এগৰাকী যুৱতীয়ে বিয়াৰ নামত এজনৰ পিছত আনজন পুৰুষক প্ৰতাৰণা কৰিছে। ইজনৰ পিছত সিজন পুৰুষৰ লগত বিয়া হৈছিল। তাৰ পিছতে তেওঁৰ বিৰুদ্ধে সোণৰ গহনা আৰু নগদ ধন লৈ পলাই যোৱাৰ অভিযোগ। বহুদিন ধৰি আৰক্ষীয়ে যুৱতীক বিচাৰি আছিল। কিন্তু আত্মগোপন কৰি আছিল।
অৱশ্যে শেষত ৰক্ষা নাপালে ‘লুটেৰা দুলহনে’। আৰক্ষীৰ হাতত ধৰা পৰিল। ৰাজস্থান আৰক্ষীয়ে বৃহস্পতিবাৰে হাৰিয়ানাৰ গুৰুগ্ৰামৰ পৰা গ্ৰেপ্তাৰ কৰে যুৱতীগৰাকীক।
আৰক্ষীৰ সূত্ৰ অনুসৰি, ধৃত যুৱতীগৰাকীৰ নাম কাজল। প্ৰায় ডেৰ বছৰ ধৰি গুৰুগ্ৰামৰ এটা বাসগৃহত আত্মগোপন কৰি আছিল।
ৰাজস্থান আৰক্ষীৰ সূত্ৰ অনুসৰি, ২০২৪ চনৰ মে’ মাহত উত্তৰ প্ৰদেশৰ বাসিন্দা ভগত সিঙে ৰাজস্থানৰ ছিকাৰ অঞ্চলৰ বাসিন্দা তৰাচান্দ জাটক লগ পাইছিল। তেওঁৰ দুই কন্যা কাজল আৰু তমন্নাৰ সৈতে তৰাচান্দৰ দুই পুত্ৰৰ বিয়াৰ প্ৰস্তাৱ দিছিল। ভগত সিঙেও এই বিবাহৰ প্ৰস্তুতিৰ বাবে তাৰাচান্দৰ পৰা ১১ লাখ টকা লৈছিল। সেই বছৰৰ ২১ মে’ত সম্পন্ন হয় এই বিবাহ। ভগত সিঙেও পত্নী সৰোজ আৰু পুত্ৰ সুৰজকো বিবাহৰ বাবে লৈ আহিছিল।
বিয়াৰ পিছত ভগত সিঙে পৰিয়ালৰ লোকৰ সৈতে তাৰাচান্দৰ ঘৰত দুদিন থাকিল। কিন্তু তৃতীয় দিনা ভগত সিং আৰু তেওঁৰ পৰিয়ালৰ লোকে গহনা, নগদ ধন আৰু অন্যান্য মূল্যৱান সামগ্ৰী লৈ তাৰ পৰা পলায়ন কৰে।
বাতৰি অনুসৰি, তাৰাচান্দে ভগত সিঙৰ পৰিয়ালৰ বিৰুদ্ধে ছিকাৰৰ ধনতাৰামগড় আৰক্ষী থানাত এজাহাৰ দাখিল কৰে। অভিযোগৰ ভিত্তিত তালাচীৰ অন্তত ভগত সিং আৰু তেওঁৰ পত্নীক গ্ৰেপ্তাৰ কৰা হয়। জেৰাৰ সময়ত দম্পতীহালে স্বীকাৰ কৰে যে তেওঁলোকে এটা প্ৰৱঞ্চনামূলক বিবাহ চক্ৰ চলাইছিল। পিছত আৰক্ষীয়ে তমান্না আৰু সুৰজকো গ্ৰেপ্তাৰ কৰে। কিন্তু কাজল লুকাই থাকিল।
সূত্ৰ অনুসৰি, কাজলে কিছুদিন জয়পুৰ আৰু মথুৰাত আত্মগোপন কৰি আছিল। পিছত গুৰুগ্ৰামলৈ গুচি যায়। তাতে ভাড়াঘৰত আছিল। গুৰুগ্ৰাম আৰক্ষীৰ সহায়ত ৰাজস্থান আৰক্ষীয়ে তেওঁক গ্ৰেপ্তাৰ কৰে।
আৰক্ষীয়ে দাবী কৰে যে জেৰাৰ সময়ত কাজলে এই প্ৰৱঞ্চনামূলক বিবাহ চক্ৰটো চলোৱাৰ কথা স্বীকাৰ কৰে। এই প্ৰৱঞ্চনা কেনেদৰে কৰা হ’ল সেই কথাও কাজলে আৰক্ষীক জনায়। কাজলে আৰক্ষীক জনোৱা মতে, আগতে তেওঁ আৰু তমন্নাই অবিবাহিতা হোৱাৰ অভিনয় কৰিছিল। ইয়াৰ পিছত তেওঁলোকৰ বিয়াৰ সম্বন্ধ এখন ধনী পৰিয়ালৰ লগত কৰা হয়। বিয়া হৈ তেওঁলোকে সেই পৰিয়ালটোৰ আস্থা অৰ্জন কৰে।
ঘটনাৰ তদন্ত কৰি থকা আৰক্ষী বিষয়া পুৰনমলে কয় যে বিয়াৰ পিছত এই যুৱতীসকলে ২-৩ দিন পৰিয়ালৰ সৈতে কটায়। অৱশ্যে কোনো শাৰীৰিক সম্পৰ্ক স্থাপন নকৰে। ইয়াৰ পিছতে নগদ ধন আৰু গহনা লৈ পলাই যায়।
আৰক্ষীয়ে সন্দেহ কৰিছে যে আৰু বহু লোকক একে ধৰণে প্ৰতাৰণা কৰা হৈছে। আৰক্ষীয়ে এই চক্ৰৰ লগত জড়িত লোকসকলক বিচাৰি থকা বুলিও জানিবলৈ দিয়ে।
