কেন্দ্ৰীয় ৰে’ল ৰাজ্যমন্ত্ৰী ৰাজেন গোঁহাইৰ বিৰুদ্ধে উত্থাপিত যৌন নিৰ্যাতনৰ ঘটনাক কেন্দ্ৰ কৰি আজিও প্ৰতিক্ৰিয়া অব্যাহত আছে। ৰাজেন গোঁহাইয়ে প্ৰতিনিধিত্ব কৰা নগাঁও লোকসভা সমষ্টিৰ তথা তেখেতৰ নিজা গৃহ জিলাৰ বিভিন্ন ঠাইত অসম প্ৰদেশ কংগ্ৰেছ সমিতিৰ নগাঁও জিলা সমিতি আৰু কৃষক মুক্তি সংগ্ৰাম সমিতিৰ জিলা সমিতিৰ কৰ্মীয়ে তীব্ৰ প্ৰতিবাদ সাৱ্যস্ত কৰি উত্তাল পৰিৱেশৰ সৃষ্টি কৰে।
কেইবা শতাধিক কৰ্মী ৰাজপথত ওলাই আহি এই অঞ্চলসমূহত ৰাজেন গোঁহাই গ’বেক, ৰাজেন গোঁহাই হায় হায়, ৰাজেন গোঁহাইক মন্ত্ৰী পদৰ পৰা অপসাৰণ কৰক, ৰাজেন গোঁহাই মুৰ্দাবাদ আদি ধ্বনিৰে আকাশ-বতাহ উত্তাল কৰি তোলে।
উক্ত সংগঠন দুটাৰ প্ৰতিবাদকাৰীসকলে গোঁহাইৰ প্ৰতিকৃতিও দাহ কৰে। আনকি, প্ৰতিবাদকাৰীসকলে ৰাজেন গোঁহাইয়ে অতি শীঘ্ৰে কেন্দ্ৰীয় মন্ত্ৰিত্বৰ পৰা পদত্যাগ কৰাৰ লগতে তেওঁক গ্ৰেপ্তাৰ কৰিবলৈ প্ৰশাসনক দাবী জনায়। ইয়াৰ উপৰি জিলা প্ৰশাসনক তেওঁলোকে ৰাজেন গোহাঁইৰ বিৰুদ্ধে স্মাৰক পত্ৰও প্ৰদান কৰে।
উল্লেখ্য যে, আনহাতে, নগাঁও জিলাৰ বৰকোলা, দক্ষিণাপাট, কামপুৰ, মহমৰিয়া, বটদ্ৰৱাৰ হাতীযুজুঁৱা আদি অঞ্চলত কেন্দ্ৰীয় ৰে’ল ৰাজ্যিক মন্ত্ৰী ৰাজেন গোঁহাইৰ বিৰুদ্ধে দল-সংগঠন দুটাই প্ৰতিবাদী কাৰ্যসূচী ৰূপায়ন কৰে।
উল্লেখ্য যে, কেন্দ্ৰীয় ৰে’ল ৰাজ্যিক মন্ত্ৰী ৰাজেন গোঁহাইৰ বিৰুদ্ধে জিলাখনৰ দেউৰী গাঁৱৰ এগৰাকী বিবাহিতা মহিলাই তেওঁক চাকৰি দিয়াৰ প্ৰলোভনেৰে যৌন নিৰ্যাতন চলোৱাৰ অভিযোগত নগাঁও সদৰ থানাত এক গোচৰ ৰুজু কৰিছিল। তেওঁৰ বিৰুদ্ধে জামিনবিহীন ধাৰাত গোচৰ ৰুজু হোৱাৰ পিছৰ পৰাই ৰাজ্যৰ ৰাজনীতিত তীব্ৰ জোকাৰণিৰ সৃষ্টি হৈছে।
