দুৰ্গন্ধময় পৰিৱেশে তীব্ৰ অস্বস্তিত পেলাইছে বোকাখাত বিধান সভা সমষ্টিৰ অধীনৰ ৰঙাগড়া অঞ্চলৰ ৰাইজক।
জানিব পৰা মতে, ৰঙামাটি মৌজাৰ অন্তৰ্গত বোকাখাতৰ ৰঙাগড়াৰ গেলাবিল নৈত আৱদ্ধ হৈ পৰিছে বহুতো আৱৰ্জনা। দীৰ্ঘদিন ধৰি আৱদ্ধ হৈ থকা আৱৰ্জনাৰ লগতে জীৱ জন্তুৰ গেলা-পচা শৱদেহৰ পৰা ওলোৱা দুৰ্গন্ধই প্ৰদূষিত কৰিছে সমগ্ৰ ৰঙাগড়া অঞ্চল।
উল্লেখযোগ্য যে ৰঙামাটি আৰু মহুৰা মৌজাৰ মাজেৰে বৈ যোৱা গেলাবিল নৈ তথা দুসূঁতিমুখ পঞ্চায়তৰ অন্তৰ্গত ৰঙাগড়া আৰু মৰঙীয়াল সংযোগী পকী দলঙৰ কাষতে থকা পুৰণি দলঙৰ খুটাত কেইবামাহ ধৰি জমা হৈ থকা মেটেকাত আৱদ্ধ হৈ পৰিছে দূৰ-দূৰণি পৰা পানীত উটি অহা গেলা আৱৰ্জনাৰ লগতে জীৱ জন্তুৰ গেলা-পচা শৱদেহ। যাৰ পৰা ওলোৱা উৎকট গোন্ধই প্ৰদূষিত কৰিছে এতিয়া সমগ্ৰ অঞ্চলটো। জীয়াতু ভোগীছে নদী কাষৰীয়া লোকৰ লগতে পথটোৰে যাতায়ত কৰা স্কুল-কলেজীয়া ছাত্ৰ-ছাত্ৰীৰ লগতে স্থানীয় লোক তথা পথাচাৰীয়ে।
উল্লেখযোগ্য যে কাঠেৰে নিৰ্মিত পৰিত্যক্ত দলঙখনৰ খুঁটাসমূহ সংশ্লিষ্ট বিভাগে উঠাই নিনিয়াৰ ফলত প্ৰায় প্ৰতিবছৰেই এই সমস্যাৰ সন্মুখীন হৈ আহিছে স্থানীয় অঞ্চল বাসীয়ে।
স্থানীয় ৰাইজৰ অভিযোগ যে প্ৰতি বছৰে বান পানীৰ পাছত পূৰ্বৰ কাঠৰ দলংখনৰ পৰিত্যক্ত কাঠৰ খুঁটাবোৰত আবদ্ধ হোৱা আবৰ্জনাৰ দুৰ্গন্ধৰ বাবে জীয়াতু ভুগিবলগীয়া হয় পথাচাৰীয়ে। এই ক্ষেত্ৰত আবৰ্জনাবোৰ পৰিষ্কাৰ কৰা বা পূৰ্বৰ কাঠৰ দলংখনৰ পৰিত্যক্ত খুঁটাবোৰ উঠাই পেলোৱাৰ ক্ষেত্ৰত কাণসাৰ নাই বিভাগীয় কৰ্তৃপক্ষৰ।
উল্লেখ্য যে পূৰ্বৰ কাঠৰ দলংখনৰ পৰিত্যক্ত খুঁটাবোৰ আঁতৰাই পকী দলংখনৰ তলেৰে গেলাবিল নদীয়েদি আবৰ্জনাবোৰ অনায়সে প্ৰবাহিত কৰাৰ ব্যৱস্থা কৰিলেই প্ৰতিবছৰৰ বানপানীৰ পাছৰ দুৰ্গন্ধময় পৰিৱেশৰ পৰা মুক্ত হ’ব অঞ্চলবাসী । কিন্তু প্ৰতিবছৰেই ৰাইজৰ অভিযোগৰ পাছতো চৰম উদাসীনতা প্ৰদৰ্শন কৰি আহিছে বিভাগীয় লোকে।
যাৰ বাবে লোক নিৰ্মাণ আৰু খণ্ড উন্নয়ণ বিষয়ালৈ কেইবাদফীয়া দাবী সম্বলিত স্মাৰকপত্ৰ প্ৰেৰণ কৰি সমস্যা সমাধানৰ দাবী তুলিলে জীপাল কৃষক শ্ৰমিক সংঘই।
দাবী অনুসৰি অনতিবিলম্বে এসপ্তাহৰ ভিতৰত সম্পূৰ্ণ ৰূপে ৰঙাগড়া -গেলাবিল দলঙত লাগি থকা প্ৰদূষিত সমূদায় আৱৰ্জনা পৰিস্কাৰ কৰা, ৰঙাগড়া -গেলাবিল পকী দলঙৰ গাতে লাগি থকা পুৰণা পৰিত্যক্ত কাঠৰ দলঙখন এমাহৰ ভিতৰত উঠাই নিয়াৰ ব্যৱস্থা কৰাকে আদি কৰি কেইবাটাও দাবী সন্নিৱিষ্ট কৰি বিভাগীয় গাফিলতিৰ বাবে এনেদৰে আৰু কোনোকালেই যাতে সৰ্বসাধাৰণ ৰাইজে দুৰ্ভোগ ভুগিব লগা নহয় তাৰ বাবে সকীয়াই দিয়ে।
আনহাতে এই দাবী আওকাণ কৰি জনসাধাৰণক অস্বস্তিত পেলাই ৰাখিলে শীঘ্ৰেই সংগঠনটোয়ে প্ৰতিবাদী আন্দোলন গঢ়ি তুলিবলৈ বাধ্য হ’ব বুলিও উল্লেখ কৰে স্মাৰক পত্ৰখনত।
