Renowned Ghazal singer Bhupinder Singh passes away প্ৰসিদ্ধ গজল শিল্পী ভূপিন্দৰ সিঙৰ পৰলোকপ্ৰাপ্তি ঘটিছে। তেওঁক ১০ দিন পূৰ্বে চিকিৎসালয়ত ভৰ্তি কৰোৱা হৈছিল। মঙলবাৰে তেওঁৰ অন্ত্যেষ্টিক্ৰিয়া সম্পন্ন কৰা হ’ব। মৃত্যুৰ সময়ত তেওঁৰ বয়স হৈছিল ৮২বছৰ। তেওঁৰ মৃত্যুত ভাৰতীয় সংগীত জগতত শোকৰ ছাঁ পৰিছে।
গজল শিল্পী হিচাপে দেশজুৰি খ্যাতি আছিল তেওঁৰ। ভূপিন্দৰ সিঙৰ কণ্ঠ শ্ৰোতাসকলৰ মনত চিৰকাল সজীৱ হৈ থাকিব। সোমবাৰে সন্ধিয়া ৭:৪৫ বজাত মুম্বাইৰ জুহুৰ এখন চিকিৎসালয়ত শিল্পীগৰাকীয়ে শেষ নিশ্বাস ত্যাগ কৰে।
বিখ্যাত গজল শিল্পীজন বিভিন্ন শাৰীৰিক সমস্যাত ভুগি আছিল। তেওঁৰ অসুস্থতা গুৰুতৰ হৈ পৰাত তেওঁক দহদিন পূৰ্বে চিকিৎসালয়ত ভৰ্তি কৰা হৈছিল। চিকিৎসকৰ মতে ভূপিন্দৰ সিঙৰ ক’লন কেন্সাৰত আক্ৰান্ত হৈছিল। কৰোনা পৰীক্ষাৰ প্ৰতিবেদনো তেওঁৰ পজিটিভ আহিছিল।
ভূপিন্দৰ সিঙৰ ১৯৪০ চনত পঞ্জাৱৰ অমৃতসৰত জন্ম হৈছিল। পাঁচ দশকজোৰা কেৰিয়াৰত তেওঁ সংগীত উদ্যোগৰ অসংখ্য প্ৰতিষ্ঠানৰ সৈতে কাম কৰিছিল। মহম্মদ ৰফি, আৰ ডি বৰ্মন, লতা মংগেশকাৰ, আশা ভোচলে আৰু বাপ্পী লাহিড়ীৰ দৰে প্ৰসিদ্ধ শিল্পীসকলৰ সৈতে তেওঁৰ বহুতো স্মৰণীয় সংগীত উপহাৰ দিছে।
ভূপিন্দৰ সিঙে তেওঁৰ দেউতাকৰ পৰা গান শিকিবলৈ আৰম্ভ কৰিছিল। ভূপিন্দৰ সিঙে এগৰাকী পেছাদাৰী সংগীতজ্ঞ হিচাপে অল ইণ্ডিয়া ৰেডিঅ’ত যোগদান কৰিছিল। পিছত তেওঁ দূৰদৰ্শনতো যোগদান কৰে। তেওঁৰ পত্নী মিতালী সিং এগৰাকী জনপ্ৰিয় গায়িকা।
নিজৰ দীঘলীয়া কেৰিয়াৰত ভূপিন্দৰ সিঙে ‘থোডি চি জমিন থোডা আছমান’ (চিতাৰা, লতা মংগেশকাৰৰ সৈতে গান গাইছিল), ‘দিল দুন্দা হে’ (মৌসম), ‘নাম গুম জায়েগা’ (কিনাৰা)ৰ দৰে জনপ্ৰিয় গান গাইছিল। ভূপিন্দৰ সিঙৰ গায়িকা পত্নীৰ সৈতেও কেইবাটাও বিখ্যাত গান আছে। ‘দো দিৱানে চহৰ মে’, ‘নাম গুম জায়েগা’, ‘এক আকেলা ইছ চহৰ মে’, ‘কভি কিচি কো মুকাম্মলা’ৰ দৰে চুপাৰহিট গানো গাইছে যুটীটোৱে।