কালি বিজেপিৰ ৰাজ্যিক সভাপতি ৰঞ্জিত দাসে “আছুৰ সাধাৰণ সম্পাদক লুৰিণজোতি গগৈ সৰুতে মুখ্য মন্ত্ৰী হ’ব খুজিছে তথা তেওঁ শিষ্টাচাৰ নাজানে” বুলি কটাক্ষ কৰাৰ পাছতেই আজি দাসৰ বিৰুদ্ধে সৰব হৈ পৰিছে লুৰিনজ্যোতি গগৈ।
বিজেপিৰ ৰাজ্যিক সভাপতিগৰাকীক সমালোচনা কৰিবলৈ গৈ লুৰিণে বিজেপি তথা বিজেপি যুৱ মৰ্চাৰ সভাপতিৰ মাওবাদীৰে সৈতে সম্পৰ্ক থকা বুলি মন্তব্য কৰে।
“চাবুৱা আৰু দুলীয়াজানত যিসকলে আক্ৰমণ কৰিছিল সেইসকলক মাওবাদী বুলি তেওঁ কৈছিল। কিন্তু ধৰা পৰিল সেইসকল বিজেপিৰ যুৱ মৰ্চাৰ সক্ৰিয় নেতা তথা চাবুৱাৰ বিধায়ক বিনোদ হাজৰিকা আৰু ৰামেশ্বৰ তেলীৰ অতিকৈ ঘনিষ্ঠ। এই কথাৰ পৰা স্পষ্ট হৈ গ’ল বিজেপিৰ তথা তাৰ ভাতৃ সংগঠনৰ নেতা কৰ্মীয়েহে তেওঁৰ চকুৰ সন্মুখতে মাওবাদীৰ সৈতে সম্পৰ্ক স্থাপন কৰিছে”, যুৱ সাংবাদিক সন্থা, অসমৰ এটা অনুষ্ঠানত অংশগ্ৰহণ কৰাৰ পাছত সংবাদ মাধ্যমৰ আগত এই মন্তব্য কৰে লুৰিণজ্যোতি গগৈয়ে।
গগৈয়ে লগতে ৰঞ্জিত দাসক মাওবাদীৰ নেতা আখ্যা দি তেওঁক NIA-ৰ তদন্তৰ আওতালৈ আনিবলৈ দাবী জনায়।
গগৈয়ে কয় ‘এনেবোৰ কাৰ্য্য ধৰা পৰাৰ পাছত NIA ই ৰঞ্জিত দাসক তদন্তৰ আওতালৈ আনিবৰ বাবে ছাত্ৰ সন্থাই আহ্বান জনাইছো।‘
আনহাতে, লুৰিণজ্যোতি গগৈ সৰুতে অসমৰ মুখ্য মন্ত্ৰী হ’ব বিচাৰিছে বুলি দাসে কৰা মন্তব্যৰ উত্তৰ দি তেওঁ কয় ‘বিজেপিৰ সভাপতিগৰাকীয়ে পৰোক্ষভাৱে স্বীকাৰ কৰিলে যে এই আন্দোলনৰ যোগেদি বিকল্প যি ৰাজনৈতিক শক্তি হ’ব আৰু তেওঁলোকৰ জিকাৰ যিটো শক্তি সেইটো ইতিমধ্যে পাই গৈছে।‘
“লুৰিণ গগৈ কৃষক হ’ব নে অন্য কিবা হ’ব সেয়া সময়ৰ প্ৰশ্ন। কিন্তু গণ আন্দোলনটোৱে তেওঁলোকৰ ভেটি লৰাই দিছে আৰু যিটো বিকল্প শক্তি আহিব সেইটোৱে যে চৰকাৰ গঠন কৰিব পাৰিব সেই কথা বিজেপিৰ ৰাজ্যিক সভাপতিগৰাকীয়ে পাকে-প্ৰকাৰে স্বীকাৰ কৰি ল’লে”, গগৈৰ মন্তব্য।
ইপিনে, ৰঞ্জিত দাসে শিষ্টাচাৰ ভাল কৰিবলৈ লুৰিণজ্যোতি গগৈক দিয়া পৰামৰ্শৰ পাছতে তেওঁক উভটি ধৰি লুৰিণে কয়, “তেওঁ শিষ্টাচাৰৰ কথা কৈ লাভ নাই। যিগৰাকী ব্যক্তিয়ে উজনি অসমলৈ গৈ নামনি অসমত থাকিলে পাকিস্তান যেন লাগে বুলি কয়, সেইজনে ৰাইজক কি শিষ্টাচাৰৰ পাঠ পঢ়াব?”
