নিগনিয়ে কি নাখায়? জব্দ কৰা মদ আৰু গাঞ্জাৰ পৰা আৰম্ভ কৰি এতিয়া প্ৰকৃত নগদ ধনলৈকে নিগনিৰ পৰা একোৱেই সাৰি যোৱা নাই যেন লাগে। শেহতীয়াকৈ এটা আচৰিত ঘটনা পোহৰলৈ আহিছে য’ত জব্দ কৰা উৎকোচৰ ধন ৰহস্যজনকভাৱে নিৰুদ্দেশ হোৱাৰ পিছত পূৰ্বে দোষী সাব্যস্ত হোৱা এগৰাকী চৰকাৰী বিষয়াই উচ্চতম ন্যায়ালয়ৰ পৰা জামিন লাভ কৰিছে। তদন্তকাৰীয়ে দাবী কৰিছে যে প্ৰথমে জব্দ কৰা ধনখিনি এন্দুৰৰ জাকে খাই পেলালে। এই অদ্ভুত ঘটনাই এতিয়া সকলোৰে মাজত যথেষ্ট আলোড়নৰ সৃষ্টি কৰিছে।
ঘটনাৰ বিৱৰণী অনুসৰি শ্ৰীমতী কুমাৰী নামৰ এগৰাকী মহিলা চৰকাৰী বিষয়াক দহ হাজাৰ টকা উৎকোচ গ্ৰহণ কৰাৰ অভিযোগত গ্ৰেপ্তাৰ কৰা হৈছিল। তেওঁ শিশু কল্যাণ বিভাগত কৰ্মৰত আছিল। উৎকোচ গ্ৰহণ কৰাৰ সময়ত হাতে-লোটে ধৰা পৰাৰ পিছত তদন্তকাৰীয়ে এই ধন জব্দ কৰিছিল। এই গোচৰটো যেতিয়া প্ৰথমবাৰৰ বাবে নিম্ন আদালতত বিচাৰলৈ আহিছিল তেতিয়া বিষয়াজনক দোষমুক্ত কৰা হৈছিল যদিও পিছলৈ পাটনা উচ্চ ন্যায়ালয়ে সেই ৰায় বাতিল কৰে। উচ্চ ন্যায়ালয়ে কুমাৰীক দোষী সাব্যস্ত কৰি চাৰি বছৰৰ কঠোৰ কাৰাদণ্ড আৰু আন এটা দণ্ডবিধিৰ অধীনত অতিৰিক্ত তিনি বছৰৰ কাৰাদণ্ডৰ শাস্তি প্ৰদান কৰিছিল।
কিন্তু আদালতৰ শুনানিৰ সময়ত এক ডাঙৰ তথ্য পোহৰলৈ আহে। প্ৰথমে জব্দ কৰা দহ হাজাৰ টকা বিচাৰি পোৱা নগ’ল। তদন্তকাৰী বিষয়াই আদালতক জনায় যে কোষাগাৰত বা তোশাখানাত এন্দুৰে আক্ৰমণ কৰি এই ধন নষ্ট কৰি পেলাইছে। ইয়াৰ পিছতে উচ্চ ন্যায়ালয়ৰ ৰায়ক প্ৰত্যাহ্বান জনাই বিষয়াগৰাকীয়ে উচ্চতম ন্যায়ালয়ত আবেদন দাখিল কৰে। উচ্চতম ন্যায়ালয়তো তদন্তকাৰীয়ে এন্দুৰৰ আক্ৰমণৰ কথা পুনৰাবৃত্তি কৰে। যিহেতু জব্দ কৰা প্ৰধান প্ৰমাণ অৰ্থাৎ ধনখিনি আদালতত দাখিল কৰিব পৰা নগ’ল সেয়েহে উচ্চতম ন্যায়ালয়ে যোৱা চৌবিশ এপ্ৰিলত অভিযুক্ত বিষয়াগৰাকীৰ শাস্তি স্থগিত ৰাখি তেওঁক জামিন মঞ্জুৰ কৰে।
কোষাগাৰৰ দৰে সুৰক্ষিত স্থানৰ পৰা এনেদৰে ধন হেৰাই যোৱা কাৰ্যত উচ্চতম ন্যায়ালয়ে গভীৰ আশ্চৰ্য প্ৰকাশ কৰিছে। আদালতে সকীয়াই দিয়ে যে যদিহে জব্দ কৰা ধন আৰু সামগ্ৰীসমূহ সঠিক যত্নৰে সংৰক্ষণ কৰা নহয় তেন্তে ভৱিষ্যতেও এনে ঘটনা ঘটিব পাৰে যাৰ ফলত চৰকাৰৰ বিস্তৰ আৰ্থিক লোকচান হ’ব। অৱশ্যে এই গোচৰটো ইয়াতেই শেষ নহয়, পৰৱৰ্তী শুনানিত বিষয়টো অধিক বিশদভাৱে আলোচনা কৰা হ’ব বুলি আদালতে ইংগিত দিছে। উল্লেখযোগ্য যে আৰক্ষীৰ ভঁৰালৰ পৰা সামগ্ৰী নিৰুদ্দেশ হোৱাৰ এইটোৱেই প্ৰথম ঘটনা নহয়। ইয়াৰ পূৰ্বেও বিহাৰকে ধৰি কেইবাখনো ৰাজ্যত জব্দ কৰা মদ আৰু গাঞ্জা নিৰুদ্দেশ হোৱাৰ ঘটনা ঘটিছিল আৰু প্ৰতিবাৰেই ইয়াৰ সমগ্ৰ দোষ নিগনিৰ ওপৰতেই জাপি দিয়া হৈছিল।
