আঘাতৰ বাবে দীৰ্ঘদিন ধৰি জাতীয় দলৰ বাহিৰত থকাৰ পিছত অৱশেষত প্ৰত্যাৱৰ্তন মেচতে উজ্বলি উঠিছে তাৰকা অলৰাউণ্ডাৰ ৰবীন্দ্ৰ জাদেজা। অষ্ট্ৰেলিয়াৰ বিৰুদ্ধে নাগপুৰত চলি থকা ব’ৰ্ডাৰ-গাভাস্কাৰ ট্ৰফীৰ প্ৰথমখন টেষ্টত জাদেজাৰ অলৰাউণ্ড প্ৰদৰ্শনৰ সুবাদত আজি দ্বিতীয় দিনা চালকৰ আসনত উপৱিষ্ট হৈছে ভাৰত।
প্ৰথমে অষ্ট্ৰেলিয়ান ইনিংছত স্পীন ঘূৰ্ণীৰে খহনীয়াৰ সৃষ্টি কৰা জাদেজাই আজি হাতত বেট লৈও ভাৰতীয় ইনিংছক গতি প্ৰদান কৰিছে। বেটাৰৰ বৈধ্যভূমিত পৰিণত হোৱা বিদৰ্ভ ক্ৰিকেট এছ’চিয়েশ্যন ষ্টেডিয়ামত আজি জাদেজাই অষ্ট্ৰেলিয়ান বলিং আক্ৰমণক প্ৰতিহত কৰি এক দৰ্শনীয় অৰ্ধশতকীয় ইনিংছেৰে অপৰাজিত আছে।
এই দুৰন্ত প্ৰদৰ্শনেৰে ভাৰতীয় দলৰ নিৰ্ভৰযোগ্য অলৰাউণ্ডাৰগৰাকীয়ে ভাৰতৰ কিংবদন্তী তাৰকা কপিল দেৱক অতিক্ৰম কৰি এক ঈৰ্ষণীয় অভিলেখ স্থাপন কৰিছে। অষ্ট্ৰেলিয়ান ইনিংছত পাঁচ উইকেট দখল কৰি পুনৰ বেটিঙত অৰ্ধশতক অৰ্জন কৰি জাদেজাই ভাৰতৰ হৈ সৰ্বাধিকবাৰ একেখন টেষ্টতে এটা ইনিংছত পাঁচ উইকেট আৰু অৰ্ধশতক অৰ্জন কৰা খেলুৱৈত পৰিণত হয়।
ইয়াৰ পূৰ্বে কপিল দেৱৰ নামত আছিল এই ঈৰ্ষণীয় অভিলেখ। কপিল দেৱে নিজৰ টেষ্ট কেৰিয়াৰত চাৰিবাৰ এই কৃতিত্ব অৰ্জন কৰিছিল। আনহাতে জাদেজাই টেষ্টত আজি পঞ্চমবাৰৰ বাবে এই সফলতা লাভ কৰি কপিল দেৱক অতিক্ৰম কৰে আৰু নতুন ভাৰতীয় অভিলেখ স্থাপন কৰে।
উল্লেখ্য যে অষ্ট্ৰেলিয়াৰ প্ৰথম ইনিংছৰ ১৭৭ ৰানৰ প্ৰত্যুত্তৰত ভাৰতে আজি দিনটোৰ সামৰণিলৈকে ৭ উইকেটত ৩২১ ৰান সংগ্ৰহ কৰিছে। ভাৰতৰ এই সবল স্থিতিৰ মূলতে আছে জাদেজাৰ লগতে অধিনায়ক ৰোহিত শৰ্মাৰ চমকপ্ৰদ শতক আৰু অক্ষৰ পেটেলৰ অৰ্ধশতক। ভাৰতৰ আন বেটাৰসকলৰ ব্যৰ্থতাৰ বিপৰীতে ৰোহিত শৰ্মাই ১২০ ৰানৰ এক দৰ্শনীয় ইনিংছ খেলি বিদায় লয়।
আনহাতে জাদেজাই ৬৬ আৰু পেটেলে ৫২ ৰান কৰি বেটিং কৰি আছে। ইফালে অভিষেকতে উজ্বলি উঠা অষ্ট্ৰেলিয়ান স্পিনাৰ টড মাৰ্ফীয়ে ৫ টা উইকেট দখল কৰিছে। হাতত দুটা উইকেট বাকী থকা অৱস্থাত ভাৰতে এইপৰ্যন্ত ১৪৪ ৰানৰ অগ্ৰগতি লৈছে।
