হাইদৰাবাদ ধৰ্ষণকাণ্ডৰ স্মৃতি মাৰ নৌযাওতেই বুধবাৰে নিশা অসমৰ তিনিচুকীয়া জিলাৰ মাৰ্ঘেৰিটাৰ ইনথেম গাঁৱত এগৰাকী মহিলাক ধৰ্ষণ কৰি নৃশংসভাৱে হত্যা কৰাৰ দৰে জঘন্য লোমহৰ্ষক কাণ্ড সংঘটিত হয়।
জানিব পৰা মতে, ইমথেম ৰিতুপথাৰ গাঁৱৰ এগৰাকী চাৰি সন্তানৰ মাতৃয়ে ৫ ফেব্ৰুৱাৰিৰ নিশা প্ৰায় ৯.৩০ মান বজাত ভাওঁনাৰ আখৰাৰ পৰা ঘৰলৈ উভতি যোৱাৰ পথত বোধেশ্বৰ গগৈ নামৰ এজন দুৰ্বৃত্তই কাষৰ হাবিলৈ টানি নি মহিলা গৰাকীক প্ৰথমে উপৰ্যুপৰি ধৰ্ষণ কৰে আৰু তাৰপাছত ডিঙি চেপি হত্যা কৰে।
স্থানীয়ৰাইজে এই জঘন্য কাণ্ড আজি ৰাতিপুৱা গম পাই বোধেশ্বৰৰ লগতে গোলাপ গগৈ নামৰ অন্য এজনক উত্তম-মাধ্যম সোধাই মাৰ্ঘেৰিটা মহকুমাৰ পেঙেৰী আৰক্ষীক চমজাই দিয়ে।
অৱশ্যে, বোধেশ্বৰে অকলে এই ঘটনাৰ সৈতে জড়িত বুলি স্বীকাৰোক্তি দিয়াত আৰক্ষীয়ে বোধেশ্বৰ গগৈৰ ওপৰত c/no 05/2020 U/s 376/302IPC ধাৰাৰ অধীনত এটা গোচৰ ৰজু কৰি তদন্ত আৰম্ভ কৰিছে ৷
আজি পেঙেৰী থানাই মৃতদেহ চমজি লৈ মৰণোত্তৰ পৰীক্ষাৰ বাবে তিনিচুকীয়ালৈ প্ৰেৰণ কৰা বুলি জানিব পৰা গৈছে।
আনহাতে, মাৰ্ঘেৰিটা আঞ্চলিক ছাত্ৰ সন্থাই এই ঘটনাটোৰ সৈতে জড়িত অভিযুক্তক কঠোৰ শাস্তি বিহাৰ বাবে দাবী জনাইছে।
উল্লেখযোগ্য যে, সৰবৰহী মহিলা গৰাকীয়ে ’কা’ বিৰোধী আন্দোলনতো সক্ৰিয় ভাৱে অংশগ্ৰহণ কৰাৰ লগতে অঞ্চলটোৰ বিভিন্ন অনুষ্ঠানৰ লগত জড়িত আছিল।
চাঞ্চল্যকৰ ধৰ্ষণ তথা হত্যাকাণ্ডৰ ঘটনাই সমগ্ৰ মাৰ্ঘেৰিটা অঞ্চলটে তীব্ৰ চাঞ্চল্যৰ সৃষ্টি কৰাৰ লগতে ইনথেম অঞ্চলটোত এক শোকাকুল পৰিৱেশৰ সৃষ্টি কৰিছে৷ স্থানীয় দল সংগঠনে মহিলাগৰাকী হত্যাকাণ্ডৰ লগত জড়িত ধৃত বোধেশ্বৰক ফাঁচীকাঠ তুলি দৃষ্টান্তমূলক শাস্তিৰ দাবী তুলিছে।
গ্ৰেপ্তাৰ কৰা বোধেশ্বৰ মুখমণ্ডল তথ্য শৰীৰৰ বিভিন্ন স্থানত নখৰ আঁচোৰৰ চিনৰ প্ৰতি লক্ষ্য ৰাখি মহিলা গৰাকীয়ে মৃত্যুৰ পূৰ্বে নিজৰ প্ৰাণ বচাবলৈ যথেষ্ট চেষ্টা কৰিছিল বুলি আৰক্ষী প্ৰাথমিক তদন্তত পোহৰলৈ আহিছে।
