আই পি এলৰ ১৩ সংখ্যক সংস্কৰণত বিৰাট কোহলী নেতৃত্বাধীন আৰ চি বিয়ে খিতাপ দখল কৰিব বুলি অনুৰাগী সকলে আশা কৰিছিল যদিও শেষত দলৰ শোচনীয় প্ৰদৰ্শনৰ বাবে এয়া সম্ভৱ হৈ নুঠিল।
অধিনায়ক হিচাপে আই পি এলত পুনৰ এবাৰ বিফল হোৱাত বিৰাট কোহলীক তীব্ৰ সমালোচনা কৰাৰ লগতে গৌতম গম্ভীৰ আৰু সঞ্জয় মাঞ্জৰেকাৰৰ দৰে প্ৰাক্তন ক্ৰিকেটাৰসকলে তেওঁক দলৰ অধিনায়কৰ দায়িত্বৰ পৰা আঁতৰোৱাৰ কথাও কৈছে।
এই ধৰণৰ সমালোচনাৰ সন্মুখীন হোৱাৰ পিছতে বিৰাট কোহলীৰ সমৰ্থনত থিয় দিছে আৰ চি বিৰ সহযোগী ষ্টাফৰ মাইক হেছন আৰু ছাইমন কেটিছে।
মুখ্য প্ৰশিক্ষক ছাইমন কেটিছে কয়, ‘নেতৃত্বৰ ক্ষেত্ৰত, বিৰাট কোহলীৰ উপস্থিতিৰ বাবে আমি অতি সৌভাগ্যবান, তেওঁ অতি পেছাদাৰী আৰু তেওঁক দলৰ খেলুৱৈসকলে সন্মান কৰে’।
তেওঁ লগতে কয় যে কোহলীয়ে দল আৰু যুৱ খেলুৱৈসকলৰ সৈতে যথেষ্ট সময় অতিবাহিত কৰে। এনে দৃষ্টিভংগী অধিক খেলুৱৈৰ মাজত দেখা পোৱা নাযায়।
কোহলীয়ে আই পি এলৰ ১৫ খন মেচত ৪৫০ ৰান সংগ্ৰহ কৰি দললৈ যথেষ্ট অৱদান আগবঢ়াইছে বুলিও তেওঁ কয়।
ইফালে অহাবছৰ দলৰ ৰণনীতি কি হ’ভ বুলি মাইক হেছনক সোধাত তেওঁ কয় যে আমি দলৰ প্ৰদৰ্শন সমীক্ষা কৰিম আৰু তাৰ পিছত এটা সিদ্ধান্ত লম।
হেচন আৰু কেটিছে দলৰ বলিং বিভাগক বিশেষকৈ ভাৰতীয় স্পিনাৰ য়ুজবেন্দ্ৰ চাহালক ভূয়সী প্ৰশংসা কৰে।
ইয়াৰ উপৰি দুয়োজনে দেবদত্ত পড়িকাল, ৱাশ্বিংটন সুন্দৰ আৰু নৱদীপ ছাইনীৰ দৰে ভাৰতীয় ক্ৰিকেটাৰৰ প্ৰদৰ্শনকো প্ৰশংসা কৰা দেখা যায়।