ৰে’লৱে ষ্টশ্যন আৰু ৰে’লৰ ডবাত খালী হৈ পৰি থকা প্লাষ্টিকৰ বটলসমূহ গতি লগাবলৈ তৎপৰ হৈ পৰিছে ৰে’ল বিভাগ। ৰে’লৱেই পানীৰ এই খালী প্লাষ্টিক বটলৰ পৰা টী-শ্বাৰ্ট আৰু টুপী বনাব। ইয়াৰ বাবে বটলসমূহ গোটোৱাৰো এক বিশেষ পথ বিচাৰি উলিয়াইছে ৰে’ল বিভাগে।
প্লাষ্টিকৰ বটলসমূহ জমা কৰাসকলক প্ৰতিটো বটলৰ বাবদ পাঁচ টকাকৈ দিয়া হ’ব। পৰিৱেশ সহায়ক এই কামটোৰ বাবে ৰাইজৰ বিপুল সহযোগ পোৱাৰ আশা কৰা হৈছে।
পূব মধ্য ৰে’লৱেৰ চাৰিটা ষ্টেশ্যন পাটনা জংশ্যন, ৰাজেন্দ্ৰনগৰ, পাটনা সাহিব আৰু দানাপুৰ ষ্টেশ্যনত ৰিভাৰ্ছ বেডিং মেছিন ৰখা হৈছে য’ত পানীৰ খালী প্লাষ্টিক বটলসমূহ ভাঙি পেলাই তাৰপৰা টী-শ্বাৰ্ট আৰু টুপী বনোৱা হৈছে।
পূব মধ্য ৰে’লৱেৰ মুখ্য জনসম্পৰ্কৰক্ষী বিষয়াগৰাকীয়ে সংবাদ প্ৰতিষ্ঠানক জানিবলৈ দিয়ে, ‘ৰে’লৱে ষ্টেশ্যনত এনেয়ে পৰি থকা পানীৰ খালী প্লাষ্টিক বটলৰ পৰা পূব মধ্য ৰে’লৱেই এতিয়া টী-শ্বাৰ্ট বনোৱা হ’ব। ৰে’লৱে ষ্টেশ্যনত বহুওৱা বটল ক্ৰেছাৰ মেছিনৰ প্লাষ্টিক টী-শ্বাৰ্ট বনোৱাৰ বাবে ব্যৱহাৰ কৰা হ’ব।‘
তেওঁ জানিবলৈ দিয়ে যে এই টী-শ্বাৰ্টবোৰ যিকোনো বতৰতে পিন্ধিব পৰা হ’ব। টী-শ্বাৰ্ট বনাবৰ বাবে মুম্বাইৰ এটা কোম্পানীৰ সৈতে কথা হৈছে। শীঘ্ৰেই এই প্লাষ্টিকৰ পৰা বনোৱা টী-শ্বাৰ্ট বজাৰত গ্ৰাহকৰ বাবে সুলভ হৈ পৰিব।
বৰ্তমান ঝাৰখণ্ডৰ ৰাজধানী ৰাঁচীত এনেকুৱা টী-শ্বাৰ্টৰ প্ৰদৰ্শনী পতা হৈছে যিবোৰ গ্ৰাহকে খুউব পছন্দ কৰিছে। তদুপৰি, ইয়াৰ দ্বাৰা ষ্টেশ্যন আৰু ৰে’ল লাইনসমূহত পেলাই দিয়া প্লাষ্টিক জাৱৰৰ প্ৰদূষণৰ পৰাও ৰে’ল বিভাগ মুক্ত হ’ব।
আনহাতে, যাত্ৰীসকলে খালী বটল জমা দিয়াৰ বাবে পাঁচ টকাকৈ লাভ কৰিব। এই পাঁচ টকাটো তেওঁ ভাউচাৰৰ ৰূপত ৰে’লৱেৰ এজেন্সি বায়ো-ক্ৰেশৰ পৰা লাভ কৰিব। এই পইচা তেওঁ কোনো আধুনিক দোকান বা মলৰ পৰা সামগ্ৰী ক্ৰয় কৰোতে ব্যৱহাৰ কৰিব পাৰিব। ৰে’লৱেৰ এগৰাকী বিষয়াই জানিবলৈ দিয়া মতে বটল বিলাক ক্ৰেশ কৰি ইয়াক গলাই দিয়া হয় আৰু তাৰপাছত ইয়াৰ পৰা টী-শ্বাৰ্ট, টুপী বনোৱা হয়। আনকি পেন্টো বনাব পৰা যায় বুলি তেওঁ জানিবলৈ দিয়ে।