যেতিয়া দেশৰ জাতীয় পতাকা উত্তোলন কৰিবলৈ যাওঁতে খহি পৰে বা ওলোটাকৈ উত্তোলন কৰে, তাৰ পাছত সেই কাৰ্য্যক গেঞ্জীৰ লগত তুলনা কৰে, তাৰ পাছত তেওঁ কি শিষ্টাচাৰ শিকাব?
তদুপৰি, ‘অন্তৰ্বাসৰ লগত দেশৰ জাতীয় পতাকাক তুলনা কৰাজনৰ অন্যক শিষ্টাচাৰ শিকোৱাৰ কি যুক্তিযুক্ততা আছে? বুলি প্ৰশ্ন কৰি লুৰিণে লগতে কয় ‘এনে ব্যক্তিৰ পৰা অসমৰ মানুহে শিষ্টাচাৰৰ পাঠ কেতিয়াও গ্ৰহণ নকৰে।‘
আনহাতে, যোৱা শুকুৰবাৰে শংকৰদেৱ সংঘৰ অধিৱেশনত লুৰিণজ্যোতি গগৈয়ে শ্ৰী মন্ত শংকৰদেৱ সংঘৰ বিৰুদ্ধে বিৰূপ মন্তব্য কৰা বুলি হিমন্ত বিশ্ব শৰ্মাই লুৰিণক কটাক্ষ কৰি তেওঁক অহংকাৰী আখ্যা দিছিল।
মন্ত্ৰীগৰাকীৰ এই মন্তব্যৰ পাছতে তেওঁক উভটি ধৰি লুৰিণে কয়, “জনতাক যদিহে জনাৰ্দন বুলি গ্ৰহণ কৰিব নোৱাৰে, যদি হিমন্ত বিশ্ব শৰ্মাৰ তেনে অহংকাৰ হৈছে হৈ থাকক। তেওঁ ছুপাৰ গড হওক, তেওঁৰ কথাৰ সুৰ মিলাই যদি অন্য কোনোবা ছুপাৰ গড হ’ব বিচাৰিছে হ’বলৈ দিয়ক। কিন্তু গোটেই বিষয়টোৰ অপবাখ্যা কৰা হৈছে। তেওঁ ভোটৰ স্বাৰ্থত কোনোবা এটা অনুষ্ঠানক মূৰৰ ওপৰত ল’ব পাৰে।‘
হিমন্তৰ প্ৰতি আহ্বান জনাই লুৰিণে কয় ‘কিন্তু জনতাৰ মূৰৰ ওপৰত কাকো তুলি নিদিবলৈ তেওঁক মই সকীয়াই দিছো। জুলুঙাৰ মেকুৰী কালি ওলায়ে পৰিল। বহুবল্কী, ডলাৰ বগৰী মন্ত্ৰীগৰাকীয়ে ইয়াৰ মাষ্টাৰ মাইণ্ড। মানুহৰ মনত প্ৰশ্ন আছিল এই দুষ্টবুদ্ধিৰ আঁৰত কোনোবা এগৰাকী ব্যক্তিৰ হাত আছে। নহ’লে শুদ্ধ কথা এটাক বিপথে পৰিচালনা সাধাৰণ ৰাইজে কৰিব বুলি কেতিয়াও বিশ্বাস কৰিব নোৱাৰি।‘