যোৰহাটৰ আটাপামৰ এখন চাহ বাগিচাৰ পৰা ১৭ জানুৱাৰিত উদ্ধাৰ কৰি কাজিৰঙাৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰলৈ অনা এটা মতা নাহৰফুটুকী বাঘৰ যোৱা নিশা কেন্দ্ৰ পোৱাৰ সময়তে মৃত্যু হয় ৷
অতি মুমুৰ্ষ অৱস্থাত চাহ বাগিচাৰ মাজৰ পৰা চেতনা নাশক প্ৰয়োগেৰে উদ্ধাৰ কৰি অনা এই মতা বাঘটো শনিবাৰে পুৱা পানবাৰী সংৰক্ষিত বনাঞ্চলৰ মদাৰজুৰি বনশিৱিৰৰ সমীপতে মৰণোত্তৰ পৰীক্ষা কৰি বিভাগীয় নিয়মেৰে দাহ কৰা হয় ৷
পানেৰীৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰটোৰ পশু চিকিৎসক ডাঃ চামচুল আলী আৰু ডাঃপানজিত বসুমতাৰীয়ে নাহৰফুটুকী বাঘটোৰ মৰণোত্তৰ পৰীক্ষা কৰি গৱেষণাগাৰ পৰীক্ষাৰ বাবে শৰীৰৰ নমুনাও সংগ্ৰহ কৰে ৷
মৰণোত্তৰ পৰীক্ষাত কাজিৰঙা ৰাষ্ট্ৰীয় উদ্যানৰ গৱেষণা বিষয়া ৰবীন্দ্ৰ শৰ্মা আৰু বোকাখাত বনাঞ্চলৰ খণ্ড বন বিষয়া তৰুণ গগৈও উপস্থিত থাকে।
শৰীৰত হোৱা বিহৰ ক্ৰিয়া আৰু আভ্যন্তৰীণ ৰক্ত ক্ষৰণৰ বাবেই নাহৰফুটুকী বাঘটোয়ে মৃত্যুক সাৱটি লব লগা হ’ল বুলি পশু চিকিৎসকে জনায় ৷
মৰণোত্তৰ পৰীক্ষাৰ শেষত বিভাগীয় নীতি-নিৰ্দেশনাৰে মৃত নাহৰফুটুকী বাঘটোক দাহ কৰা হয় ৷
