ককৰোচ জনতা পাৰ্টি চমুকৈ চিজেপিৰ এটা প্ৰতিনিধি দল চৰকাৰী বিদ্যালয় পৰিদৰ্শনৰ বাবে ৰাজস্থানৰ উদয়পুৰত উপস্থিত হোৱাৰ দিনাই ৰাজ্যখনৰ মুখ্যমন্ত্ৰী ভজনলাল শৰ্মাই ৪৭২খন বিদ্যালয়ৰ আন্তঃগাঁথনি উন্নয়নৰ বাবে ৪ হাজাৰ কোটি টকাৰ পুঁজি আৱণ্টন কৰিছে। আৱণ্টিত পুঁজিৰ এই ৪৭২খন বিদ্যালয়ৰ ভিতৰত ত্ৰিছ শতাংশই কেৱল উদয়পুৰত অৱস্থিত হোৱাক লৈ এতিয়া তীব্ৰ প্ৰতিক্ৰিয়াৰ সৃষ্টি হৈছে। চিজেপিৰ সদস্য আশুতোষ ৰাংকাই এক্স হেণ্ডেলত এক পোষ্ট যোগে এই তথ্য ৰাজহুৱা কৰি সমগ্ৰ কাৰ্যকলাপক লৈ ৰাজস্থান চৰকাৰক তীব্ৰ সমালোচনা কৰিছে।
ৰাংকাৰ এই পোষ্টৰ আঁত ধৰি চিজেপিৰ আন এগৰাকী সদস্য সৌৰভ দাসে কয় যে তেওঁলোক য’লৈকে গৈছে, তালৈকে ৰাজ্য চৰকাৰে উন্নয়নমূলক কাম আৰম্ভ কৰিছে। সেয়েহে তেওঁ ৰাজস্থানৰ জনসাধাৰণক পৰৱৰ্তী সময়ত দলটোৱে কোন কোন স্থানলৈ যোৱা উচিত, সেই বিষয়ে পৰামৰ্শ দিবলৈ আহ্বান জনায়। উল্লেখযোগ্য যে কেন্দ্ৰ আৰু ৰাজ্য চৰকাৰে ভিতৰুৱা অঞ্চলৰ চৰকাৰী বিদ্যালয়সমূহক চৰম অৱহেলা কৰাৰ অভিযোগ তুলি যোৱা পোন্ধৰ আগষ্টৰ পৰা চিজেপিয়ে সমগ্ৰ ৰাজ্যজুৰি ‘স্কুল ঠিক কৰো’ শীৰ্ষক এক অভিযান আৰম্ভ কৰিছিল। এই অভিযানৰ অংশ হিচাপেই যোৱা মাহত দলটোৰ শীৰ্ষ নেতাসকলে ৰাজস্থান ভ্ৰমণলৈ আহিছিল।
আগষ্ট মাহত জয়পুৰৰ এখন চৰকাৰী বিদ্যালয় পৰিদৰ্শন কৰিবলৈ যোৱাৰ সময়ত চিজেপিৰ প্ৰতিনিধি দলটোৰ ওপৰত একাংশ লোকে আক্ৰমণ সংঘটিত কৰা বুলি অভিযোগ উত্থাপন হৈছিল। আৰক্ষীৰ সূত্ৰই প্ৰকাশ কৰা মতে, এই ঘটনাৰ সন্দৰ্ভত দুয়োপক্ষৰ পৰাই পৃথকে পৃথকে এজাহাৰ দাখিল কৰা হৈছিল। অৱশ্যে ৰাজ্য চৰকাৰ আৰু চিজেপিৰ মাজত চলি থকা এই সংঘাত ইয়াতেই সামৰণি পৰা নাই। আশুতোষ ৰাংকাই অভিযোগ কৰা মতে, চিজেপিৰ সদস্যসকলৰ ওপৰত আক্ৰমণ চলোৱা দুৰ্বৃত্তক বিচাৰি উলিওৱাৰ পৰিৱৰ্তে আৰক্ষীয়ে তেওঁৰ বাসগৃহতহে চোৰাংচোৱাগিৰি চলাইছিল। ঘৰলৈ কোন আহিছে আৰু কোন গৈছে, তাৰ ওপৰত আৰক্ষীয়ে চোকা নজৰ ৰখা বুলি তেওঁ ক্ষোভ প্ৰকাশ কৰে।
প্ৰায় দুঘণ্টা ধৰি আৰক্ষীৰ কটকটীয়া নিৰীক্ষণত থকা বুলি দাবী কৰি ৰাংকাই কয় যে আৰক্ষীয়ে বিচাৰিলে তেওঁক পোনপটীয়াকৈ গ্ৰেপ্তাৰ কৰিব পাৰে, কিন্তু আৰক্ষীৰ এনে কাৰ্যই তেওঁলোকক হতাশ কৰিব নোৱাৰে। যেতিয়ালৈকে ৰাজস্থানৰ প্ৰতিখন চৰকাৰী বিদ্যালয়ে সঠিক আন্তঃগাঁথনি আৰু সুযোগ-সুবিধা লাভ নকৰে, তেতিয়ালৈকে চিজেপিৰ এই ‘স্কুল ঠিক কৰো’ অভিযান অব্যাহত থাকিব বুলি তেওঁ দৃঢ়তাৰে প্ৰকাশ কৰে। বিদ্যালয়ৰ আন্তঃগাঁথনি উন্নয়নৰ নামত হঠাতে মুকলি কৰা এই বৃহৎ পুঁজিয়ে এতিয়া ৰাজস্থানৰ শিক্ষা খণ্ডত নতুন বিতৰ্কৰ সূচনা কৰিছে আৰু পৰৱৰ্তী সময়ত চৰকাৰে চিজেপিৰ এই অভিযানক কেনেদৰে মোকাবিলা কৰে, সেয়া লক্ষণীয় হ’ব।
