ক্ৰিকেট ফিল্ডত এইসময়ত নিজৰ উপস্থিতিৰ প্ৰমাণ দিয়াৰ ক্ষেত্ৰত কোনো ধৰণৰ সুৰুঙা নাৰাখে ভাৰতীয় দলৰ নিৰ্ভৰযোগ্য অলৰাউণ্ডাৰ ৰবীন্দ্ৰ জাদেজাই।
শেহতীয়াকৈ বেটিং, বলিং আৰু ফিল্ডং এই আটাইকেইটা শাখাতে চমকপ্ৰদ প্ৰদৰ্শনেৰে ভাৰতৰ এক গুৰুত্বপূৰ্ণ খেলুৱৈত পৰিণত হৈ পৰিছে অলৰাউণ্ডাৰগৰাকী।
আজি মোহালিত শ্ৰীলংকাৰ বিৰুদ্ধে চলি থকা প্ৰথম টেষ্টৰ দ্বিতীয় দিনা কেৰিয়াৰৰ সৰ্বশ্ৰেষ্ঠ বেটিং প্ৰদৰ্শনেৰে অপৰাজিত ১৭৫ ৰাণৰ এটা আকৰ্ষণীয় ইনিংছ খেলে জাদেজাই।
এই ইনিংছটোৰে জাদেজাই ভাৰতীয় ক্ৰিকেটৰ ইতিহাসত এক নতুন ৰেকৰ্ড লিপিবদ্ধ কৰে। চমকপ্ৰদ ইনিংছটোৰে ভাৰতে ভাৰতৰ কিংবদন্তী ক্ৰিকেটাৰ কপিল দেৱৰ নামত থকা এটা ৩৫ বছৰীয়া ৰেকৰ্ড ভংগ কৰে।
টেষ্ট ক্ৰিকেটত ৭ নম্বৰ বা তাতকৈ তলৰ স্থানত বেটিং কৰিবলৈ ক্ৰীজলৈ অহা এজন ভাৰতীয় খেলুৱৈৰ দ্বাৰা সৰ্বাধিক স্ক’ৰৰ অভিলেখ ভংগ কৰিছে জাদেজাই। ৩৫ বছৰ ধৰি এই অভিলেখ কিংবদন্তী অলৰাউণ্ডাৰ কপিল দেৱৰ নামত অক্ষুন্ন আছিল।
কপিল দেৱে ১৯৮৬ চনৰ ডিচেম্বৰত ৭ নম্বৰত বেটিং কৰি কানপুৰত শ্ৰীলংকাৰ বিৰুদ্ধে ১৬৩ ৰাণ সংগ্ৰহ কৰিছিল। জাদেজাই আজি শ্ৰীলঙ্কাৰ বিৰুদ্ধেই এক দৰ্শনীয় ইনিংছেৰে সেই স্ক’ৰ অতিক্ৰম কৰে।
টেষ্ট ক্ৰিকেটত ৭ নম্বৰ বা তাতকৈ নিম্ন স্থানত বেটিং কৰি ১৫০ তকৈ অধিক ৰান সংগ্ৰহ কৰা কেৱল তৃতীয় গৰাকী ভাৰতীয় বেটাৰত পৰিণত হয় জাদেজা।
জাদেজা আৰু কপিল দেৱৰ উপৰিও ঋষভ পণ্টে সাত নম্বৰত বেটিং কৰি ১৫০-তকৈ অধিক ৰান সংগ্ৰহ কৰিছে। পণ্টে ২০১৯ চনত চিডনীত অষ্ট্ৰেলিয়াৰ বিৰুদ্ধে অপৰাজিত ১৫৯ ৰাণ সংগ্ৰহ কৰিছিল।
