মাদ্ৰাজ উচ্চ ন্যায়ালয়ে বুধবাৰে এক নিৰ্দেশত গুৰুত্বপূৰ্ণ মন্তব্য প্ৰদান কৰিছে। এক গোচৰৰ শুনানিত ন্যায়ালয়ে কয় যে এজন ব্যক্তিৰ জাতি এটা ধৰ্মৰ পৰা আন এটা ধৰ্মলৈ ৰূপান্তৰিত হোৱাৰ বাবে সলনি হ’ব নোৱাৰে।
হিন্দু অৰুন্ধথিয়াৰ সম্প্ৰদায়ৰ এগৰাকী মহিলা জি আমুথাক বিয়া কৰোৱা আদি দ্ৰাবিড় সম্প্ৰদায়ৰ এছ পল ৰাজ নামৰ যুৱক এজনে দাখিল কৰা এখন ৰিট আৱেদনৰ শুনানিৰ সময়ত ন্যায়াধীশ এছ এম সুব্ৰমনিয়ামে এই মন্তব্য কৰে। আবেদন খনত ৰাজে দুয়োজনকে অনুসূচীত জাতিৰ অন্তৰ্ভুক্ত বুলি উল্লেখ কৰিছিল।
খ্ৰীষ্টান ধৰ্ম গ্ৰহণ কৰাৰ পিছত ৰাজক আদাৰ বেকৱাৰ্ড ক্লাছ (অ’বিচি) সম্প্ৰদায়ৰ প্ৰমাণপত্ৰ প্ৰদান কৰা হৈছিল আৰু এই প্ৰমাণপত্ৰৰ আধাৰত তেওঁ অসবৰ্ণ বিবাহৰ প্ৰমাণপত্ৰৰ বাবে আবেদন কৰিছিল।
তামিলনাডুত অনুসূচীত জাতি বা জনজাতি সম্প্ৰদায়ৰ এজন সদস্যই আন যিকোনো সম্প্ৰদায়ৰ ব্যক্তিৰ সৈতে বিবাহপাশত আৱদ্ধ হ’লে বা অ’বিচি সম্প্ৰদায়ৰ সদস্য আন এটা সম্প্ৰদায়ৰ ব্যক্তিৰ মাজত বিবাহপাশত আৱদ্ধ হ’লে তেনে বিবাহক অসবৰ্ণ বিবাহ বুলি গণ্য কৰা হয়। এনে ব্যক্তিসকলে চৰকাৰী চাকৰিৰ বাবে অগ্ৰাধিকাৰ পোৱাৰ লগতে আন কিছু কল্যাণমূলক লাভালাভৰ বাবে যোগ্য বুলি বিবেচনা কৰা হয়।
স্বামী আৰু পত্নী দুয়ো জন্মগতভাৱে অনুসূচিত জাতিৰ সম্প্ৰদায়ৰ বুলি চালেম জিলা কৰ্তৃপক্ষই প্ৰমাণপত্ৰ জাৰী কৰিবলৈ অস্বীকাৰ কৰে। ইয়াৰ পাছতে ৰাজে অসবৰ্ণ বিবাহৰ প্ৰমাণপত্ৰ এখন ৰিট আবেদন দাখিল কৰে।
ৰাজৰ আইনী পৰামৰ্শদাতা পি. চাৰাভানানে যুক্তি দিছিল যে তামিলনাডু চৰকাৰৰ আদেশ অনুসৰি আবেদনকাৰীৰ বিবাহক অসবৰ্ণ বিবাহ বুলি গণ্য কৰা উচিত। ইয়াত বিৱৰণ দিয়া হৈছে যে এক অসবৰ্ণ বিবাহ হৈছে এনে এক বিবাহ য’ত এজন পতি-পত্নী অনুসূচীত জাতি/জনজাতি সম্প্ৰদায়ৰ অন্তৰ্ভুক্ত।
অৱশ্যে ৰাজ্য চৰকাৰৰ হৈ উপস্থিত থকা অধিবক্তা চি জয়প্ৰকাশে কয় যে সমাজ কল্যাণ বিভাগে ২১ জুলাই, ১৯৯৭ তাৰিখে জাৰী কৰা ২৩৫ নং পত্ৰৰ জৰিয়তে জাৰী কৰা এক স্পষ্টীকৰণত উল্লেখ কৰা হৈছে যে ধৰ্মান্তৰকৰণৰ ফলত প্ৰাপ্ত সামূহিক প্ৰমাণপত্ৰই অসবৰ্ণ বিবাহৰ প্ৰমাণপত্ৰ প্ৰদান নকৰে।
আদালতে ৰিট আৱেদনখন খাৰিজ কৰে আৰু আবেদনকাৰীক অসবৰ্ণ বিবাহৰ প্ৰমাণপত্ৰ প্ৰদানৰ ক্ষেত্ৰত চালেম চৰকাৰী বিষয়াৰ সিদ্ধান্তক বৰ্তাই ৰাখে।
ন্যায়াধীশ সুব্ৰমনিয়ামে তেওঁৰ ৰায়ত উল্লেখ কৰে যে, “যেতিয়া আবেদনকাৰী আৰু তেওঁৰ পত্নী দুয়ো জন্মগতভাৱে অনুসূচীত জাতি সম্প্ৰদায়ৰ হয়, কেৱল ধৰ্মান্তৰকৰণৰ দ্বাৰা আবেদনকাৰীয়ে তেওঁৰ ধৰ্ম সলনি কৰাৰ বাবে তেওঁক অসবৰ্ণ বিবাহৰ প্ৰমাণপত্ৰ প্ৰদান কৰিব নালাগে।”
“অসবৰ্ণ বিবাহৰ প্ৰমাণপত্ৰ জাৰী কৰাৰ মূল উদ্দেশ্য হৈছে কিছুমান কল্যাণমূলক আঁচনি প্ৰদান কৰা আৰু এনে পৰিস্থিতিত বিভিন্ন জাতিৰ শ্ৰেণীবিভাজন পিছপৰা শ্ৰেণী, অনুসূচীত জাতি, সৰ্বাধিক পিছপৰা শ্ৰেণী আৰু অন্যান্য শ্ৰেণী অসবৰ্ণ বিবাহৰ প্ৰমাণপত্ৰ দাবী কৰাৰ ভিত্তি হ’ব নোৱাৰে।” ৰায়টোত লগতে যোগ দিয়া হৈছে।
সুব্ৰমনিয়ামে লগতে উল্লেখ কৰে যে কল্যাণমূলক আঁচনিসমূহৰ অপব্যৱহাৰ প্ৰতিহত কৰাৰ বাবে এই সিদ্ধান্ত প্ৰাসংগিক।
