উত্তৰ-পূব সীমান্ত ৰে’লৱেৰ ৰে’লৱে সুৰক্ষা বাহিনীয়ে ২০২৫ বৰ্ষৰ ১ৰ পৰা ১৪ ফেব্ৰুৱাৰী পৰ্যন্ত ইয়াৰ অধীনৰ বিভিন্ন ৰে’ল ষ্টেচনৰ পৰা ৪০ জন নাবালক-নাবালিকা আৰু ২ গৰাকী মহিলাক সফলতাৰে উদ্ধাৰ কৰি বিপদাপন্ন ব্যক্তিসকলক সুৰক্ষা প্ৰদানৰ দায়বদ্ধতা পুনৰ এবাৰ অক্ষুণ্ণ ৰাখিছে।
উদ্ধাৰ কৰা ব্যক্তিসকলক সঠিক যত্ন আৰু পুনৰ্সংস্থাপনৰ বাবে চাইল্ড লাইন, বেচৰকাৰী সংগঠন, অভিভাৱক আৰু চৰকাৰী ৰে’লৱে আৰক্ষী/স্থানীয় আৰক্ষীৰ হাতত গতাই দিয়া হয়।
এই পদক্ষেপ মানৱ সৰবৰাহ প্ৰতিৰোধ, পলাতক শিশুসকলক সুৰক্ষা প্ৰদান আৰু শিশু শোষণৰ বিৰুদ্ধে যুঁজ দিয়াৰ দিশত ৰে’লৱে সুৰক্ষা বাহিনীৰ দ্বাৰা চলাই নিয়া প্ৰচেষ্টাৰে অংশ, যি ৰে’ল যাত্ৰীসকলৰ বাবে সজাগ অভিভাৱক হিচাপে ইয়াৰ ভূমিকা পুনৰ নিশ্চিত কৰিছে।
২০২৫ বৰ্ষৰ ফেব্ৰুৱাৰীত চলোৱা এক ধাৰাবাহিক উদ্ধাৰ অভিযানত, ৰে’লৱে সুৰক্ষা বাহিনীয়ে সংকটপূৰ্ণ পৰিস্থিতিৰ প্ৰতি সঁহাৰি দিয়াৰ বাবে দ্ৰুততাৰে কাম কৰে। ২০২৫ বৰ্ষৰ ২ ফেব্ৰুৱাৰীত কোকৰাঝাৰ ৰে’ল ষ্টেচনত কোকৰাঝাৰৰ আৰপিএফ দলে এগৰাকী ১৭ বছৰীয়া কিশোৰীক উদ্ধাৰ কৰে। সঠিক চিনাক্তকৰণৰ পিছত, সুৰক্ষিতভাৱে তেওঁক অভিভাৱকৰ হাতত তুলি দিয়া হয়।
একেদৰে, ২০২৫ বৰ্ষৰ ৫ ফেব্ৰুৱাৰীত কিষাণগঞ্জ ৰে’লৱ ষ্টেচনত কিষাণগঞ্জৰ আৰপিএফ দলে পশ্চিম বংগ আৰু বিহাৰৰ বিভিন্ন স্থানৰ পৰা পাঁচজন পলাতক নাবালক ল’ৰাক উদ্ধাৰ কৰে। এই নাবালকসকলক তেওঁলোকৰ সুৰক্ষা আৰু কল্যাণ নিশ্চিত কৰি তৎক্ষণাৎ কিষাণগঞ্জৰ চাইল্ড লাইনৰ হাতত অৰ্পণ কৰা হয়।
২০২৫ বৰ্ষৰ ১২ ফেব্ৰুৱাৰীত কাটিহাৰ ৰে’ল ষ্টেচনত এক উল্লেখযোগ্য উদ্ধাৰ অভিযান চলোৱা হয়, য’ত কাটিহাৰৰ ৰে’লৱে সুৰক্ষা বাহিনীৰ দলে আৰু পাঁচজন পলাতক নাবালক ল’ৰাক উদ্ধাৰ কৰে। প্ৰয়োজনীয় সঁহাৰি আৰু সহায় প্ৰদানৰ বাবে এই শিশুসকলক লগে লগে চাইল্ড লাইন, কাটিহাৰৰ তত্বাৱধানত ৰখা হয়।
উত্তৰ-পূব সীমান্ত ৰে’লৱেৰ ৰেলৱে সুৰক্ষা বাহিনীয়ে ৰে’ল যাত্ৰীসকলক, বিশেষকৈ নাবালক-নাবালিকা আৰু মহিলাসকলক সুৰক্ষা দিয়াৰ বাবে একনিষ্ঠভাৱে কাম কৰি আহিছে, যিসকল অবৈধ সৰবৰাহ আৰু শোষণৰ কৱলত পৰে। উদ্ধাৰ কৰা ব্যক্তিসকলৰ সুৰক্ষা আৰু পুনৰ্সংস্থাপন নিশ্চিত কৰাৰ অৰ্থে সুৰক্ষা বাহিনীয়ে চাইল্ড লাইন, বেচৰকাৰী সংগঠন, স্থানীয় আৰক্ষী আৰু অন্যান্য কৰ্তৃপক্ষৰ সৈতে সক্ৰিয়ভাৱে সহযোগিতা কৰি আহিছে।
যাত্ৰীসকলক সতৰ্ক হৈ থাকিবলৈ আৰু আৰপিএফ হেল্পলাইন – ১৩৯ ৰ সৈতে যোগাযোগ কৰি মানৱ সৰবৰাহ বা দুৰ্দশাগ্ৰস্ত ব্যক্তিৰ সৈতে সম্পৰ্কিত যিকোনো সন্দেহজনক কাৰ্য কলাপৰ তথ্য দিবলৈ উৎসাহিত কৰা হৈছে।
উত্তৰ-পূব সীমান্ত ৰে’লৱেই ইয়াৰ প্ৰতিশ্ৰুতিৰ প্ৰতি অটল থাকি সুৰক্ষা ব্যৱস্থা শক্তিশালী কৰি আহিছে, সমগ্ৰ অঞ্চলটোত এক সুৰক্ষিত, যাত্ৰী-অনুকূল আৰু দায়িত্বশীল ৰে’লৱে নেটৱৰ্ক শক্তিশালী কৰি তুলিছে।
