অসম চুক্তিৰ ছয় নং দফাৰ উচ্চ-স্তৰীয় কমিটিৰ প্ৰতিবেদন কেন্দ্ৰক অৰ্পণ কৰাৰ ক্ষেত্ৰত ৰাজ্য চৰকাৰৰ জীয়া ফাঁকি ধৰা পৰিছে সংসদৰ ৰাজ্যসভাৰ মজিয়াত।
ইতিমধ্যে ৰাজ্য চৰকাৰৰ তৰফৰ পৰা জনোৱা হৈছিল যে অসম চুক্তিৰ ছয় নং দফা কাৰ্যকৰীকৰণৰ বাবে কেন্দ্ৰীয় গৃহ মন্ত্ৰণালয়ে গঠন কৰি দিয়া উচ্চ-স্তৰীয় কমিটিয়ে আগবঢ়োৱা প্ৰতিবেদন কেন্দ্ৰীয় গৃহ দপ্তৰক অৰ্পণ কৰা হৈছিল।
কিন্তু ৰাজ্যসভাত এগৰাকী সাংসদৰ প্ৰশ্নৰ লিখিত প্ৰশ্নোত্তৰত কেন্দ্ৰীয় গৃহ ৰাজ্যমন্ত্ৰীয়ে জনায় যে কেন্দ্ৰীয় গৃহ মন্ত্ৰণালয়ে গঠন কৰি দিয়া অসম চুক্তিৰ ছয় নং দফাৰ উচ্চ-স্তৰীয় কমিটিয়ে আগবঢ়োৱা প্ৰতিবেদন এতিয়াও ৰাজ্য চৰকাৰে ‘পৰীক্ষা’ কৰি আছে।
ইয়াৰ পৰা স্পষ্ট হৈ পৰিছে যে ৰাজ্য চৰকাৰে অসম চুক্তিৰ ছয় নং দফাৰ কাৰ্যকৰীকৰণৰ বাবে কেন্দ্ৰীয় গৃহ মন্ত্ৰণালয়ে গঠন কৰি দিয়া উচ্চ-স্তৰীয় কমিটিয়ে আগবঢ়োৱা পৰামৰ্শৰ প্ৰতিবেদন কেন্দ্ৰক অৰ্পণ কৰাই নাই।
ইফালে ৰাজ্য চৰকাৰে কিছুদিন পূৰ্বে জনাইছিল যে উচ্চ-স্তৰীয় কমিটিৰ পৰামৰ্শৰ প্ৰতিবেদন ছমাহৰ পূৰ্বে কেন্দ্ৰক অৰ্পণ কৰা হৈছে।
উল্লেখ্য যে ১৯৮৫ চনৰ অসম চুক্তিৰ ছয় নং দফা কাৰ্যকৰীকৰণৰ বাবে ২০১৯ চনৰ জুলাই মাহতে কেন্দ্ৰীয় গৃহ মন্ত্ৰণালয়ে এখন উচ্চ-স্তৰীয় কমিটি গঠন কৰি দিছিল।
কমিটিয়ে চলিত বৰ্ষৰ ফেব্ৰুৱাৰীতে মুখ্যমন্ত্ৰী সৰ্বানন্দ সোণোৱালৰ হাতত তেওঁলোকৰ প্ৰতিবেদন দাখিল কৰিছিল। মুখ্যমন্ত্ৰীক প্ৰতিবেদনখন অৰ্পণ কৰাৰ সময়ত অসম চুক্তি ৰূপায়ণ মন্ত্ৰী ডঃ হিমন্ত বিশ্ব শৰ্মাও উপস্থিত আছিল।
ইয়াৰ পিছতে উচ্চ-স্তৰীয় কমিটিৰ উক্ত প্ৰতিবেদনখনক লৈ ৰাজ্যৰ ৰাজানীতিত বিভিন্ন ধৰণৰ বিতৰ্কৰো সূত্ৰপাত হৈছিল।
বিশেষকৈ ৰাজ্য চৰকাৰে কোনো ধৰণৰ পদক্ষেপ গ্ৰহণ নকৰাৰ অভিযোগ তুলি সদৌ অসম ছাত্ৰ সন্থাই প্ৰতিবেদনখন সংবাদ মাধ্যমৰ যোগে ৰাজহুৱা কৰাৰ পাছতে তুমুল প্ৰতিক্ৰিয়াৰ সৃষ্টি হৈছিল ৰাজ্যৰ ৰাজনীতিত। ইয়াকে লৈ মন্ত্ৰী ডঃ হিমন্ত বিশ্ব শৰ্মাই তীৰ্যক মন্তব্য কৰাও পৰিলিক্ষিত হৈছিল।
“অসম চুক্তিৰ ছয় নং দফাৰ গৃহ মন্ত্ৰণালয়ে গঠন কৰা উচ্চ-স্তৰীয় কমিটিয়ে তেওঁলোকৰ প্ৰতিবেদনখন অসম চৰকাৰক অৰ্পণ কৰিছে আৰু ৰাজ্য চৰকাৰে ইয়াৰ পৰামৰ্শসমূহ পৰীক্ষা কৰি আছে।” কেন্দ্ৰীয় গৃহ ৰাজ্যমন্ত্ৰী জি কৃষ্ণ ৰেড্ডিয়ে বুধবাৰে এক প্ৰশ্নৰ উত্তৰত ৰাজ্যসভাত কয়।
ইয়াৰ পিছতেই ছয় নং দফাৰ উচ্চ-স্তৰীয় কমিটিৰ প্ৰতিবেদনকলৈ ৰাজ্য চৰকাৰে লুকাভাকু খেলি থকা ছবিখন স্পষ্ট হৈ পৰিছে।
