কৰ’না মহামাৰীৰ আতংকৰ মাজতে চাকৰি হেৰুওৱাৰ শংকাই মধ্যবিত্ত শ্ৰেণীক অধিক ভয়াবহ সংকটলৈ ঠেলি দিছে।
দেশৰ বিভিন্ন উদ্যোগ তথা ব্যৱসায়ত নামি অহা মন্দাৱস্থাৰ পৰিপ্ৰেক্ষিতত ব্যয় সংকোচনৰ নামত প্ৰায় সকলো সংস্থাই ব্যাপক হাৰত চাকৰি কৰ্তন কৰিছে।
সংস্থাসমূহৰ এনে মনোবৃত্তিক তীব্ৰ সমালোচনা কৰিছে দেশৰ শীৰ্ষ উদ্যোগপতি ৰতন টাটাই।
তেওঁৰ স্পষ্ট মত হ’ল,’’কৰ্মচাৰীৰ চাকৰি কৰ্তন সংস্থাৰ সমস্যাৰ কোনো সমাধান হ’ব নোৱাৰে’’।
কৰ’নাৰ সংকটৰ অজুহাতত বহু সংস্থাই চাকৰি কৰ্তন কৰাৰ লগতে কৰ্মচাৰীৰ দৰমহাও হ্ৰাস কৰিছে।
এতিয়ালৈকে টাটা গ্ৰুপৰ অধীনৰ কোনো এটা সংস্থাৰ পৰা কোনো কৰ্মচাৰীৰে চাকৰি কৰ্তন কৰা হোৱা নাই। মাত্ৰ সাময়িকভাৱে উচ্চ পদস্থ কৰ্মচাৰীসকলৰ ২০ শতাংশ দৰমহা হ্ৰাস কৰা হৈছে।
টাটা গ্ৰুপৰ বহুকেইটা ব্যৱসায়ে ব্যাপক লোকচান সন্মুখীন হৈছে। তথাপি কাৰো চাকৰিৰ প্ৰতি ভাবুকি আহি পৰা নাই।
বৰ্তমান পৰিস্থিতি চাকৰি কৰ্তন এক অসংবেদনশীলতাৰ পৰিচয় বুলি মত প্ৰকাশ কৰিছে উদ্যোগপতি ৰতন টাটাই।
ৰতন টাটাই কয় যে দেশৰ একাংশ কৰ্প’ৰেট সংস্থাই যিধৰণে কৰ্মচাৰীৰ চাকৰি কৰ্তন কৰিছে সেয়া অত্যন্ত দুৰ্ভাগ্যজনক সিদ্ধান্ত। এই সংস্থাসমূহৰ নেতৃত্বত থকা লোকসকল যে সহানুভুতিহীন সেয়া বুজি পোৱা যায়।
এটা ৱেবছাইটক দিয়া সাক্ষাৎকাৰত টাটাই কয় যে কোনো সংস্থা ইয়াৰ কৰ্মচাৰীসকলৰ প্ৰতি সংবেদনশীল নহ’লে টিকি থাকিব নোৱাৰে।
তেওঁ কয় যে কৰ’নাৰসংকটৰ সময়ত সকলোৱেই ক্ষতিগ্ৰস্ত যদিও সকলোৱে মিলিয়েই স্থিতি ধৰি ৰখাৰ উপায় উলিয়াব লাগিব।
তেওঁ কয় যে ৱৰ্ক ফ্ৰম হোম এটা সমধানৰ পথ কিন্তু চাকৰি খেদোৱাটো নহয়। আটাইতকৈ কঠিন সময়তে নতুন পথাৰ সন্ধান পোৱা যায় সেই কথা পাহৰিলে নচলিব।
প্ব্ৰজিত শ্ৰমিকসকলৰ দুৰ্দশাৰ সম্পৰ্কতো নিজৰ সহমৰ্মিতা প্ৰকাশ কৰি তেওঁ মন্তব্য কৰে যে ‘’এইসকল লোকে আপোনাৰ বাবে কাম কৰিছে। তেওঁলোকৰ গোটেই জীৱন আপোনাৰ প্ৰতিষ্ঠানৰ বাবে দিছে। আৰু তেওঁলোকৰ মূল্যৰে কিনা ছাদখনেই কাঢ়ি ল’লে! কৰ্মীসকলৰ প্ৰতি এয়াই আপোনালোকৰ আচৰণ, নৈতিকতাৰ দৃষ্টান্ত?’’
সংকটৰ সময়ত ৰতন টাটাৰ এই সাক্ষাৎকাৰ ইতিমধ্যে ভাইৰেল হৈ পৰিছে। প্ৰতিজন সচেতন তথা হৃদয়বান লোকেই এইগৰাকী মহান উদ্যোগপতিৰ প্ৰতি শ্ৰদ্ধাত মূৰ দোৱাইছে।
