কংগ্ৰেছত পৰিয়ালতন্ত্ৰ চলা বুলি তাল আফাল লগোৱা বিজেপিয়ে এইবাৰ এক নজিৰ বিহীন কাম কৰি বহুতকে হতভম্ব কৰি তুলিছে।
দেশৰ প্ৰথমগৰাকী উপ-প্ৰধানমন্ত্ৰী চৰ্দাৰ বল্লভ ভাই পেটেলৰ নামেৰে ইতিমধ্যে নামকৰণ কৰা এখন ষ্টেডিয়ামৰ নাম আজি সলনি কৰি প্ৰধানমন্ত্ৰী নৰেন্দ্ৰ মোদীৰ নামেৰে ৰখাৰ কথাই সচতেন মহলৰ চকু কপালত তুলিছে।
যি খন মোদীৰ চৰকাৰে কংগ্ৰেছে গান্ধী পৰিয়ালৰ সদস্যৰ নামেৰে দেশৰ গৰিষ্ঠসংখ্যক প্ৰকল্পৰ নামকৰণ কৰা বুলি অভিযোগ কৰি বহু আঁচনিৰ পৰা গান্ধী পৰিয়ালৰ সদস্যৰ নাম মচি পেলাইছিল, সেই খন চৰকাৰেই এতিয়া লৌহ মানৱক উপেক্ষা কৰি মোদীৰ নামেৰে বিশ্বৰ সৰ্ববৃহৎ ক্ৰিকেট ষ্টেডিয়াম খনৰ নামকৰণ কৰাৰ কথাই বিজেপিক যে এতিয়া মোদীতন্ত্ৰই গ্ৰাস কৰি পেলাইছে তাকেই প্ৰমাণ কৰিলে।
আজি ৰাষ্ট্ৰপতি ৰাম নাথ কোবিন্দে গুজৰাটৰ আহমেদাবাদৰ মটেৰাত পুনৰ নিৰ্মাণ কৰি উলিওৱা চৰ্দাৰ পেটেল ষ্টেডিয়াম খন মুকলি কৰে।
অৱশ্যে নতুনকৈ মুকলি কৰাৰ সময়ত বিশ্বৰ সৰ্ববৃহৎ ক্ৰিকেট ষ্টেডিয়াম খনৰ নামকৰণ আৰু পেটেলৰ নামৰে কৰা নহ’ল।
মোদীৰ পূজাৰীসকলৰ অত্যুৎসাহতে ষ্টেডিয়াম খনৰ নাম ৰখা হ’ল প্ৰধানমন্ত্ৰী নৰেন্দ্ৰ মোদীৰ নামেৰে।
একেসময়তে ১.৩২ লাখ লোকে বহি খেল উপভোগ কৰিব পৰা ষ্টেডিয়াম খনৰ নাম সলনি কৰাৰ কথাই এতিয়া সকলোকে হতভম্ব কৰি তুলিছে।
ভাৰত আৰু ইংলেণ্ডৰ মাজত অনুষ্ঠিত তৃতীয় টেষ্টৰ জৰিয়তে মোদীৰ নামত মুকলি কৰা ষ্টেডিয়াম খন আৰম্ভ কৰা হয়। ৮০০ কোটি টকা ব্যয়ৰে প্ৰায় ৬৩ একৰ মাটিত পুনৰ সাজি উলিওৱা হৈছে এই ষ্টেডিয়ামখন।
২০১৫ চনত মেৰামতিৰ প্ৰয়োজন হোৱাত ষ্টেডিয়াম খন বন্ধ কৰি দিয়া হৈছিল।
মেৰামতিৰ পিছত পুনৰ মুকলি কৰা ষ্টেডিয়াম খন লৌহ মানৱ চৰ্দাৰ বল্লভ ভাই পেটেলৰ নামতে ৰখা হ’ব বুলি সকলোৱে ভাবিছিল যদিও আজি চূড়ান্ত একনায়কত্ববাদৰ পৰিচয় দি ষ্টেডিয়া৪ম খন মোদীৰ নামৰেহে নামকৰণ কৰা হ’ল।