পত্নী ৰিয়া তালুকদাৰক হত্যা কৰাৰ অভিযোগত গ্ৰেপ্তাৰ হোৱা ৰামানু্জ গোস্বামীৰ আৰক্ষীৰ জিম্মাত থকা অৱস্থাত পুৱতি নিশা নৰকাসুৰ পাহাৰৰ পৰা জাঁপ দি মৃত্যু হোৱাৰ পিছত মৰণোত্তৰ পৰীক্ষাৰ বাবে প্ৰেৰণ কৰা হৈছে মৃতদেহ
পত্নী ৰিয়া তালুকদাৰক হত্যা কৰাৰ অভিযোগত আৰক্ষীৰ জিম্মাত থকা অভিযুক্ত ৰামানু্জ গোস্বামীৰ দেহত গুলীৰ কোনো আঘাতৰ চিহ্ন পোৱা হোৱা নাই বুলি গুৱাহাটী চিকিৎসা মহাবিদ্যালয় চিকিৎসালয়ৰ (জিএমচিএইচ) অধীক্ষক ডাঃ দেৱজিৎ চৌধুৰীয়ে স্পষ্ট কৰি দিছে। সোমবাৰে পুৱতি নিশা আৰক্ষীৰ জিম্মাৰ পৰা পলায়নৰ চেষ্টা কৰোঁতে নৰকাসুৰ পাহাৰৰ সমীপত পৰি গুৰুতৰভাৱে আঘাতপ্ৰাপ্ত হোৱা গোস্বামীক চিকিৎসালয়লৈ অনাৰ পিছত চিকিৎসকে মৃত বুলি ঘোষণা কৰে।
অধীক্ষক ডাঃ চৌধুৰীয়ে জানিবলৈ দিয়া মতে, আৰক্ষীয়ে চিকিৎসালয় কৰ্তৃপক্ষক গোস্বামী পথ দুৰ্ঘটনাত পতিত হোৱা বুলি অৱগত কৰিছিল। পুৱতি নিশা প্ৰায় ৩.৪১ বজাত তেওঁক চিকিৎসালয়ৰ জৰুৰীকালীন বিভাগলৈ অনা হৈছিল আৰু চিকিৎসকে তেওঁক মৃত অৱস্থাত অনা বুলি নিশ্চিত কৰে। চিকিৎসালয় কৰ্তৃপক্ষই ইচিজি আৰু আন প্ৰয়োজনীয় পৰীক্ষা সম্পন্ন কৰাৰ পিছত মৃতদেহটো মৰণোত্তৰ পৰীক্ষাৰ বাবে ফৰেনছিক বিভাগলৈ প্ৰেৰণ কৰিছে। মৃতদেহটোত গুলীৰ কোনো চিহ্ন নথকাৰ কথা উল্লেখ কৰি ডাঃ চৌধুৰীয়ে কয় যে তেওঁৰ দেহত থকা আঘাতসমূহ ওখ ঠাইৰ পৰা পৰি যোৱাৰ ফলত হোৱা আঘাতৰ সৈতে একেই।
আৰক্ষীৰ সূত্ৰই প্ৰকাশ কৰা অনুসৰি, তেজৰ নমুনা পৰীক্ষাৰ বাবে গোস্বামীক হাতীগাঁও আৰক্ষী থানাৰ পৰা কাহিলীপাৰা হৈ জিএমচিএইচলৈ নি থকা হৈছিল। তেনে সময়তে তেওঁ নৰকাসুৰ পাহাৰৰ পৰা জাঁপ দি পলায়নৰ চেষ্টা চলাইছিল। আৰক্ষীয়ে স্পষ্ট কৰি দিছে যে অভিযুক্তলৈ লক্ষ্য কৰি কোনো গুলীচালনা কৰা হোৱা নাছিল আৰু পাহাৰৰ পৰা পৰি যোৱাৰ ফলতেই তেওঁ গুৰুতৰভাৱে আঘাতপ্ৰাপ্ত হৈ মৃত্যু মুখত পৰে।
উল্লেখযোগ্য যে, গুৱাহাটীৰ হাতীগাঁও এলেকাৰ বশিষ্ঠপুৰস্থিত অঞ্জলি গৃহৰ এটা ফ্লেটত নিজ পত্নী ৰিয়া তালুকদাৰক হত্যা কৰাৰ অভিযোগত গৌৰীপুৰৰ মূল নিবাসী তথা পেছাত উবেৰ চালক ৰামানু্জ গোস্বামীক গ্ৰেপ্তাৰ কৰা হৈছিল। প্ৰায় ছমাহ পূৰ্বে বিবাহপাশত আবদ্ধ হোৱা দম্পতীহালৰ একেলগে বসবাস কৰিছিল যদিও পত্নীৰ বিবাহ বহিৰ্ভূত সম্পৰ্ক থকাৰ সন্দেহত দুয়োৰে মাজত সঘনাই তৰ্ক-বিতৰ্ক হৈছিল। স্থানীয় লোকে প্ৰকাশ কৰা অনুসৰি, শনিবাৰেও ফ্লেটটোৰ পৰা কাজিয়া আৰু এগৰাকী মহিলাৰ ক্ৰন্দনৰ শব্দ ভাঁহি আহিছিল। পৰৱৰ্তী সময়ত পৰিয়ালৰ লোকে খবৰ দিয়াৰ পিছত আৰক্ষীয়ে ফ্লেটটোৰ তৃতীয় মহলাৰ পৰা ৰিয়াৰ মৃতদেহ উদ্ধাৰ কৰে। আৰক্ষীৰ জিম্মাত থকা অৱস্থাত অভিযুক্তৰ মৃত্যু হোৱা ঘটনাক কেন্দ্ৰ কৰি সমগ্ৰ পৰিস্থিতিটোৱে বৰ্তমান বিশেষ চৰ্চা লাভ কৰিছে।
