যোৱা শনিবাৰে থাইলেণ্ডৰ সীমান্তৱৰ্তী ম্যানমাৰৰ কায়াহ প্ৰদেশত এখন যুদ্ধ বিমান দুৰ্ঘটনাগ্ৰস্ত হয়। দেশখনৰ এটা বিদ্ৰোহী সংগঠনে ম্যানমাৰৰ সেনাবাহিনীৰ যুদ্ধ বিমানখন গুলীয়াই ভূপতিত কৰা বুলি দাবী কৰে।
বিদ্ৰোহী সংগঠন কাৰেন্নি নেচনেলিটিজ ডিফেন্স ফৰ্চে (কেএনডিএফ)দাবী কৰিছে যে তেওঁলোকে যুদ্ধ বিমানখন গুলীয়াই ভূপতিত কৰিছে।
আনহাতে, দেশৰ জুন্টা চৰকাৰৰ মুখপাত্ৰ ঝাও মিন টুনে কয় যে যুদ্ধ বিমানখন যান্ত্ৰিক বিজুতিৰ বাবে দুৰ্ঘটনাগ্ৰস্ত হয়। দুৰ্ঘটনাৰ পূৰ্বে পাইলটজনে নিৰাপদে বাহিৰলৈ ওলাই আহিবলৈ সক্ষম হয়। তেওঁ সামৰিক বাহিনীৰ সৈতে যোগাযোগ কৰিছে।
লগতে পঢ়কঃ উত্তৰকাশীৰ নিৰ্মীয়মান সুৰংগৰ ভিতৰত ২৪ ঘন্টা ধৰি আৱদ্ধ ৪০ৰো অধিক শ্ৰমিক; উদ্ধাৰ অভিষান অব্যাহত
কায়াহ প্ৰদেশত দীৰ্ঘদিন ধৰি কেএনডিএফৰ সৈতে যুঁজ দি আহিছে ম্যানমাৰৰ সেনাবাহিনীয়ে। কিন্তু ম্যানমাৰৰ সেনাবাহিনীৰ ওপৰত চাপ পৰাৰ সময়তে যুদ্ধবিমান বিধ্বস্তৰ ঘটনা ঘটিছে। সেনাই বিভিন্ন বিদ্ৰোহী গোট আৰু জুন্টা বিৰোধী উগ্ৰপন্থীৰ বিৰুদ্ধে একাধিক ফ্ৰণ্টত যুঁজিবলগীয়া হৈছে।
বিশ্লেষকসকলে জনায় যে সংখ্যালঘু জনগোষ্ঠীয় বাহিনী আৰু বিদ্ৰোহীয়ে জুন্টা বাহিনীৰ বিৰুদ্ধে অভূতপূৰ্ব সমন্বয়ৰে আগবাঢ়িছে।
শেহতীয়াকৈ ম্যানমাৰৰ ৰাষ্ট্ৰপতি মিন ছুৱে দিয়া ভাষণত কয় যে, “বিদ্ৰোহক অধিক ফলপ্ৰসূভাৱে দমন কৰাত ব্যৰ্থ হোৱাৰ বাবে ম্যানমাৰ বিভাজনৰ আশংকা আছে।”
লগতে পঢ়কঃআতচবাজীৰ শব্দ সহ্য কৰিব নোৱাৰে চৰাইয়ে; নীৰৱে দীপাৱলী পালন কৰিছে ৭খন গাঁৱৰ বাসিন্দাই
উল্লেখ্য যে গণতান্ত্ৰিক চৰকাৰখন উৎখাত কৰি ২০২১ চনৰ ১ ফেব্ৰুৱাৰীত ম্যানমাৰত দেশৰ সেনাই ক্ষমতা দখল কৰিছিল। এই ঘটনাৰ পিছত ইতিমধ্যে বিভিন্ন প্ৰদেশত সক্ৰিয় হৈ থকা বিচ্ছিন্নতাবাদীসকলে জুন্টা বিৰোধী বিদ্ৰোহীৰ শিৱিৰত যোগদান কৰে।
