বহু জল্পনা কল্পনাৰ অন্তত কালি ৰাইজৰ দলৰ প্ৰাৰ্থী তালিকা ঘোষণা কৰা মাত্ৰকে ধিং সমষ্টিত এক উৎসৱ মুখৰ পৰিবেশৰ সৃষ্টি হয়।
ধিং সমষ্টিত ৰাইজৰ দলে প্ৰাৰ্থীত্ব প্ৰদান কৰিছে মৈৰাবাৰী প্ৰেছ ক্লাৱৰ সভাপতি তথা বৈদ্যুতিন আৰু ছপা মাধ্যমত প্ৰায় দুটা দশক ধৰি সততা আৰু নিষ্ঠাৰে সংবাদ সেৱা আগবঢ়োৱা জ্যেষ্ঠ সাংবাদিক মেহবুব মোক্তাৰক।
মেহবুব মোক্তাৰে টিকট লাভ কৰা খবৰ পোৱা মাত্ৰকে শনিবাৰে নিশা মৰিগাঁৱৰ পৰা বাইক ৰেলী কৰি মেহবুব মোক্তাৰক আগবঢ়়াই আনে ধিং সমষ্টিৰ কেবা শতাধিক লোকে। বৃহৎ ৰেলীত অংশ গ্ৰহণ কৰে সমষ্টিটোৰ জ্যেষ্ঠ নেতা-কৰ্মীৰ লগতে বিভিন্ন স্তৰৰ লোকে।
শনিবাৰে মেহবুব মোক্তাৰে আহি প্ৰথমে মৈৰাবাৰী প্ৰেছ ক্লাবে আয়োজন কৰা জৰুৰী সভাত ভাগ লয় আৰু সতীৰ্থ সাংবাদিকসকলৰ উপস্থিতিত প্ৰেছ ক্লাৱৰ সভাপতি পদৰ পৰা অব্যাহতি লয়। সতীৰ্থ সাংবাদিকসকলে মোক্তাৰক উষ্ম আদৰণি জনোৱাৰ পাছতে ধিং সমষ্টিৰ বিভিন্ন প্ৰান্তৰ পৰা আহি প্ৰেছ ক্লাবৰ সন্মুখত ভিৰ কৰা লোক সকলে নিশা দহ বজাত প্ৰেছ ক্লাবৰ পৰা মোক্তাৰক আদৰি নিয়ে আৰু এখন সভাত মিলিত হয় মৈৰাবাৰী বজাৰ প্ৰাঙ্গনত।
সমবেত দুই সহস্ৰাধিক লোকক প্ৰথমবাৰৰ বাবে মোক্তাৰে আনুষ্ঠানিক সম্বোধন কৰি কয় – ‘মই ৰাজনীতিৰ মানুহ নাছিলো। দেশৰ আৰু সমষ্টিটোৰ বৃহত্তৰ স্বাৰ্থৰ বাবে সমষ্টিটোৰ জ্যেষ্ঠ অভিভাৱক, বিশিষ্ট লোকসকলৰ দাবীক সন্মান জনাই ৰাজনীতিলৈ আগবাঢ়িছো।ৰাইজৰ দলৰ মই সাধাৰণ কৰ্মীও নাছিলো। তৎস্বত্ত্বেও ৰাইজৰ দলৰ সভাপতি অখিল গগৈয়ে মোক নিজে টিকট দিছে সমষ্টিটো উদ্ধাৰ কৰিব পাৰিম বুলি। গতিকে মোৰ প্ৰতি থকা তেখেতৰ বিশ্বাসক মই শ্ৰদ্ধা জনাই আজি ওপৰৱালাৰ ওচৰত প্ৰাৰ্থনা কৰিছো তেখেত যেন সোনকালে জে’লৰ পৰা ওলাই আহিব পাৰে।’
লগতে তেওঁ কয় সৰ্বহাৰাৰ বাবে যুঁজ দি জে’লত আবদ্ধ এজন লোকৰ আস্থা বিশ্বাসক আপোনালোকে ৰক্ষা কৰিব লাগিব। নিৰ্বাচন ৰাইজে খেলিব। কিন্তু আজি মই আপোনালোকক কথা দিছো যে – আপোনালোকে মোক জিকাই দিয়ক আৰু যোৱা পোন্ধৰ বছৰে এ আই ইউ ডি এফে যি কৰিব পৰা নাই মই আঢ়ৈ বছৰত কৰি দেখুৱাম।
মোক আপোনালোকে যদি জিকাই আনে আগৰ প্ৰতিনিধিসকলে চকু নিদিয়া প্ৰধান সমস্যা বানপানী গৰাখহনীয়াকে ধৰি সকলো সমস্যা সমাধানৰ বাবে আপোনালোকক লগত লৈ কাম কৰিম।
মই আগন্তুক পাঁচ বছৰত আপোনালোকক অসমৰ ভিতৰতে এটা সৰ্বশ্ৰেষ্ঠ সমষ্টি উপহাৰ দিম বুলিও অংগীকাৰ কৰে মোক্ৰাৰে।
উল্লেখ্য যে আজি পুৱা পৰা মেহবুব মোক্তাৰে বিভিন্ন স্তৰৰ লোকসকলৰ সৈতে মত বিনিময় কৰে। অৱশ্যে ৰাজনৈতিক পথাৰত তেনেই নতুন মুখ মেহবুব মোক্তাৰে আগন্তুক দিনত এআইয়ুডিএফৰ সমৰ্থিত প্ৰাৰ্থী আমিনুলক প্ৰতিহত কৰিবলৈ কেনে কৌশল অৱলম্বন কৰে সেয়া হব লক্ষনীয়।
