মাৰ্ঘেৰিটা মহকুমাৰ ভিনাৰ মিল বজাৰস্থিত শিক্ষক কলনীৰ উদীয়মান ব্যৱসায়ী যুৱক অনুজ বৰঠাকুৰৰ পত্নী ৰাজশ্ৰী নেওগ বৰঠাকুৰ(৩৮)ৰ চিকিৎসাৰ অভাৱত হোৱা কৰুণ মৃত্যুৱে সমগ্ৰ অঞ্চলত শোঁকৰ ছাঁ পেলাইছে।
জানিব পৰামতে, যোৱা ১৯ আগষ্ট তাৰিখে নিশা সাধাৰণ অৱস্থাত চলা ফুৰা কৰি ঘৰুৱা কামকাজ কৰি থকা বৰঠাকুৰৰ পত্নী হঠাৎ অসুস্থ হৈ পৰে।
এটি চাৰি মহীয়া কন্যা সন্তানৰ মাতৃ গৰাকী হঠাৎ এনেদৰে অসুস্থ হোৱাত কোনো কাৰণ বিচাৰি নোপোৱাত পৰিয়ালৰ লোকে উচ্চ ৰক্তচাপজনিত কাৰণ হ’ব পাৰে বুলি সন্দেহ কৰি ততাতয়াকৈ স্থানীয় নাৰ্চিংহোম আৰু মাৰ্ঘেৰিটা অসামৰিক চিকিৎসালয়ত প্ৰাথমিক চিকিৎসা গ্ৰহণ কৰি ডিব্ৰুগড় অভিমুখে লৈ যায়।
কিন্তু উন্নত চিকিৎসাৰ আশাৰে অৰ্ধমৃত অৱস্থাত থকা ৰোগীগৰাকীয়ে তিনিচুকীয়াৰ কেইবাখনো নাৰ্চিংহোমৰ এখনতো চিকিৎসা সেৱা নাপাই ডিব্ৰুগড় ব্যক্তিগত নাৰ্চিংহোমলৈ বুলি লৈ ৰোগী গৰাকীক লৈ যায়।
তাতো কোনো এখন নাৰ্চিংহোমৰ পৰাও কিঞ্চিৎ মানো সঁহাৰি নোপোৱাত ২০ আগষ্টৰ দিনা ডিব্ৰুগড়ত ৰাজশ্ৰীৰ মৃত্যু হয়।
এই বিষয়টোৱে মানৱতাৰ প্ৰতি ভাবুকী সৃষ্টি কৰিছে।
চৰকাৰে দৈনিক হাজাৰ হাজাৰ মানুহৰ কৰোণাৰ নামত “এণ্টিজেন ৰেপিড টেষ্ট” কৰি থকাৰ সময়তে ডিব্ৰুগড়ৰ ব্যক্তিগত নাৰ্চিংহোম সমূহে এনে ৰিপৰ্ট মানি নলয় আৰু তেওঁলোকক ক’ৰ’ণাৰ সম্পূৰ্ণ বি চি আৰ ৰিপৰ্ট বিচাৰে।
যিটো ৰিপৰ্ট আহোঁতে তিনি দিনৰ পৰা চাৰি দিন পৰ্যন্ত সময় লাগে। উচ্চ ৰক্তচাপ, ডায়েবেটিছ, কিডনী ৰোগী আৰু হাৰ্টৰ ৰোগী আদিকে ধৰি মানুহৰ জীৱনলৈ অকস্মাৎ অহা কোনো দুৰ্য্যোগ তথা বেমাৰৰ চিকিৎসা কৰিবৰ বাবে এটা সময়ত টকাৰ লোভে মূৰত ধৰা নামজ্বলা একাংশ চিকিৎসকে সেই এণ্টিজেন ৰেপিড টেষ্টৰ ৰিপৰ্ট কোনোপধ্যে মানি নলয় আৰু ৰোগীজনক পুনৰ কৰোণা টেষ্ট কৰি তিনি চাৰি দিনৰ পিছত ৰিপৰ্ট অহাৰ অন্ততহে চিকিৎসকে উক্ত ৰোগী সকলৰ চিকিৎসা কৰিব বুলি এটা ধাৰণা দিয়ে।
ব্যক্তিগত নাৰ্ছিংহোমৰ এনে কাণ্ডৰ বাবে চাৰি মহীয়া কন্যা সন্তাৰ মাতৃ ৰাজশ্ৰী নেওগৰ দুৰ্ভাগ্যজনকভাৱে মৃত্যু ঘটে।
গতিকে মানৱ সেৱাৰ দৰে এটা পৱিত্ৰ বৃত্তিত জড়িত হৈ থাকিও মানুহৰ জীৱনৰ প্ৰতি সামান্যও দায়িত্ববোধ নথকা এইসকল চিকিৎসকক স্বাস্থ্য মন্ত্ৰীয়ে নাকী লগাবলৈ সমৰ্থ হ’ব নে বুলি প্ৰশ্ন উত্থাপন কৰিছে পৰিয়ালৰ লোকে।
এই ক্ষেত্ৰত চৰকাৰ কঠোৰ ন’হলে ক’ৰ’ণাৰ উপৰি অন্যান্য বহু সাধাৰণ ৰোগতেই যে বহু মানুহৰ মৃত্যু ঘটিব সেয়া নিশ্চিত।
ৰাজশ্ৰীৰ মৃত্যুৱে মাৰ্ঘেৰিটাৰ লগতে তিনিচুকীয়াৰ মাতৃ পৰিয়ালত শোকৰ ছাঁ পেলাইছে। সমগ্ৰ ঘটনাই মাৰ্ঘেৰিটা সচেতন মহলত ব্যাপক প্ৰতিক্ৰিয়াৰ সৃষ্টি কৰাৰ লগতে স্বাস্থ্য মন্ত্ৰীক এইক্ষেত্ৰত বিহিত ব্যৱস্থা গ্ৰহণ কৰিবলৈকো দাবী উত্থাপন কৰিছে।
