদৰ চাভাৰকাৰক লৈ কৰা মন্তব্যৰ বাবে কংগ্ৰেছ নেতা ৰাহুল গান্ধীৰ বিৰুদ্ধে উত্তৰ প্ৰদেশত ৰুজু হোৱা ফৌজদাৰী গোচৰ খাৰিজ কৰিছে উচ্চতম ন্যায়ালয়ে। শুকুৰবাৰে ন্যায়াধীশ দীপাংকৰ দত্ত আৰু ন্যায়াধীশ শীল নাগুৰৰ বিচাৰপীঠে এই গোচৰটো বাতিল কৰাৰ নিৰ্দেশ দিয়ে। গোচৰটোৰ ক্ষেত্ৰত প্ৰয়োজনীয় আইনী অনুমোদন লোৱা হোৱা নাছিল বুলি আদালতে উল্লেখ কৰে।
২০২২ চনৰ ১৭ নৱেম্বৰত মহাৰাষ্ট্ৰত ভাৰত জোড়ো যাত্ৰাৰ সময়ত ৰাহুল গান্ধীয়ে চাভাৰকাৰৰক লৈ মন্তব্য কৰিছিল। তেওঁ অভিযোগ কৰিছিল যে চাভাৰকাৰে ব্ৰিটিছসকলৰ সৈতে সহযোগিতা কৰিছিল আৰু ব্ৰিটিছ চৰকাৰৰ পৰা পেঞ্চন লাভ কৰিছিল। এই মন্তব্যৰ পাছতে দেশৰ ৰাজনীতিত তীব্ৰ বিতৰ্কৰ সৃষ্টি হৈছিল।
ইয়াৰ পাছত আইনজীৱী নৃপেন্দ্ৰ পাণ্ডেৰ এখন ব্যক্তিগত ফৌজদাৰী অভিযোগৰ ভিত্তিত উত্তৰ প্ৰদেশৰ এখন মেজিষ্ট্ৰেট আদালতে ৰাহুল গান্ধীৰ বিৰুদ্ধে সমন জাৰি কৰিছিল। ভাৰতীয় দণ্ডবিধিৰ ১৫৩এ আৰু ৫০৫ ধাৰাৰ অধীনত তেওঁৰ বিৰুদ্ধে গোচৰ ৰুজু কৰা হৈছিল। সাম্প্ৰদায়িক সম্প্ৰীতি নষ্ট কৰা আৰু মানহানিৰ অভিযোগ তুলি মেজিষ্ট্ৰেট আদালতৰ এই নিৰ্দেশক উচ্চতম ন্যায়ালয়ত প্ৰত্যাহ্বান জনাইছিল ৰাহুল গান্ধীয়ে।
শুকুৰবাৰৰ শুনানিত উচ্চতম ন্যায়ালয়ে কয় যে এই গোচৰ চলাবলৈ যি আইনী অনুমোদনৰ প্ৰয়োজন আছিল, সেয়া লোৱা হোৱা নাছিল। উত্তৰ প্ৰদেশ চৰকাৰে আদালতত দাখিল কৰা হলফনামাতো এনে কোনো অনুমোদনৰ কথা উল্লেখ কৰা হোৱা নাই বুলি বিচাৰপীঠে কয়।
এই আইনী ত্ৰুটিৰ ভিত্তিতে উচ্চতম ন্যায়ালয়ে মেজিষ্ট্ৰেট আদালতে জাৰি কৰা সমন বাতিল কৰাৰ লগতে সম্পূৰ্ণ ফৌজদাৰী অভিযোগটোও খাৰিজ কৰে। ফলত চাভাৰকাৰক লৈ কৰা মন্তব্যৰ সন্দৰ্ভত উত্তৰ প্ৰদেশত চলি থকা এই গোচৰৰ পৰা ৰাহুল গান্ধীয়ে ডাঙৰ আইনী সকাহ লাভ কৰে।
