ৰাজস্থানৰ হোষ্টেলৰ পৰা উদ্ধাৰ হৈছে এজন NEET পৰীক্ষাৰ্থীৰ চিপ লোৱা মৃতদেহ। চাৰিবছৰ ধৰি তেওঁ পৰীক্ষাৰ বাবে প্ৰস্তুতি চলাইছিল। তেওঁ এইবাৰ NEET পৰীক্ষাতো অৱতীৰ্ণ হৈছিল। প্ৰশ্নকাকত ফাদিলৰ অভিযোগ উত্থাপন হোৱাৰ পিছতে বাতিল কৰা হয় পৰীক্ষা। সূত্ৰ অনুসৰি ইয়াৰ বাবেই হতাশ হৈ পৰিছিল পৰীক্ষাৰ্থীগৰাকী। ইয়াৰ পিছতে তেওঁ চিপ লৈ আত্মহত্যা কৰে।
আৰক্ষীৰ সূত্ৰ অনুসৰি মৃতকৰ নাম প্ৰদীপ। তেওঁৰ ঘৰ ৰাজস্থানৰ ঝুনঝুনু জিলাৰ গুধা গৌৰজী অঞ্চলত। যোৱা চাৰিবছৰ ধৰি ছিকাৰত পৰীক্ষাৰ বাবে প্ৰস্তুতি চলাইছিল। যিটো হোষ্টেলত থাকি পঢ়া-শুনা আৰু পৰীক্ষাৰ বাবে প্ৰস্তুতি চলাইছিল তাতেই আত্মহত্যা কৰে প্ৰদীপে। এইবাৰ তৃতীয় প্ৰচেষ্টাত ভাল নম্বৰ পোৱাৰ আশা কৰিছিল।
প্ৰদীপে বিশ্বাস কৰিছিল যে এইবাৰ চৰকাৰী চিকিৎসা মহাবিদ্যালয়ত তেওঁৰ নামভৰ্তিৰ ভাল সুযোগ আছে। অৱশ্যে পৰীক্ষা বাতিল হোৱাৰ খবৰ পাই তেওঁ মানসিকভাৱে বিধ্বস্ত হৈ পৰে। ইয়াৰ ফলত তেওঁ এই চৰম পদক্ষেপ ল’বলৈ বাধ্য হ’ল।
মন কৰিবলগীয়া যে NEET পৰীক্ষাৰ্থীৰ আত্মহত্যাৰ এয়া প্ৰথম ঘটনা নহয়। প্ৰশ্নকাকত ফাদিলৰ ঘটনাৰ পিছৰে পৰা সমগ্ৰ দেশতে কেইবাটাও আত্মহত্যাৰ ঘটনা সংঘটিত হৈছে। ইয়াৰ পূৰ্বে দিল্লীৰ আজাদপুৰ অঞ্চলতো এগৰাকী যুৱতীয়ে আত্মহত্যা কৰিছিল। জনা যায় যে তেওঁ NEET মেডিকেল এণ্ট্ৰেন্স পৰীক্ষাৰ বাবেও প্ৰস্তুতি চলাইছিল।
এই ঘটনাক লৈ উদ্বেগ প্ৰকাশ কৰিছে কংগ্ৰেছ নেতা তথা ৰাজস্থানৰ বিধায়ক শচীন পাইলটে। তেওঁ ছ’চিয়েল মিডিয়াত লিখিছে, ‘নিট পৰীক্ষাৰ বাবে প্ৰস্তুতি চলাই থকা ঝুনঝুনু জিলাৰ গুধা গৌড়জীৰ ছাত্ৰ প্ৰদীপৰ আত্মহত্যা অতি হৃদয়বিদাৰক। একেদৰে NEET 2026 প্ৰশ্নকাকত ফাদিলৰ ক্ষেত্ৰত গোৱা আৰু উত্তৰ প্ৰদেশত ছাত্ৰ আত্মহত্যাৰ খবৰো অত্যন্ত বেদনাদায়ক।’
তেওঁৰ মতে প্ৰতিভাৱান, সৎ ছাত্ৰ-ছাত্ৰীসকলে অক্লান্তভাৱে পৰিশ্ৰম কৰি আহিছে। কিন্তু NEET 2026 প্ৰশ্নকাকত ফাদিল হোৱাৰ ফলত ভৱিষ্যতক লৈ সৃষ্টি হোৱা উদ্বিগ্নতাই ছাত্ৰ-ছাত্ৰীৰ ওপৰত অপৰিসীম চাপৰ সৃষ্টি কৰিছে। ইয়াৰ ফলত তেওঁলোকৰ মানসিক স্বাস্থ্যৰ ওপৰত প্ৰত্যক্ষ প্ৰভাৱ পৰিছে।
প্ৰশ্নকাকত ফাদিল হোৱাৰ ঘটনাৰ তদন্ত আৰম্ভ কৰিছে চিবিআইয়ে। শুকুৰবাৰে NEET পৰীক্ষাৰ প্ৰশ্নকাকত ফাদিলৰ ঘটনাৰ সৈতে জড়িত মহাৰাষ্ট্ৰৰ লাটুৰৰ পৰা পিভি কুলকাৰ্ণী নামৰ ৰসায়ন বিজ্ঞানৰ অধ্যাপকক গ্ৰেপ্তাৰ কৰা হয়।
তদন্তকাৰীয়ে দাবী কৰিছে যে এই প্ৰশ্নকাকত ফাদিল চক্ৰৰ অন্যতম মূল দোষী অধ্যাপকগৰাকী। প্ৰশ্নকাকত ফাদিল গোচৰত এতিয়ালৈকে চিবিআইয়ে গ্ৰেপ্তাৰ কৰিছে ৮জন লোকক। তদন্তকাৰী বিষয়াসকলে এই চক্ৰৰ সৈতে জড়িত আন লোকসকলক বিচাৰি আছে।
