সন্মুখত লোকসভা নিৰ্বাচন। বিভিন্ন ৰাজনৈতিক দলে তেওঁলোকৰ কামকাজৰ খতিয়ান দাঙি ধৰাৰ লগে লগে ইস্তাহাৰো প্ৰকাশ কৰিছে। কাৰণ, মানুহে কামটো দেখাৰ পিছতহে সিদ্ধান্ত ল’ব শাসনত কাক বহুৱাব। সেয়ে, ৰাজনৈতিক দলসমূহে নিজৰ নিজৰ ধৰণেৰে প্ৰচাৰ চলাইছে। তাৰমাজতে কংগ্ৰেছ নেতা ৰাহুল গান্ধীয়ে এটা ডাঙৰ প্ৰতিশ্ৰুতি দিছে।
কি এই প্ৰতিশ্ৰুতি? ৰাজস্থানত এখন ৰাজহুৱা সভাত ৰাহুল গান্ধীয়ে ক্ষমতালৈ অহাৰ পাছত দৰিদ্ৰ পৰিয়ালৰ প্ৰতিগৰাকী মহিলাৰ বেংক একাউণ্টত এক লাখকৈ টকা দিয়াৰ প্ৰতিশ্ৰুতি দিছে। এইদৰে সহজেই দৰিদ্ৰতা দূৰ কৰিব পৰা যাব।
ৰাহুলে কয় যে `কংগ্ৰেছ চৰকাৰে দেশৰ প্ৰতিটো দৰিদ্ৰ পৰিয়ালৰ এগৰাকী মহিলাৰ একাউণ্টলৈ বছৰি এক লাখ টকা প্ৰেৰণ কৰিব। দৰিদ্ৰ সীমাৰেখাৰ তলত বাস কৰাসকলে প্ৰতি বছৰে এক লাখ টকা একাউণ্টত পাব। এইদৰে দেশৰ পৰা একেবাৰতে দৰিদ্ৰতা দূৰ কৰা হ’ব।‘
লগতে পঢ়কঃ প্ৰথমবাৰৰ বাবে অসমত আৱিষ্কাৰ বিৰল প্ৰজাতিৰ বিষাক্ত সাপ
উল্লেখ্য যে চাৰে পাঁচ দশক পূৰ্বে ইন্দিৰা গান্ধীয়ে নিৰ্বাচনী প্ৰচাৰত ‘গৰিবী হাটাও’ৰ শ্লোগান তুলি ধৰিছিল। এইবাৰ কংগ্ৰেছ সাংসদ ৰাহুলে আইতাকে দেখুৱাই দিয়া বাটেৰে খোজ কাঢ়িলে। এই সন্দৰ্ভত কংগ্ৰেছৰ নিৰ্বাচনী ইস্তাহাৰতো প্ৰতিশ্ৰুতি দিয়া হৈছে যেতিয়ালৈকে পৰিয়ালটো দৰিদ্ৰ সীমাৰেখাৰ ওপৰলৈ উঠি নাহে, তেতিয়ালৈকে সেই ধন একাউণ্টত সোমাই থাকিব।
ৰাহুলে দাবী কৰে যে বিজেপিয়ে ঔদ্যোগপতিসকলৰ পৰা নিৰ্বাচনী বণ্ডৰ জৰিয়তে ধন লৈছে, আনহাতে কংগ্ৰেছ একাউণ্টত লেনদেন বন্ধ কৰা হৈছে। তেওঁৰ মতে আগন্তুক লোকসভা নিৰ্বাচন আচলতে ২০-২৫ জন কোটিপতি আৰু সাধাৰণ শ্ৰমিক দৰিদ্ৰ লোকৰ মাজত হোৱা যুঁজ।
লগতে পঢ়কঃ বেংকৰ জালিয়াতিৰ পৰিমাণ দেশৰ জিডিপিৰ ৬ শতাংশ; ভিয়েটনামত অভিযুক্ত ধনকুবেৰক মৃত্যুদণ্ড
ওয়েনাডৰ বিদায়ী সাংসদ ৰাহুল গান্ধীয়ে পুনৰবাৰ স্পষ্ট কৰি দিছে যে কংগ্ৰেছ ক্ষমতালৈ আহিলে নিৰ্বাচনী ইস্তাহাৰত দিয়া প্ৰতিশ্ৰুতি আখৰে আখৰে পূৰণ কৰা হ’ব।
