ব্যক্তিগত কাৰণত ২৪ জানুৱাৰীত গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত আনুষ্ঠানিক বঁটা প্ৰদান অনুষ্ঠানত উপস্থিত থাকিব নোৱাৰা বিশিষ্ট উদ্যোগপতি টাটা ট্ৰাষ্টৰ অধ্যক্ষ ৰতন টাটাক আজি আনুষ্ঠানিক ভাবে অসমৰ সৰ্বোচ্চ অসামৰিক বঁটা ‘অসম বৈভৱ’ৰে সন্মানিত কৰা হয়।
অসমৰ মুখ্যমন্ত্ৰী ডঃ হিমন্ত বিশ্ব শৰ্মাই বিশিষ্ট উদ্যোগপতিগৰাকীক এই বঁটা প্ৰদান কৰে।
মুম্বাইৰ কোলোবাত থকা তাজ ৱেলিংটন মেউছত আয়োজন কৰা এক বিশেষ অনুষ্ঠানত অসমৰ মুখ্যমন্ত্ৰীয়ে আজি বিশিষ্ট টাটা ট্ৰাষ্টৰ অধ্যক্ষ ৰতন টাটাক ৰাজ্যখনৰ সৰ্বোচ্চ অসামৰিক বঁটা “অসম বৈভৱ” প্ৰদান কৰে।
অসমত কৰ্কট ৰোগৰ চিকিৎসাৰ ক্ষেত্ৰত আগবঢ়োৱা অনবদ্য স্বীকৃতি স্বৰূপে ৰতন টাটালৈ ৰাজ্যৰ সৰ্বোচ্চ অসামৰিক সন্মান আগবঢ়োৱা হৈছে।
“অসম বৈভৱ” বঁটাত আছে এখন প্ৰশংসাপত্ৰ, এটা পদক আৰু নগদ ৫ লাখ টকা ।
ব্যক্তিগত অসুবিধাৰ বাবে ৰতন টাটাই ২৪ জানুৱাৰীত গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত আনুষ্ঠানিক বঁটা প্ৰদান অনুষ্ঠানত উপস্থিত থাকিব পৰা নাছিল।
উক্ত বঁটা প্ৰদান অনুষ্ঠানত অসমৰ ৰাজ্যপাল জগদীশ মুখীয়ে বিভিন্ন ক্ষেত্ৰৰ আন ১৮ গৰাকী বিশিষ্ট ব্যক্তিক ৰাজ্যখনৰ তিনিটা অসামৰিক বঁটা প্ৰদান কৰিছিল।